Vastu Beliefs: ಮನೆಯ ಹೊಸ್ತಿಲ ಮೇಲೆ ಕುಳಿತುಕೊಳ್ಳಲು ಹಿರಿಯರು ಬಿಡುತ್ತಿರಲಿಲ್ಲ. ಅಪ್ಪಿತಪ್ಪಿಯೂ ಹೊಸ್ತಿಲ ಮೇಲೆ ಕುಳಿತುಕೊಳ್ಳಬಾರದು, ಹಾಗೆ ಮಾಡಿದರೆ ಮನೆಗೆ ದರಿದ್ರ ಬರುತ್ತದೆ, ಲಕ್ಷ್ಮಿ ನೆಲೆಸುವುದಿಲ್ಲ ಎಂದು ಎಚ್ಚರಿಸುತ್ತಿದ್ದರು. ಇಂದಿಗೂ ಹಲವರು ಈ ಮಾತನ್ನು ಪಾಲಿಸುತ್ತಾರೆ. ಆದರೆ, ಮನೆಯ ಒಂದು ಸಣ್ಣ ಜಾಗದ ಬಗ್ಗೆ ಇಷ್ಟೊಂದು ಕಟ್ಟುನಿಟ್ಟಿನ ನಿಯಮವೇಕೆ? ಹೊಸ್ತಿಲಿಗೂ ಅದೃಷ್ಟಕ್ಕೂ ಏನು ಸಂಬಂಧ? ಇದರ ಹಿಂದೆ ತಲೆಮಾರುಗಳಿಂದ ನಡೆದುಬಂದಿರುವ ಕುತೂಹಲಕಾರಿ ನಂಬಿಕೆಗಳಿವೆ.
ಹಿಂದಿನ ಕಾಲದಲ್ಲಿ ಮನೆಯ ಹೊಸ್ತಿಲನ್ನು ಲಕ್ಷ್ಮಿಯ ಪ್ರವೇಶದ್ವಾರವೆಂದು ಭಾವಿಸಲಾಗುತ್ತಿತ್ತು. ಮನೆಗೆ ಸಂಪತ್ತು, ಸಮೃದ್ಧಿ ಮತ್ತು ಶುಭವನ್ನು ತರುವ ದೇವತೆ ಲಕ್ಷ್ಮಿ ಹೊಸ್ತಿಲ ಮೂಲಕ ಪ್ರವೇಶಿಸುತ್ತಾಳೆ ಎಂಬ ನಂಬಿಕೆಯಿತ್ತು. ಹೀಗಾಗಿ ಆ ಜಾಗದಲ್ಲಿ ಕುಳಿತುಕೊಳ್ಳುವುದು ಅಥವಾ ಅಡ್ಡವಾಗಿ ಕಾಲು ಚಾಚುವುದು ಶುಭಕರವಲ್ಲ ಎಂದು ಹಿರಿಯರು ಹೇಳುತ್ತಿದ್ದರು. ಹಿಂದಿನ ಕಾಲದಲ್ಲಿ ಹಬ್ಬ, ಮದುವೆ ಮತ್ತು ಶುಭ ಸಮಾರಂಭಗಳ ಸಂದರ್ಭದಲ್ಲಿ ಮನೆಯ ಹೊಸ್ತಿಲಿಗೆ ಅರಿಶಿನ, ಕುಂಕುಮ ಹಚ್ಚಿ ಹೂಗಳಿಂದ ಅಲಂಕರಿಸುತ್ತಿದ್ದರು. ಇದನ್ನು ಮನೆಯ ಮಂಗಳಕರ ಆರಂಭದ ಸಂಕೇತವೆಂದು ಪರಿಗಣಿಸಲಾಗುತ್ತಿತ್ತು. ಪೂಜ್ಯವೆಂದು ಭಾವಿಸಿದ ಜಾಗದ ಮೇಲೆ ಕುಳಿತುಕೊಳ್ಳುವುದು ಅಗೌರವ ತೋರಿದಂತೆ ಎಂಬ ಭಾವನೆ ಜನರಲ್ಲಿತ್ತು.
