ಬೆಂಗಳೂರು: ಇಂದಿನ ಡಿಜಿಟಲ್ ಯುಗದಲ್ಲಿ ಮೊಬೈಲ್ ಮತ್ತು ಲ್ಯಾಪ್ಟಾಪ್ಗಳು ನಮ್ಮ ಜೀವನದ ಅವಿಭಾಜ್ಯ ಅಂಗ. ಕೆಲಸದ ಅವಸರದಲ್ಲೋ ಅಥವಾ ಸೋಮಾರಿತನದಿಂದಲೋ ನಾವು ಮಾಡುವ ಒಂದು ಸಾಮಾನ್ಯ ಅಭ್ಯಾಸವೆಂದರೆ ಚಾರ್ಜರ್ ಅನ್ನು ಯಾವಾಗಲೂ ಪವರ್ ಸಾಕೆಟ್ನಲ್ಲೇ ಬಿಡುವುದು. ಸಾಧನವನ್ನು ಚಾರ್ಜ್ ಮಾಡಿ ತೆಗೆದ ನಂತರವೂ ಸ್ವಿಚ್ ಆಫ್ ಮಾಡದೆ ಅಥವಾ ಪ್ಲಗ್ ತೆಗೆಯದೆ ಹಾಗೆಯೇ ಬಿಡುವುದು ಎಷ್ಟು ಸುರಕ್ಷಿತ? ಇದರಿಂದ ಸಾಧನಗಳಿಗೆ ಅಥವಾ ಮನೆಯ ಸುರಕ್ಷತೆಗೆ ತೊಂದರೆಯಿದೆಯೇ? ಈ ಕುರಿತಾದ ಆಸಕ್ತಿದಾಯಕ ಮಾಹಿತಿ ಇಲ್ಲಿದೆ.
ಆಧುನಿಕ ಚಾರ್ಜರ್ಗಳು 'ಸ್ಮಾರ್ಟ್'
ಅನೇಕರಲ್ಲಿ ಒಂದು ಆತಂಕವಿರುತ್ತದೆ: ಚಾರ್ಜರ್ ಅನ್ನು ಪ್ಲಗ್ ಇನ್ ಮಾಡಿಟ್ಟರೆ ಅಥವಾ ರಾತ್ರಿಯಿಡೀ ಫೋನ್ ಚಾರ್ಜ್ ಮಾಡಿದರೆ ಬ್ಯಾಟರಿ ಹಾಳಾಗುತ್ತದೆಯೇ? ಇದಕ್ಕೆ ಉತ್ತರ 'ಇಲ್ಲ'. ಇಂದಿನ ಆಧುನಿಕ ಚಾರ್ಜರ್ಗಳು ಮತ್ತು ಸ್ಮಾರ್ಟ್ಫೋನ್ಗಳು ಅತ್ಯಂತ ತಂತ್ರಜ್ಞಾನವನ್ನು ಹೊಂದಿವೆ. ಒಮ್ಮೆ ನಿಮ್ಮ ಸಾಧನದ ಬ್ಯಾಟರಿ ಪೂರ್ಣಗೊಂಡರೆ (100%), ಚಾರ್ಜರ್ ಸ್ವಯಂಚಾಲಿತವಾಗಿ ವಿದ್ಯುತ್ ಹರಿವನ್ನು(ಫಾಸ್ಟ್ ಚಾರ್ಜರ್) ಕಡಿಮೆ ಮಾಡುತ್ತದೆ ಅಥವಾ ಸ್ಥಗಿತಗೊಳಿಸುತ್ತದೆ. ಇದರಿಂದಾಗಿ 'ಓವರ್ ಚಾರ್ಜಿಂಗ್' ಎಂಬ ಸಮಸ್ಯೆ ಕಾಡುವುದಿಲ್ಲ.
ನಿಮ್ಮ ಅರಿವಿಲ್ಲದೆ ವ್ಯರ್ಥವಾಗುವ ವಿದ್ಯುತ್!
