Summer Naps; ಬೇಸಿಗೆಯಲ್ಲಿ ಮಧ್ಯಾಹ್ನದ ನಿದ್ದೆ ಅಮೃತ ಸಮಾನ: ಇದರ ಹಿಂದಿದೆ ರೋಚಕ ವಿಜ್ಞಾನ!

ಹೌದು, ಆದರೆ, ಬೇಸಿಗೆಯಲ್ಲಿ ಮಧ್ಯಾಹ್ನದ ಹೊತ್ತು ನಿದ್ದೆ ಮಾಡಲು ದೇಹ ಇಷ್ಟೊಂದು ಹಂಬಲಿಸುವುದು ಕೇವಲ ಸೋಮಾರಿತನವಲ್ಲ! ಇದರ ಹಿಂದೆ ಪ್ರಕೃತಿ ಮತ್ತು ವಿಜ್ಞಾನದ ದೊಡ್ಡ ರಹಸ್ಯವೇ ಅಡಗಿದೆ ಎಂದು ಆರೋಗ್ಯ ತಜ್ಞರು ವಿಶ್ಲೇಷಿಸಿದ್ದಾರೆ.

ಬೇಸಿಗೆಯಲ್ಲಿ ವಾತಾವರಣದ ತಾಪಮಾನ ಹೆಚ್ಚಿರುತ್ತದೆ. ಇಂತಹ ಪರಿಸ್ಥಿತಿಯಲ್ಲಿ ನಮ್ಮ ದೇಹವು ತನ್ನ ಒಳಗಿನ ತಾಪಮಾನವನ್ನು ಸಮತೋಲನದಲ್ಲಿ ಕಾಯ್ದುಕೊಳ್ಳಲು (ಸಾಮಾನ್ಯ ಸ್ಥಿತಿಯಲ್ಲಿಡಲು) ಸಾಮಾನ್ಯಕ್ಕಿಂತ ಹೆಚ್ಚಿನ ಶ್ರಮ ಪಡಬೇಕಾಗುತ್ತದೆ. ಅತಿಯಾದ ಬೇಗೆಯಿಂದಾಗಿ ದೇಹದಿಂದ ಬೆವರು ಹರಿದು ಹೋಗುತ್ತದೆ ಮತ್ತು ನಿರ್ಜಲೀಕರಣ (ಡಿಹೈಡ್ರೇಶನ್) ಉಂಟಾಗುತ್ತದೆ. ಇದರಿಂದ ದೇಹದಲ್ಲಿನ ಶಕ್ತಿ ಬೇಗನೆ ಖಾಲಿಯಾಗಿ, ನಮಗೆ ತೀವ್ರ ಆಯಾಸದ ಅನುಭವವಾಗುತ್ತದೆ. ಈ ಆಯಾಸವೇ ಮಧ್ಯಾಹ್ನದ ಸಮಯದಲ್ಲಿ ನಮ್ಮನ್ನು ನಿದ್ದೆಯತ್ತ ಮುಖ ಮಾಡುವಂತೆ ಮಾಡುತ್ತದೆ.

ನಮ್ಮ ದೇಹದಲ್ಲಿ 'ಸಿರ್ಕಾಡಿಯನ್ ರಿದಮ್' ಎಂಬ ನೈಸರ್ಗಿಕ ಜೈವಿಕ ಗಡಿಯಾರ ಇರುತ್ತದೆ. ಇದು ನಾವು ಯಾವಾಗ ಎಚ್ಚರ ಇರಬೇಕು, ಯಾವಾಗ ಮಲಗಬೇಕು ಎಂಬುದನ್ನು ನಿರ್ಧರಿಸುತ್ತದೆ. ವಿಜ್ಞಾನಿಗಳ ಪ್ರಕಾರ, ಈ ಜೈವಿಕ ಗಡಿಯಾರದ ಪ್ರಭಾವದಿಂದಾಗಿ ಮಧ್ಯಾಹ್ನ 1 ರಿಂದ 4 ಗಂಟೆಯ ಅವಧಿಯಲ್ಲಿ ನಮ್ಮ ದೇಹದ ಶಕ್ತಿಯ ಮಟ್ಟ ತಾನಾಗಿಯೇ ಸ್ವಲ್ಪ ಕುಸಿಯುತ್ತದೆ. ಬೇಸಿಗೆಯ ಬಿಸಿಲು ಈ ಪ್ರಕ್ರಿಯೆಯನ್ನು ಮತ್ತಷ್ಟು ವೇಗಗೊಳಿಸುವುದರಿಂದ ಮಧ್ಯಾಹ್ನದ ತೂಕಡಿಕೆ ತಡೆಯಲು ಸಾಧ್ಯವಾಗುವುದಿಲ್ಲ.