ಹೊಸ್ತಿಲು ಮನೆಯ ಒಳಭಾಗ ಮತ್ತು ಹೊರಭಾಗವನ್ನು ಸಂಪರ್ಕಿಸುವ ಪ್ರಮುಖ ಜಾಗ. ಮನೆಗೆ ಅತಿಥಿಗಳು ಬಂದಾಗ ಅಥವಾ ಮನೆಯವರು ಹೊರಗೆ ಹೋಗುವಾಗ ಹೊಸ್ತಿಲ ಮೇಲೆ ಕುಳಿತಿದ್ದರೆ ದಾರಿ ಅಡ್ಡಿಯಾಗುತ್ತಿತ್ತು. ಅದರಲ್ಲೂ ಮಕ್ಕಳು ಮತ್ತು ವಯಸ್ಸಾದವರು ಎಡವಿ ಬೀಳುವ ಸಾಧ್ಯತೆಯಿತ್ತು. ಈ ಕಾರಣದಿಂದಲೂ ಹಿರಿಯರು ಆ ಜಾಗದಲ್ಲಿ ಕುಳಿತುಕೊಳ್ಳದಂತೆ ತಡೆಯುತ್ತಿದ್ದರು.
ಹಿಂದಿನ ಕಾಲದಲ್ಲಿ ಹೊಸ್ತಿಲು ಮನೆಯ ರಕ್ಷಣೆ ಮತ್ತು ಗೌಪ್ಯತೆಯ ಸಂಕೇತವಾಗಿತ್ತು. ಮನೆಯ ಒಳಗಿನ ಶಾಂತಿ ಮತ್ತು ಹೊರಗಿನ ಪ್ರಪಂಚದ ನಡುವಿನ ಗಡಿಯೆಂದು ಅದನ್ನು ನೋಡಲಾಗುತ್ತಿತ್ತು. ಹಾಗಾಗಿ ಹೊಸ್ತಿಲನ್ನು ಯಾವಾಗಲೂ ಸ್ವಚ್ಛವಾಗಿಡಬೇಕು, ಅದರ ಮೇಲೆ ಅನಗತ್ಯ ವಸ್ತುಗಳನ್ನು ಇಡಬಾರದು ಎಂಬ ಸಂಪ್ರದಾಯ ಬೆಳೆದುಬಂದಿತ್ತು.
ಮನೆಯ ಹೊಸ್ತಿಲ ಮೇಲೆ ಕುಳಿತುಕೊಂಡರೆ ಲಕ್ಷ್ಮಿ ಮನೆ ಪ್ರವೇಶಿಸುವುದಿಲ್ಲ, ಕುಟುಂಬಕ್ಕೆ ಕಷ್ಟಗಳು ಎದುರಾಗುತ್ತವೆ ಎಂಬ ಮಾತುಗಳನ್ನು ಹಿರಿಯರು ಹೇಳುತ್ತಿದ್ದರು. ಇಂತಹ ನಂಬಿಕೆಗಳ ಮೂಲಕ ಮಕ್ಕಳು ಮನೆಯ ಪ್ರವೇಶದ್ವಾರವನ್ನು ಗೌರವಿಸುವಂತೆ ಮತ್ತು ಸ್ವಚ್ಛವಾಗಿಡುವಂತೆ ಮಾಡಲಾಗುತ್ತಿತ್ತು. ಈ ಮಾತು ತಲೆಮಾರಿನಿಂದ ತಲೆಮಾರಿಗೆ ಮುಂದುವರಿದು ಇಂದಿಗೂ ಅನೇಕ ಮನೆಗಳಲ್ಲಿ ಪಾಲನೆಯಾಗುತ್ತಿದೆ. ಹೊಸ್ತಿಲ ಮೇಲೆ ಕುಳಿತುಕೊಂಡರೆ ದರಿದ್ರ ಬರುತ್ತದೆ ಅಥವಾ ಲಕ್ಷ್ಮಿ ಮನೆಗೆ ಬರುವುದಿಲ್ಲ ಎಂಬುದಕ್ಕೆ ವೈಜ್ಞಾನಿಕ ಪುರಾವೆಗಳಿಲ್ಲ. ಆದರೆ ಮನೆಯ ಪ್ರವೇಶದ್ವಾರವನ್ನು ಸ್ವಚ್ಛವಾಗಿಡುವುದು, ಸಂಚಾರಕ್ಕೆ ಅಡ್ಡಿಯಾಗದಂತೆ ನೋಡಿಕೊಳ್ಳುವುದು ಮತ್ತು ಸಾಂಪ್ರದಾಯಿಕ ಆಚರಣೆಗಳಿಗೆ ಗೌರವ ನೀಡುವುದು ಈ ನಂಬಿಕೆಯ ಹಿಂದಿನ ಪ್ರಾಯೋಗಿಕ ಅರ್ಥಗಳಾಗಿವೆ. ( ಏಜೇನ್ಸಿಸ್)