Moths: ಪ್ರಕೃತಿಯಲ್ಲಿ ಜೀವಿಗಳು ತಮ್ಮನ್ನು ತಾವು ರಕ್ಷಿಸಿಕೊಳ್ಳಲು ಹಲವು ವಿಚಿತ್ರ ತಂತ್ರಗಳನ್ನು ಅಳವಡಿಸಿಕೊಂಡಿವೆ. ಕೆಲವು ಜೀವಿಗಳು ಬಣ್ಣ ಬದಲಾಯಿಸುತ್ತವೆ, ಇನ್ನು ಕೆಲವು ವಿಷಕಾರಿ ದೇಹದ ಮೂಲಕ ಶತ್ರುಗಳನ್ನು ದೂರವಿಡುತ್ತವೆ. ಆದರೆ ಪತಂಗವೊಂದು ತನ್ನ ಜನನಾಂಗದ ಮೂಲಕವೇ ಶಬ್ದ ಹೊರಡಿಸಿ ಶತ್ರುವನ್ನು ಹೆದರಿಸುತ್ತದೆ ಎಂದರೆ ನಂಬುತ್ತೀರಾ? ಹೌದು, ಬಾವಲಿಗಳ ದಾಳಿಯಿಂದ ತಪ್ಪಿಸಿಕೊಳ್ಳಲು ಕೆಲವು ಜಾತಿಯ ಗಿಡುಗ ಪತಂಗಗಳು ಇಂತಹ ವಿಚಿತ್ರ ರಕ್ಷಣಾ ತಂತ್ರವನ್ನು ವಿಕಸನಗೊಳಿಸಿಕೊಂಡಿವೆ ಎಂದು ಹೊಸ ಸಂಶೋಧನೆಯೊಂದು ತಿಳಿಸಿದೆ.
ರಾತ್ರಿಯ ವೇಳೆ ಬೇಟೆಯಾಡುವ ಬಾವಲಿಗಳು ತಮ್ಮ ಬೇಟೆಯನ್ನು ಪತ್ತೆಹಚ್ಚಲು ಎಖೋಲೊಕೇಶನ್ ಎಂಬ ತಂತ್ರವನ್ನು ಬಳಸುತ್ತವೆ. ಇವು ಅಲ್ಟ್ರಾಸಾನಿಕ್ ಶಬ್ದದ ಅಲೆಗಳನ್ನು ಹೊರಡಿಸಿ, ಅವು ವಸ್ತುಗಳಿಗೆ ತಾಗಿ ಹಿಂತಿರುಗುವ ಪ್ರತಿಧ್ವನಿಯ ಮೂಲಕ ಬೇಟೆಯ ಇರುವಿಕೆಯನ್ನು ಗುರುತಿಸುತ್ತವೆ. ಹೀಗಾಗಿ ಹಾರಾಡುವ ಪತಂಗಗಳು ಬಾವಲಿಗಳಿಗೆ ಸುಲಭದ ಆಹಾರವಾಗುವ ಅಪಾಯವಿರುತ್ತದೆ. ಇದರಿಂದ ತಪ್ಪಿಸಿಕೊಳ್ಳಲು ಕೆಲವು ಗಿಡುಗ ಪತಂಗಗಳು ಅಲ್ಟ್ರಾಸಾನಿಕ್ ಶಬ್ದಗಳನ್ನು ಉತ್ಪಾದಿಸುವ ಸಾಮರ್ಥ್ಯ ಬೆಳೆಸಿಕೊಂಡಿವೆ. ವಿಶೇಷವೆಂದರೆ, ಈ ಶಬ್ದವನ್ನು ಬಾಯಿಯಿಂದ ಅಥವಾ ರೆಕ್ಕೆಗಳಿಂದಲ್ಲ, ಜನನಾಂಗದ ವಿಶೇಷ ರಚನೆಗಳನ್ನು ಬಳಸಿ ಹೊರಡಿಸುತ್ತವೆ.
