ಹಿರಿಯರ ಪಾದ ಮುಟ್ಟಿ ನಮಸ್ಕರಿಸುವ ಸಂಪ್ರದಾಯ: ಕೇವಲ ಗೌರವವಷ್ಟೇ ಅಲ್ಲ, ಇದರ ಹಿಂದಿದೆ ವೈಜ್ಞಾನಿಕ ರಹಸ್ಯ! Touching Elders Feet

Touching Elders Feet : ಭಾರತೀಯ ಸಂಸ್ಕೃತಿಯಲ್ಲಿ ಹಿರಿಯರ ಪಾದಗಳನ್ನು ಮುಟ್ಟಿ ಆಶೀರ್ವಾದ ಪಡೆಯುವುದು ತಲೆಮಾರುಗಳಿಂದ ನಡೆದುಬಂದಿರುವ ಅತ್ಯಂತ ಪವಿತ್ರವಾದ ಸಂಪ್ರದಾಯವಾಗಿದೆ. ಇದನ್ನು ಸಾಮಾನ್ಯವಾಗಿ ಗೌರವ ಮತ್ತು ವಿನಯದ ಸಂಕೇತವೆಂದು ಪರಿಗಣಿಸಲಾಗುತ್ತದೆಯಾದರೂ, ಈ ಆಚರಣೆಯ ಹಿಂದೆ ದೈಹಿಕ ಮತ್ತು ಮಾನಸಿಕ ಆರೋಗ್ಯಕ್ಕೆ ಪೂರಕವಾದ ಕೆಲವು ಆಳವಾದ ವೈಜ್ಞಾನಿಕ ಅಂಶಗಳು ಅಡಗಿವೆ ಎಂದು ತಜ್ಞರು ಅಭಿಪ್ರಾಯಪಡುತ್ತಾರೆ.

ಭಾರತೀಯ ತತ್ವಶಾಸ್ತ್ರ ಮತ್ತು ವಿಜ್ಞಾನ ಎರಡನ್ನೂ ಜೋಡಿಸುವ, ಆರೋಗ್ಯ ಹಾಗೂ ಪಾಸಿಟಿವ್​ ಶಕ್ತಿಯನ್ನು ವೃದ್ಧಿಸುವ ಈ ವಿಶಿಷ್ಟ ಪರಂಪರೆಯ ಹಿಂದಿರುವ ಆ ರೋಚಕ ವೈಜ್ಞಾನಿಕ ವಿವರಗಳು ಮತ್ತು ಆರೋಗ್ಯದ ರಹಸ್ಯಗಳನ್ನು ನಾವೀಗ ತಿಳಿಯೋಣ.

ನಮ್ಮ ಮಾನವ ದೇಹವು ಅಸಂಖ್ಯಾತ ನರಗಳು, ಜೀವಕೋಶಗಳು ಮತ್ತು ವಿದ್ಯುತ್ ಸಂಕೇತಗಳ ಮೂಲಕ ಕಾರ್ಯನಿರ್ವಹಿಸುವ ಒಂದು ಅತ್ಯಂತ ಸಂಕೀರ್ಣವಾದ ವ್ಯವಸ್ಥೆಯಾಗಿದೆ. ನಮ್ಮ ಕೈಬೆರಳುಗಳ ತುದಿ ಹಾಗೂ ಪಾದಗಳಲ್ಲಿ ಅತಿ ಹೆಚ್ಚು ನರಗಳ ತುದಿಗಳು ಕೇಂದ್ರೀಕೃತವಾಗಿರುತ್ತವೆ. ನಾವು ಹಿರಿಯರ ಪಾದಗಳನ್ನು ಮುಟ್ಟಿ ನಮಸ್ಕರಿಸಿದಾಗ ಆ ನರಗಳು ಪ್ರಚೋದನೆಗೊಳ್ಳುತ್ತವೆ ಎಂದು ನಂಬಲಾಗಿದ್ದು, ಇದು ದೇಹಕ್ಕೆ ಶಾಂತಿ ಮತ್ತು ನೆಮ್ಮದಿಯನ್ನು ನೀಡುವ ನರಮಂಡಲ ವ್ಯವಸ್ಥೆಯನ್ನು ಸಕ್ರಿಯಗೊಳಿಸಲು ನೆರವಾಗುತ್ತದೆ.