ಚಾರ್ಜರ್ ಅನ್ನು ಫೋನ್ಗೆ ಸಂಪರ್ಕಿಸದೆ ಕೇವಲ ಸ್ವಿಚ್ ಆನ್ ಮಾಡಿ ಸಾಕೆಟ್ನಲ್ಲಿ ಬಿಟ್ಟರೂ ಅದು ಅಲ್ಪ ಪ್ರಮಾಣದ ವಿದ್ಯುತ್ ಅನ್ನು ಬಳಸುತ್ತಿರುತ್ತದೆ. ಇದನ್ನು ತಾಂತ್ರಿಕ ಭಾಷೆಯಲ್ಲಿ 'ವ್ಯಾಂಪೈರ್ ಎನರ್ಜಿ' (Vampire Energy) ಅಥವಾ ಸ್ಟ್ಯಾಂಡ್ಬೈ ಪವರ್ ಎಂದು ಕರೆಯಲಾಗುತ್ತದೆ. ಇದು ಕೇವಲ ಕೆಲವು ವ್ಯಾಟ್ಗಳಷ್ಟೇ ಇರಬಹುದು. ಆದರೆ ತಿಂಗಳುಗಟ್ಟಲೆ ಅಥವಾ ವರ್ಷಗಟ್ಟಲೆ ಹೀಗೆಯೇ ಬಿಟ್ಟರೆ, ನಿಮ್ಮ ವಿದ್ಯುತ್ ಬಿಲ್ನಲ್ಲಿ ಸಣ್ಣ ಮಟ್ಟದ ಏರಿಕೆ ಕಂಡುಬರುವುದು ಖಚಿತ. ಪರಿಸರ ಪ್ರೇಮಿಗಳು ಮತ್ತು ಇಂಧನ ಉಳಿತಾಯದ ಬಗ್ಗೆ ಕಾಳಜಿ ಇರುವವರು ಈ ಅಭ್ಯಾಸವನ್ನು ಬಿಡುವುದು ಸೂಕ್ತ.
ಶಾಖ ಮತ್ತು ಚಾರ್ಜರ್ ಆಯಸ್ಸು
ಚಾರ್ಜರ್ಗಳು ಕೆಲಸ ಮಾಡುವಾಗ ಬಿಸಿಯಾಗುವುದು ಸಹಜ. ಆದರೆ ಸದಾ ಪ್ಲಗ್ ಇನ್ ಮಾಡಿಡುವುದರಿಂದ ಅವುಗಳಲ್ಲಿ ನಿರಂತರವಾಗಿ ಅಲ್ಪ ಪ್ರಮಾಣದ ಉಷ್ಣತೆ ಉತ್ಪತ್ತಿಯಾಗುತ್ತಿರುತ್ತದೆ. ಇದು ಚಾರ್ಜರ್ನ ಒಳಗಿನ ಬಿಡಿಭಾಗಗಳ ಆಯಸ್ಸನ್ನು ಕಡಿಮೆ ಮಾಡಬಹುದು. ವಿಶೇಷವಾಗಿ ನೀವು ಕಡಿಮೆ ಗುಣಮಟ್ಟದ ಅಥವಾ ನಾನ್-ಬ್ರಾಂಡೆಡ್ ಚಾರ್ಜರ್ಗಳನ್ನು ಬಳಸುತ್ತಿದ್ದರೆ, ಅವುಗಳಲ್ಲಿನ ದೋಷಯುಕ್ತ ಸರ್ಕ್ಯೂಟ್ಗಳಿಂದಾಗಿ ಬೆಂಕಿ ಅವಘಡಗಳು ಸಂಭವಿಸುವ ಸಾಧ್ಯತೆಯೂ ಇರುತ್ತದೆ.