ಫ್ಲೋರಿಡಾ ಮ್ಯೂಸಿಯಂ ಆಫ್ ನ್ಯಾಚುರಲ್ ಹಿಸ್ಟರಿಯ ಕೀಟಶಾಸ್ತ್ರಜ್ಞ ಪಾಲ್ ಮ್ಯಾಸೋನಿಕ್ ನೇತೃತ್ವದ ಸಂಶೋಧಕರು ನಡೆಸಿದ ಅಧ್ಯಯನದಲ್ಲಿ ಈ ಸಂಗತಿ ಬೆಳಕಿಗೆ ಬಂದಿದೆ. ಸುಮಾರು 3 ಕೋಟಿ ವರ್ಷಗಳ ವಿಕಾಸದ ಅವಧಿಯಲ್ಲಿ ವಿವಿಧ ಗಿಡುಗ ಪತಂಗಗಳ ಪ್ರಭೇದಗಳಲ್ಲಿ ಈ ಸಾಮರ್ಥ್ಯ ಸ್ವತಂತ್ರವಾಗಿ ಏಳು ಬಾರಿ ವಿಕಸನಗೊಂಡಿರಬಹುದು ಎಂದು ಸಂಶೋಧಕರು ಗುರುತಿಸಿದ್ದಾರೆ. ಇದಲ್ಲದೆ, ಶಬ್ದ ಉತ್ಪಾದಿಸಲು ಕನಿಷ್ಠ ಮೂರು ವಿಭಿನ್ನ ಅಂಗರಚನಾ ವಿಧಾನಗಳು ರೂಪುಗೊಂಡಿರುವುದನ್ನೂ ಅಧ್ಯಯನ ವಿವರಿಸಿದೆ. ಅಂದರೆ, ಒಂದೇ ರೀತಿಯ ರಕ್ಷಣಾ ತಂತ್ರವನ್ನು ಪ್ರಕೃತಿ ವಿವಿಧ ಜೀವಿಗಳಲ್ಲಿ ಮತ್ತೆ ಮತ್ತೆ ಸೃಷ್ಟಿಸಿದೆ.
ಈ ಪ್ರಕ್ರಿಯೆಯನ್ನು ಸ್ಟ್ರಿಡ್ಯುಲೇಷನ್ ಎಂದು ಕರೆಯಲಾಗುತ್ತದೆ. ಅಂದರೆ ದೇಹದ ಎರಡು ಭಾಗಗಳನ್ನು ಒಂದಕ್ಕೊಂದು ಉಜ್ಜುವ ಮೂಲಕ ಶಬ್ದವನ್ನು ಉತ್ಪಾದಿಸುವ ವಿಧಾನ. ಸಾಮಾನ್ಯವಾಗಿ ಕ್ರಿಕೆಟ್ ಕೀಟಗಳು ರೆಕ್ಕೆಗಳನ್ನು ಉಜ್ಜಿ ಶಬ್ದ ಮಾಡುವುದನ್ನು ನೀವು ನೋಡಿರಬಹುದು. ಅದೇ ರೀತಿಯ ತಂತ್ರವನ್ನು ಈ ಪತಂಗಗಳು ಬಳಸುತ್ತವೆ.ಗಂಡು ಗಿಡುಗ ಪತಂಗಗಳ ಜನನಾಂಗದಲ್ಲಿರುವ ವಾಲ್ವೆ (Valvae) ಎಂಬ ವಿಶೇಷ ರಚನೆಗಳ ಮೇಲೆ ಸೂಕ್ಷ್ಮ ಮಾಪಕಗಳಂತಹ ಅಂಗಾಂಶಗಳಿರುತ್ತವೆ. ಇವುಗಳನ್ನು ಹೊಟ್ಟೆಯ ಭಾಗದಲ್ಲಿರುವ ವಿಶೇಷ ಮೇಲ್ಮೈಗೆ ಉಜ್ಜಿದಾಗ ಅಲ್ಟ್ರಾಸಾನಿಕ್ ಶಬ್ದದ ಸ್ಫೋಟಕ ಅಲೆಗಳು ಉತ್ಪತ್ತಿಯಾಗುತ್ತವೆ.