ನಾವು ಹಿರಿಯರ ಪಾದಗಳಿಗೆ ನಮಸ್ಕರಿಸಲು ಮುಂದಕ್ಕೆ ಬಾಗಿದಾಗ, ಆ ಭಂಗಿಯು ಕೇವಲ ನಮ್ಮಲ್ಲಿ ವಿನಯ ಮತ್ತು ನಮ್ರತೆಯನ್ನು ಹೆಚ್ಚಿಸುವುದಲ್ಲದೆ, ದೇಹದ ರಕ್ತ ಪರಿಚಲನೆಯ ಮೇಲೂ ಸಕಾರಾತ್ಮಕ ಪರಿಣಾಮ ಬೀರುತ್ತದೆ ಎಂದು ತಜ್ಞರು ಹೇಳುತ್ತಾರೆ. ವಿಶೇಷವಾಗಿ, ನಮ್ಮ ದೇಹದ ವಿಶ್ರಾಂತಿ ಮತ್ತು ನಿರಾಳತೆಗೆ ಸಂಬಂಧಿಸಿದ 'ವೇಗಸ್ ನರ'ದ ಕಾರ್ಯಕ್ಷಮತೆಯನ್ನು ಹೆಚ್ಚಿಸಲು ಈ ಭಂಗಿಯು ಮಹತ್ತರ ಕೊಡುಗೆ ನೀಡುತ್ತದೆ ಎಂಬುದು ವೈಜ್ಞಾನಿಕ ಅಧ್ಯಯನಗಳಿಂದ ತಿಳಿದುಬಂದಿದೆ.

ಹಿರಿಯರಿಗೆ ಗೌರವಪೂರ್ವಕವಾಗಿ ಬಾಗಿ ನಮಸ್ಕರಿಸುವುದು ನಮ್ಮಲ್ಲಿ ವಿನಯ ಮತ್ತು ಕೃತಜ್ಞತೆಯಂತಹ ಸಕಾರಾತ್ಮಕ ಭಾವನೆಗಳನ್ನು ಹೆಚ್ಚಿಸುತ್ತದೆ. ಈ ಪ್ರಕ್ರಿಯೆಯು ಕೋಪ, ಅಹಂಕಾರ ಮತ್ತು ಆತಂಕದಂತಹ ನಕಾರಾತ್ಮಕ ಭಾವನೆಗಳನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ ಎಂದು ತಜ್ಞರು ಹೇಳುತ್ತಾರೆ.

ಇನ್ನು ನಮಸ್ಕರಿಸಿದಾಗ ಹಿರಿಯರು ಪ್ರೀತಿಯಿಂದ ನಮ್ಮ ತಲೆಯ ಮೇಲೆ ಕೈಯಿಟ್ಟು ಆಶೀರ್ವದಿಸುವ ಸ್ಪರ್ಶವು ಮನಸ್ಸಿಗೆ ಆಪ್ತತೆಯ ಭಾವವನ್ನು ತರುತ್ತದೆ. ಇಂತಹ ಸಕಾರಾತ್ಮಕ ಸ್ಪರ್ಶಗಳಿಂದಾಗಿ ದೇಹದಲ್ಲಿ ಬಾಂಧವ್ಯವನ್ನು ಗಟ್ಟಿಗೊಳಿಸುವ ಆಕ್ಸಿಟೋಸಿನ್, ಸಿರೊಟೋನಿನ್ ಮತ್ತು ಎಂಡಾರ್ಫಿನ್‌ಗಳಂತಹ ಹಾರ್ಮೋನ್‌ಗಳು ಬಿಡುಗಡೆಯಾಗುತ್ತವೆ ಎಂದು ಕೆಲವು ಸಂಶೋಧನೆಗಳು ಸೂಚಿಸುತ್ತವೆ.

ಇದರೊಂದಿಗೆ, ಪ್ರಜ್ಞಾಪೂರ್ವಕವಾದ ಸಕಾರಾತ್ಮಕ ಸ್ಪರ್ಶ ಮತ್ತು ಪ್ರೀತಿಯ ಸಂಭಾಷಣೆಗಳು ಮಾನಸಿಕ ಒತ್ತಡವನ್ನು ಕಡಿಮೆ ಮಾಡಲು ಗಮನಾರ್ಹವಾಗಿ ಸಹಾಯ ಮಾಡುತ್ತವೆ ಎಂಬುದು ಹಲವು ಅಧ್ಯಯನಗಳಿಂದ ಸಾಬೀತಾಗಿದೆ. ಈ ರೀತಿಯ ಪ್ರೀತಿಯ ಒಡನಾಟ ಮತ್ತು ಆಶೀರ್ವಾದದ ಹಸ್ತವು ನಮ್ಮ ದೇಹದಲ್ಲಿ ಮಾನಸಿಕ ಒತ್ತಡವನ್ನು ಉಂಟುಮಾಡುವ 'ಕಾರ್ಟಿಸೋಲ್' ಹಾರ್ಮೋನ್ ಮಟ್ಟವನ್ನು ಕಡಿಮೆ ಮಾಡುತ್ತದೆ ಎಂದು ವಿಜ್ಞಾನಿಗಳು ಅಭಿಪ್ರಾಯಪಡುತ್ತಾರೆ, (ಏಜೆನ್ಸೀಸ್​).