ಮುಂಗಾರಿನ ಮಳೆಯಲ್ಲಿ ಚಿಗುರುತ್ತಿದೆ ನವ ಪ್ರೀತಿ: ಆಧುನಿಕ ಡೇಟಿಂಗ್‌ಗೆ ಮಳೆಗಾಲವೇ ಸೇತುವೆ! Modern Dating

Modern Dating : ಬಿಸಿಲ ಬೇಗೆಯಿಂದ ಹದವಾದ ತಂಪೆರೆಯುವ ಮುಂಗಾರು, ಹನಿ ಹನಿಯಾಗಿ ಸುರಿಯುವ ಮಳೆಯ ಸಿಂಚನ, ಒಂದೇ ಕೊಡೆಯಡಿಯಲ್ಲಿ ಕೈಕೈ ಹಿಡಿದು ಸಾಗುವ ಆ ಪ್ರಣಯ ಕ್ಷಣಗಳು... ಪ್ರತಿಯೊಬ್ಬರ ಮನದಲ್ಲೂ ಹೊಸ ಪ್ರೀತಿಯ ಚಿಗುರು ಮೂಡಿಸುವ ಶಕ್ತಿ ಈ ಮಳೆಗಾಲಕ್ಕಿದೆ. ಆದರೆ, ಬದಲಾದ ಇಂದಿನ ಆಧುನಿಕ ಡೇಟಿಂಗ್ ಜಗತ್ತಿನಲ್ಲಿ, ಅದರಲ್ಲೂ ವಿಶೇಷವಾಗಿ ವಿವಾಹ ಜೀವನದ ಕಹಿ ಅನುಭವದಿಂದ ಹೊರಬಂದು ಪ್ರೀತಿಗೆ ಎರಡನೇ ಅವಕಾಶ ನೀಡಲು ಬಯಸುವ ಒಂಟಿ ಮನಸ್ಸುಗಳಿಗೆ ಈ ಮುಂಗಾರು ಕೇವಲ ರೊಮ್ಯಾಂಟಿಕ್ ವಾತಾವರಣವಷ್ಟೇ ಅಲ್ಲ, ಅದು ಅವರ ಹೃದಯದಾಳದ ಮೌನ ಬದಲಾವಣೆಯ ಹಾಗೂ ಹೊಸ ಭರವಸೆಯ ಸಂಕೇತವಾಗಿ ಬದಲಾಗಿದೆ.

ವಿಚ್ಛೇದಿತರಿಗಾಗಿಯೇ ವಿಶೇಷವಾಗಿ ವಿನ್ಯಾಸಗೊಳಿಸಲಾದ 'ರಿಬೌನ್ಸ್' ಮ್ಯಾಟ್ರಿಮೊನಿ ಆ್ಯಪ್‌ನ ಸಿಇಒ ರವಿ ಮಿತ್ತಲ್ ಅವರ ಪ್ರಕಾರ, ವಿಚ್ಛೇದನ ಪಡೆದ ಒಂಟಿ ಮನಸ್ಸುಗಳು ಪ್ರೀತಿಯನ್ನು ಕೇವಲ ಬಾಹ್ಯ ಆಕರ್ಷಣೆಯಾಗಿ ನೋಡದೆ, ಅತ್ಯಂತ ಪ್ರಮುಖವಾದ ಭಾವನಾತ್ಮಕ ಭದ್ರತೆಯಾಗಿ ಕಾಣುತ್ತಾರೆ. ಇಂತಹ ಗಾಢವಾದ, ಭಾವನಾತ್ಮಕ ಮತ್ತು ಆತ್ಮೀಯ ಸಂಬಂಧಗಳು ಚಿಗುರೊಡೆದು ಸಾಗಲು ಈ ಮುಂಗಾರಿನ ತಂಪಾದ ವಾತಾವರಣವು ಅಂದರೆ, ಮಳೆಗಾಲವು ಅತ್ಯಂತ ಸೂಕ್ತ ಹಾಗೂ ಹಿತಕರವಾದ ಪರಿಸರವನ್ನು ನಿರ್ಮಿಸಿಕೊಡುತ್ತದೆ. ಹಾಗಾದರೆ, ಮಳೆಗಾಲವು ಡೇಟಿಂಗ್ ಅನ್ನು ಹೇಗೆ ಬದಲಾಯಿಸುತ್ತಿದೆ ಎಂಬುದನ್ನು ನಾವೀಗ ತಿಳಿದುಕೊಳ್ಳೋಣ.