ಸುರಕ್ಷತೆಯ ದೃಷ್ಟಿಯಿಂದ ಎಚ್ಚರಿಕೆ ಅಗತ್ಯ
ಮನೆಯಲ್ಲಿ ಸಣ್ಣ ಮಕ್ಕಳಿದ್ದರೆ ಅಥವಾ ಸಾಕುಪ್ರಾಣಿಗಳಿದ್ದರೆ ಸಾಕೆಟ್ನಲ್ಲಿ ಹಾಗೆಯೇ ಬಿಟ್ಟಿರುವ ಚಾರ್ಜರ್ ವೈರ್ಗಳು ಅಪಾಯ ತರಬಹುದು. ನೀರಿನ ಸಂಪರ್ಕ ಇರುವ ಜಾಗದಲ್ಲಿ ಅಥವಾ ಸುಲಭವಾಗಿ ಬೆಂಕಿ ಹತ್ತಿಕೊಳ್ಳುವ ವಸ್ತುಗಳ ಹತ್ತಿರ ಚಾರ್ಜರ್ ಬಿಡುವುದು ಅಪಾಯಕಾರಿ. ಉತ್ತಮ ಗುಣಮಟ್ಟದ ಬ್ರಾಂಡೆಡ್ ಚಾರ್ಜರ್ಗಳಲ್ಲಿ ಸುರಕ್ಷತಾ ವ್ಯವಸ್ಥೆ ಇರುತ್ತದೆಯಾದರೂ, ಮುನ್ನೆಚ್ಚರಿಕೆ ವಹಿಸುವುದು ಯಾವಾಗಲೂ ಒಳ್ಳೆಯದು.
ಅನುಸರಿಸಬೇಕಾದ ಉತ್ತಮ ಅಭ್ಯಾಸಗಳು:
ಕೆಲಸ ಮುಗಿದ ತಕ್ಷಣ ಪ್ಲಗ್ ತೆಗೆಯಿರಿ: ಫೋನ್ ಚಾರ್ಜ್ ಆದ ತಕ್ಷಣ ಚಾರ್ಜರ್ ಅನ್ನು ಸಾಕೆಟ್ನಿಂದ ತೆಗೆಯುವ ಹವ್ಯಾಸ ಬೆಳೆಸಿಕೊಳ್ಳಿ.
ಬ್ರಾಂಡೆಡ್ ಚಾರ್ಜರ್ ಬಳಸಿ: ನಿಮ್ಮ ಸಾಧನದ ಜೊತೆಗೆ ಬಂದಿರುವ ಅಥವಾ ಅಧಿಕೃತ ಕಂಪನಿಯ ಚಾರ್ಜರ್ಗಳನ್ನೇ ಬಳಸಿ.
ಪ್ರಯಾಣದ ವೇಳೆ ಎಚ್ಚರ: ಮನೆಯಿಂದ ಹೊರ ಹೋಗುವಾಗ ಅಥವಾ ಪ್ರವಾಸಕ್ಕೆ ಹೋಗುವಾಗ ಎಲ್ಲ ಚಾರ್ಜರ್ಗಳನ್ನು ಅನ್ಪ್ಲಗ್ ಮಾಡುವುದನ್ನು ಮರೆಯಬೇಡಿ.
ಒಟ್ಟಾರೆಯಾಗಿ ಹೇಳುವುದಾದರೆ, ಚಾರ್ಜರ್ ಅನ್ನು ಸಾಕೆಟ್ನಲ್ಲಿ ಬಿಡುವುದರಿಂದ ತಕ್ಷಣಕ್ಕೆ ಯಾವುದೇ ದೊಡ್ಡ ಹಾನಿ ಸಂಭವಿಸದಿದ್ದರೂ, ದೀರ್ಘಕಾಲದ ದೃಷ್ಟಿಯಿಂದ ಅನ್ಪ್ಲಗ್ ಮಾಡುವುದು ಜಾಣತನದ ಕ್ರಮ. ಇದು ವಿದ್ಯುತ್ ಉಳಿತಾಯ ಮಾಡುವುದಲ್ಲದೆ, ನಿಮ್ಮ ಮನೆ ಮತ್ತು ಸಾಧನಗಳ ಸುರಕ್ಷತೆಯನ್ನು ಹೆಚ್ಚಿಸುತ್ತದೆ,(ಏಜೆನ್ಸೀಸ್).