ಈ ಶಬ್ದಗಳು ಬಾವಲಿಗಳ ಎಖೋಲೊಕೇಶನ್ ವ್ಯವಸ್ಥೆಗೆ ಅಡ್ಡಿಪಡಿಸುವ ಸಾಧ್ಯತೆಯಿದೆ. ಬಾವಲಿ ಪತಂಗದ ಹತ್ತಿರ ಬಂದಾಗ ಇವು ಹೊರಡಿಸುವ ಅಲ್ಪಾವಧಿಯ ಶಬ್ದಗಳು ಅದನ್ನು ಬೆಚ್ಚಿಬೀಳಿಸಿ, ಪತಂಗಕ್ಕೆ ತಪ್ಪಿಸಿಕೊಳ್ಳಲು ಅವಕಾಶ ನೀಡಬಹುದು ಎಂದು ಸಂಶೋಧಕರು ಅಭಿಪ್ರಾಯಪಟ್ಟಿದ್ದಾರೆ.ಇನ್ನೊಂದು ಸಾಧ್ಯತೆಯೆಂದರೆ, ಕೆಲವು ವಿಷಕಾರಿ ಅಥವಾ ತಿನ್ನಲು ಅಹಿತಕರವಾದ ಪತಂಗಗಳು ಬಾವಲಿಗಳಿಗೆ ಎಚ್ಚರಿಕೆ ನೀಡಲು ಅಲ್ಟ್ರಾಸಾನಿಕ್ ಸಂಕೇತಗಳನ್ನು ಬಳಸುತ್ತವೆ. ಸಾಮಾನ್ಯವಾಗಿ ಬಾವಲಿಗಳಿಗೆ ಆಹಾರವಾಗಬಹುದಾದ ಗಿಡುಗ ಪತಂಗಗಳು ಕೂಡ ಇದೇ ರೀತಿಯ ಶಬ್ದಗಳನ್ನು ಅನುಕರಿಸಿ ಬೇಟೆಯಿಂದ ತಪ್ಪಿಸಿಕೊಳ್ಳಲು ಪ್ರಯತ್ನಿಸುತ್ತಿರಬಹುದು.
ಈ ಶಬ್ದಗಳು ತಮ್ಮದೇ ಜಾತಿಯ ಪತಂಗಗಳನ್ನು ಗುರುತಿಸಲು ಮತ್ತು ಸಂಗಾತಿಯನ್ನು ಆಕರ್ಷಿಸಲು ಸಹಾಯ ಮಾಡುತ್ತಿರಬಹುದೆಂಬ ಮತ್ತೊಂದು ಸಾಧ್ಯತೆಯನ್ನೂ ಸಂಶೋಧಕರು ಮುಂದಿಟ್ಟಿದ್ದಾರೆ. ಆದರೆ ಈ ವಿಚಾರಕ್ಕೆ ಇನ್ನಷ್ಟು ಅಧ್ಯಯನದ ಅಗತ್ಯವಿದೆ.ಪ್ರಕೃತಿಯಲ್ಲಿ ಬದುಕುಳಿಯುವ ಹೋರಾಟ ಎಷ್ಟು ವಿಚಿತ್ರವಾದ ವಿಕಾಸಕ್ಕೆ ಕಾರಣವಾಗಬಹುದು ಎಂಬುದಕ್ಕೆ ಈ ಪತಂಗಗಳೇ ಕುತೂಹಲಕಾರಿ ಉದಾಹರಣೆ. ಈ ಸಂಶೋಧನೆಯು ಪ್ರಾಸಿಡಿಂಗ್ಸ್ ಆಫ್ ದಿ ರಾಯಲ್ ಸೊಸೈಟಿ ಬಿ: ಬಯೋಲಾಜಿಕಲ್ ಸೈನ್ಸಸ್ಎಂಬ ವೈಜ್ಞಾನಿಕ ಜರ್ನಲ್‌ನಲ್ಲಿ ಪ್ರಕಟವಾಗಿದೆ, (ಏಜೆನ್ಸೀಸ್).