ಮುಂಗಾರಿನ ಆಗಮನವು ಜೀವನದ ಗತಿಯನ್ನು ಸಹಜವಾಗಿಯೇ ಕೊಂಚ ನಿಧಾನಗೊಳಿಸುತ್ತದೆ. ಹಠಾತ್ ಮುಂದೂಡಲ್ಪಡುವ ಪ್ಲಾನ್‌ಗಳು ಹಾಗೂ ಮನೆಯೊಳಗೇ ಕಳೆಯುವ ವಾರಾಂತ್ಯಗಳು ವಿಶ್ರಾಂತಿ ಪಡೆಯಲು ಸೂಕ್ತ ಅವಕಾಶ ಒದಗಿಸುತ್ತವೆ. ಇದು ದೈನಂದಿನ ಜೀವನಕ್ಕೆ ಕೆಲವೊಮ್ಮೆ ಅಡಚಣೆ ಉಂಟುಮಾಡಿದರೂ, ಪ್ರೀತಿಗೆ ಎರಡನೇ ಅವಕಾಶ ಹುಡುಕುತ್ತಿರುವವರಿಗೆ ಅವರು ಸಾಮಾನ್ಯವಾಗಿ ತಮಗೆ ನೀಡದ ಅತ್ಯಂತ ಪ್ರಮುಖ ವಸ್ತುವನ್ನು ನೀಡುತ್ತದೆ. ಅದೇ 'ಸಮಯ'. ವಿಚ್ಛೇದನದ ನಂತರ ನವ ಜೀವನಕ್ಕೆ ಕಾಲಿಡುತ್ತಿರುವವರು ಕೇವಲ ಆಕರ್ಷಣೆಗೆ ಮರುಳಾಗದೆ, ಭಾವನಾತ್ಮಕವಾಗಿ ತೊಡಗಿಸಿಕೊಳ್ಳುವ ಮುನ್ನ ಎದುರಾಗುವ ವ್ಯಕ್ತಿಯನ್ನು ಆಳವಾಗಿ ಅರ್ಥಮಾಡಿಕೊಳ್ಳಲು ಬಯಸುತ್ತಾರೆ. ಇಂತಹ ಸಂದರ್ಭದಲ್ಲಿ, ಮಳೆಗಾಲವು ನೇರವಾಗಿ "ನಾವು ಯಾವಾಗ ಭೇಟಿಯಾಗೋಣ?" ಎಂಬ ಆತುರದ ಭೇಟಿಗೆ ಒತ್ತು ನೀಡುವ ಬದಲು, ಆತುರವಿಲ್ಲದೇ ಡಿಜಿಟಲ್ ಸಂಭಾಷಣೆಗಳ ಮೂಲಕ ಪರಸ್ಪರರ ಆಲೋಚನೆಗಳನ್ನು ವಿಸ್ತಾರವಾಗಿ ತಿಳಿದುಕೊಳ್ಳುವ ಮತ್ತು ಗಂಭೀರ ವಿಷಯಗಳ ಬಗ್ಗೆ ಚರ್ಚಿಸುವ ಉತ್ತಮ ವೇದಿಕೆಯನ್ನು ಕಲ್ಪಿಸಿಕೊಡುತ್ತದೆ.