ಬೇಸಿಗೆಯ ಮಧ್ಯಾಹ್ನ ಮತ್ತು ಮಸಾಲೆಭರಿತ ಅಥವಾ ಭಾರೀ ಊಟದ ಕಾಂಬಿನೇಷನ್ ನಿದ್ದೆಯನ್ನು ಮತ್ತಷ್ಟು ಆಹ್ವಾನಿಸುತ್ತದೆ. ನಾವು ಕಾರ್ಬೋಹೈಡ್ರೇಟ್ ಹೆಚ್ಚಿರುವ ಅಥವಾ ಎಣ್ಣೆಯುಕ್ತ ಆಹಾರವನ್ನು ಹೊಟ್ಟೆ ತುಂಬಾ ತಿಂದಾಗ, ಅದನ್ನು ಜೀರ್ಣಿಸಿಕೊಳ್ಳಲು ದೇಹಕ್ಕೆ ಹೆಚ್ಚಿನ ಶಕ್ತಿಯ ಅಗತ್ಯವಿರುತ್ತದೆ. ಜೀರ್ಣಕ್ರಿಯೆಗೆ ದೇಹದ ರಕ್ತ ಪರಿಚಲನೆ ಹೆಚ್ಚಾಗುವುದರಿಂದ, ಮಿದುಳಿಗೆ ಆ ಸಮಯದಲ್ಲಿ ವಿಶ್ರಾಂತಿಯ ಅಗತ್ಯ ಕಂಡುಬಂದು ನಿದ್ದೆ ಆವರಿಸುತ್ತದೆ.

ಮಧ್ಯಾಹ್ನ ಮಲಗುವುದು ಆರೋಗ್ಯಕ್ಕೆ ಕೆಡುಕು ಎಂಬ ತಪ್ಪು ಕಲ್ಪನೆ ಅನೇಕರಲ್ಲಿದೆ. ಆದರೆ ತಜ್ಞರ ಪ್ರಕಾರ, ಮಧ್ಯಾಹ್ನದ ಹೊತ್ತು ಕೇವಲ 10 ರಿಂದ 30 ನಿಮಿಷಗಳ ಕಾಲ ಸಣ್ಣದೊಂದು ನಿದ್ದೆ (ಇದನ್ನು ಪವರ್ ನ್ಯಾಪ್ ಎನ್ನಲಾಗುತ್ತದೆ) ಮಾಡುವುದರಿಂದ ದಿನದ ದ್ವಿತೀಯಾರ್ಧದಲ್ಲಿ ಕೆಲಸ ಮಾಡಲು ಹೊಸ ಚೈತನ್ಯ ಸಿಗುತ್ತದೆ. ಇದು ಮೂಡ್ ಸರಿಪಡಿಸಲು, ಏಕಾಗ್ರತೆ ಹೆಚ್ಚಿಸಲು ಮತ್ತು ಮೆದುಳನ್ನು ಚುರುಕುಗೊಳಿಸಲು ಸಹಾಯ ಮಾಡುತ್ತದೆ. ಆದರೆ ನೆನಪಿಡಿ, ಮಧ್ಯಾಹ್ನದ ನಿದ್ದೆ ಅರ್ಧ ಗಂಟೆಗಿಂತ ಹೆಚ್ಚಾಗಬಾರದು. ತುಂಬಾ ಹೊತ್ತು ಮಲಗಿದರೆ ರಾತ್ರಿಯ ನಿದ್ದೆಗೆ ತೊಂದರೆಯಾಗಬಹುದು ಮತ್ತು ಎದ್ದ ತಕ್ಷಣ ತಲೆಭಾರ ಅಥವಾ ಮತ್ತಷ್ಟು ಆಲಸ್ಯ ಕಾಡಬಹುದು.

ದಿನವಿಡೀ ಸಾಲುವಷ್ಟು ನೀರು, ಮಜ್ಜಿಗೆ ಅಥವಾ ಎಳನೀರನ್ನು ಕುಡಿಯುತ್ತಿರಿ.

ಮಧ್ಯಾಹ್ನದ ಜೀರ್ಣಕ್ರಿಯೆ ಸುಲಭವಾಗಲು ಹಗುರವಾದ ಮತ್ತು ಪೌಷ್ಟಿಕ ಆಹಾರವನ್ನು ಸೇವಿಸಿ.

ಮಧ್ಯಾಹ್ನದ ಕಡು ಬಿಸಿಲಿನಲ್ಲಿ ಅತಿಯಾಗಿ ಅಡ್ಡಾಡುವುದನ್ನು ತಪ್ಪಿಸಿ.

ದೇಹಕ್ಕೆ ಆಯಾಸವೆನಿಸಿದರೆ ಮುಜುಗರವಿಲ್ಲದೆ 20 ನಿಮಿಷಗಳ ಕಾಲ ವಿಶ್ರಾಂತಿ ತಗೊಳ್ಳಿ.

ಮಧ್ಯಾಹ್ನದ ಸಣ್ಣ ನಿದ್ದೆ ನಿಮ್ಮನ್ನು ಸೋಮಾರಿಗಳನ್ನಾಗಿ ಮಾಡುವುದಿಲ್ಲ, ಬದಲಿಗೆ ನಿಮ್ಮ ಆರೋಗ್ಯವನ್ನು ಕಾಪಾಡಿ, ನಿಮ್ಮ ಕೆಲಸದ ಸಾಮರ್ಥ್ಯವನ್ನು ಹೆಚ್ಚಿಸುತ್ತದೆ ಎನ್ನುತ್ತದೆ ವಿಜ್ಞಾನ,(ಏಜೆನ್ಸೀಸ್​).