ಅನಿರೀಕ್ಷಿತ ಬದಲಾವಣೆಗಳಿಗೆ ಹೆಸರಾದ ಮಳೆಗಾಲವು ಯೋಜನೆಗಳನ್ನು ದಿಢೀರ್ ರದ್ದುಗೊಳಿಸುವ ಮೂಲಕ, ಪ್ರೀತಿಗೆ ಎರಡನೇ ಅವಕಾಶ ಹುಡುಕುತ್ತಿರುವವರಿಗೆ ತಮ್ಮ ಸಂಗಾತಿಯ ನಿಜವಾದ ವ್ಯಕ್ತಿತ್ವವನ್ನು ಅಳೆಯುವ ಅತ್ಯಮೂಲ್ಯ ಮಾಪಕವಾಗಿ ಪರಿಣಮಿಸುತ್ತದೆ. ಆರಂಭದ ದಿನಗಳಲ್ಲಿ ತೋರಿಸುವ ಶಾಂತತೆ ಮತ್ತು ತಾಳ್ಮೆ ಅಡಚಣೆಗಳು ಎದುರಾದಾಗಲೂ ಉಳಿಯುತ್ತದೆಯೇ ಅಥವಾ ಅವರು ಸಹನೆ ಕಳೆದುಕೊಳ್ಳುತ್ತಾರೆಯೇ ಎಂಬುದನ್ನು ಇಂತಹ ಸಣ್ಣಪುಟ್ಟ ಅಡೆತಡೆಗಳು ಸ್ಪಷ್ಟಪಡಿಸುತ್ತವೆ. ಅಧ್ಯಯನಗಳ ಪ್ರಕಾರ, ಶೇ. 50 ಕ್ಕಿಂತ ಹೆಚ್ಚು ವಿಚ್ಛೇದಿತ ಒಂಟಿ ಮನಸ್ಸುಗಳು ಪ್ಲಾನ್‌ಗಳು ರದ್ದಾದಾಗ ಸಂಗಾತಿಯು ಕೇವಲ ತಮ್ಮದೇ ನಿರಾಶೆಯನ್ನು ದೊಡ್ಡದು ಮಾಡುತ್ತಾರೋ ಅಥವಾ ಎದುರಿಗಿರುವವರ ಭಾವನೆಗಳಿಗೂ ಬೆಲೆ ನೀಡುತ್ತಾರೋ ಎಂಬುದನ್ನು ಸೂಕ್ಷ್ಮವಾಗಿ ಗಮನಿಸುತ್ತಾರಂತೆ. ಗತಕಾಲದ ದಾಂಪತ್ಯದಲ್ಲಿ ಏಳುಬೀಳುಗಳನ್ನು ಕಂಡಿರುವ ಇವರು, ಮುಂಗಾರು ತಂದೊಡ್ಡುವ ಇಂತಹ ಸನ್ನಿವೇಶಗಳನ್ನು ಬಳಸಿಕೊಂಡು ತಮ್ಮ ಹೊಸ ಸಂಗಾತಿಯ ಪ್ರತಿಯೊಂದು ಸಣ್ಣ ಭಾವನಾತ್ಮಕ ನಡವಳಿಕೆಯನ್ನು ಆಳವಾಗಿ ವಿಶ್ಲೇಷಿಸುತ್ತಾರೆ.

ಮೋಡಕವಿದ ಸಂಜೆಗಳು ಮನಸ್ಸಿನ ಆಳದಲ್ಲಡಗಿರುವ ಭಾವನೆಗಳನ್ನು ಹೊರಹಾಕಲು ಮತ್ತು ಆತ್ಮಾವಲೋಕನ ಮಾಡಿಕೊಳ್ಳಲು ವಿಶಿಷ್ಟವಾದ ಧೈರ್ಯ ತುಂಬುತ್ತವೆ. ಪ್ರೀತಿಗೆ ಎರಡನೇ ಅವಕಾಶ ಹುಡುಕುತ್ತಿರುವ ಅನೇಕರು ತಮ್ಮ ಗತಕಾಲದ ಕಹಿ ಅನುಭವಗಳು, ಬದಲಾದ ಆದ್ಯತೆಗಳು ಹಾಗೂ ಪೋಷಕರಾಗಿ ತಮ್ಮ ಮೇಲಿರುವ ಜವಾಬ್ದಾರಿಗಳ ಬಗ್ಗೆ ನಿರೀಕ್ಷೆಗಿಂತಲೂ ಬೇಗನೇ ಮುಕ್ತವಾಗಿ ಚರ್ಚಿಸಲು ಈ ವಾತಾವರಣ ಪ್ರೇರೇಪಿಸುತ್ತದೆ. ಸಾರ್ವಜನಿಕವಾಗಿ ನಂಬಲಾಗಿರುವಂತೆ ಇಂತಹ ಗಂಭೀರ ಸಂಭಾಷಣೆಗಳು ಬಾಂಧವ್ಯವನ್ನು ಸುಮ್ಮನೆ ಭಾವುಕ ಅಥವಾ ಸಂಕೀರ್ಣಗೊಳಿಸುವುದಿಲ್ಲ, ಬದಲಾಗಿ, ಸಂಬಂಧದಲ್ಲಿರಬಹುದಾದ ಅನಿಶ್ಚಿತತೆಯನ್ನು ಸಂಪೂರ್ಣವಾಗಿ ತೊಡೆದುಹಾಕಿ, ಮುಕ್ತ ಹಾಗೂ ಪಾರದರ್ಶಕ ಸಂವಹನಕ್ಕೆ ಭದ್ರ ಬುನಾದಿ ಹಾಕುತ್ತವೆ.

ಮಳೆಗಾಲವು ತರುವ ಆಹ್ಲಾದಕರ ವಾತಾವರಣವು ಮನಸ್ಸಿನ ಮೇಲಿರುವ ಎಲ್ಲವೂ ಪರಿಪೂರ್ಣವಾಗಿರಬೇಕು ಎಂಬ ಅನಗತ್ಯ ಒತ್ತಡವನ್ನು ಸಹಜವಾಗಿಯೇ ತಿಳಿಗೊಳಿಸುತ್ತದೆ. ಮಳೆಯಲ್ಲಿ ಒದ್ದೆಯಾಗುವ ಉಡುಪುಗಳು, ಕೆದರುವ ಕೂದಲು ಮತ್ತು ಕೊನೆಕ್ಷಣದಲ್ಲಿ ರದ್ದಾಗುವ ಪ್ಲಾನ್‌ಗಳಿಗೆ ಹೆಸರಾದ ಈ ಋತುವಿನಲ್ಲಿ ಯಾರೂ ಪರಿಪೂರ್ಣತೆಯನ್ನು ನಿರೀಕ್ಷಿಸುವುದಿಲ್ಲ, ಹೀಗಾಗಿ ಇಲ್ಲಿನ ಸಂಭಾಷಣೆಗಳು ಎದುರಿಗಿರುವವರನ್ನು ಮೆಚ್ಚಿಸುವುದಕ್ಕಿಂತ ಹೆಚ್ಚಾಗಿ 'ನೈಜತೆ'ಯಿಂದ ಕೂಡಿರುತ್ತವೆ. ಗತಕಾಲದ ಕಹಿ ಘಟನೆಗಳು ಹಾಗೂ ನೋವುಗಳನ್ನು ದಾಟಿ ಬಂದಿರುವ ವಿಚ್ಛೇದಿತ ಒಂಟಿ ಮನಸ್ಸುಗಳಿಗೆ ಯಾವುದೇ ಮುಖವಾಡವಿಲ್ಲದೆ ತಮ್ಮ ನೈಜ ವ್ಯಕ್ತಿತ್ವವನ್ನು ತೆರೆದಿಡಲು ಇದು ಸೂಕ್ತ ಸಮಯವಾಗಿದೆ. 'ರಿಬೌನ್ಸ್' ಮ್ಯಾಟ್ರಿಮೊನಿ ಆ್ಯಪ್‌ನ ದತ್ತಾಂಶಗಳ ಪ್ರಕಾರ, ಮಳೆಯಿಂದಾಗಿ ನೇರ ಭೇಟಿಗಳು ತಡವಾಗುವುದರಿಂದ ಈ ಅವಧಿಯಲ್ಲಿ ಡಿಜಿಟಲ್ ಸಂಭಾಷಣೆಗಳ ಸಮಯ ಸುದೀರ್ಘವಾಗಿರುತ್ತದೆ. ಇದು ಪ್ರದರ್ಶನಕಾರಿ ವ್ಯಕ್ತಿತ್ವವನ್ನು ಬದಿಗಿಟ್ಟು, ತಮ್ಮ ಭಾವನಾತ್ಮಕ ಮತ್ತು ನೈಜ ಮೃದು ಮಗ್ಗಲುಗಳನ್ನು ಪರಸ್ಪರ ಹಂಚಿಕೊಳ್ಳಲು ದಂಪತಿಗಳಿಗೆ ಪೂರ್ಣ ಅವಕಾಶ ನೀಡುತ್ತದೆ.

ಹಳೆಯ ಕಹಿ ನೆನಪುಗಳು ಅಥವಾ ಸೋತ ಬಾಂಧವ್ಯಗಳನ್ನು ಜೀವನದಿಂದ ಸಂಪೂರ್ಣವಾಗಿ ಅಳಿಸಿಹಾಕಲು ಸಾಧ್ಯವಿಲ್ಲ ಎಂಬುದನ್ನು 'ರಿಬೌನ್ಸ್' ದತ್ತಾಂಶಗಳು ಸ್ಪಷ್ಟವಾಗಿ ಎತ್ತಿಹಿಡಿಯುತ್ತವೆ. ಆದರೆ, ನಿಜವಾದ ನವಜೀವನ ಅಥವಾ ಪುನರ್ಜನ್ಮವೆಂದರೆ ಆ ಗತಕಾಲದ ಅನುಭವಗಳನ್ನು ಪ್ರಬುದ್ಧತೆಯಿಂದ ಒಪ್ಪಿಕೊಂಡು, ಬದುಕಿನಲ್ಲಿ ಹೊಸ ಸವಿ ನೆನಪುಗಳು ಹಾಗೂ ಹೊಸ ಸಂಬಂಧಗಳಿಗೆ ಜಾಗ ಮಾಡಿಕೊಡುವುದಾಗಿದೆ, (ಏಜೆನ್ಸೀಸ್​).