ಸಾಮಾನ್ಯವಾಗಿ ಸಬ್ಬಸಿಗೆ ಸೊಪ್ಪಿನ ಪರಿಚಯ ಎಲ್ಲರಿಗೂ ಇರುತ್ತದೆ. ಇತರ ಹಸಿರು ಸೊಪ್ಪುಗಳಂತಿರದೆ ವಿಭಿನ್ನವಾಗಿರುವ ಇದರ ಎಲೆಗಳು ಅಗಲವಾಗಿರದೆ ಸಣ್ಣ ಕಡ್ಡಿಗಳಂತೆ ನೀಳವಾಗಿರುತ್ತವೆ. ಇದರ ವೈಜ್ಞಾನಿಕ ಹೆಸರು ಅನೆಥಮ್ ಗ್ರಾವೆಲನ್ಸ್. ಈ ಸೊಪ್ಪಿನ ಪ್ರತಿ ಭಾಗವೂ ಪರಿಮಳದಿಂದ ಕೂಡಿರುವ ಕಾರಣ ಕೆಲವರಿಗೆ ಇಷ್ಟವಾಗುವುದಿಲ್ಲ. ಸಾಂಬಾರು, ಪಲ್ಯ, ಪಲಾವ್ಗಳಲ್ಲಿ ಪರಿಮಳಕ್ಕಾಗಿ ಇದನ್ನು ಬಳಸುತ್ತಾರೆ. ಇದರಿಂದ ಇನ್ನೂ ಬೇರೆ ಬೇರೆ ಬಗೆಯ ಅಡುಗೆಗಳನ್ನೂ ಮಾಡುತ್ತಾರೆ. ಸಬ್ಬಸಿಗೆ ಬೀಜಗಳನ್ನು ಸಾಂಬಾರಿನಲ್ಲಿ ಬಳಸುತ್ತಾರೆ. ಅನೇಕ ಪೋಷಕಾಂಶಗಳನ್ನು ಹೊಂದಿರುವುದರಿಂದ ಹತ್ತು ಹಲವಾರು ರೋಗಗಳನ್ನು ವಾಸಿಮಾಡುವ ಗುಣಗಳನ್ನು ಸಬ್ಬಸಿಗೆ ಸೊಪ್ಪು ಹೊಂದಿದೆ.
* ಪ್ರತಿನಿತ್ಯ ಆಹಾರದಲ್ಲಿ ಸಬ್ಬಸಿಗೆ ಸೊಪ್ಪಿನ ಬಳಕೆ ಮಾಡುವುದರಿಂದ ನಿದ್ರಾಹೀನತೆಯ ಸಮಸ್ಯೆ ಉಂಟಾಗುವುದಿಲ್ಲ.* ಗಾಯಕ್ಕೆ ಸಬ್ಬಸಿಗೆ ಸೊಪ್ಪಿನ ರಸ ಹಚ್ಚುವುದರಿಂದ ರಕ್ತಸ್ರಾವ ನಿಲ್ಲುವುದರ ಜತೆಗೆ ಗಾಯವೂ ಬೇಗನೆ ವಾಸಿಯಾಗುತ್ತದೆ.* ಸಬ್ಬಸಿಗೆ ಸೊಪ್ಪಿನ ರಸಕ್ಕೆ ಜೇನುತುಪ್ಪ ಬೆರೆಸಿ ಸೇವಿಸುವುದರಿಂದ ಅಜೀರ್ಣದಿಂದುಂಟಾದ ಹೊಟ್ಟೆನೋವು ನಿವಾರಣೆಯಾಗುತ್ತದೆ.* ಅರಿಶಿಣದ ಜತೆ ಸಬ್ಬಸಿಗೆ ಸೊಪ್ಪನ್ನು ಅರೆದು ಅಲರ್ಜಿಯುಂಟಾದ ಚರ್ಮದ ಭಾಗಕ್ಕೆ ಹಚ್ಚುವುದರಿಂದ ಅದು ಕಡಿಮೆಯಾಗುತ್ತದೆ.* ಸಬ್ಬಸಿಗೆ ಸೊಪ್ಪಿನ ಜತೆ ಮೆಂತೆ ಸೇರಿಸಿ, ತುಪ್ಪದಲ್ಲಿ ಹುರಿಯಬೇಕು. ಅದಕ್ಕೆ ಒಣಮೆಣಸು, ಕಾಯಿತುರಿ, ಉಪ್ಪು, ಸಾಸಿವೆ ಸೇರಿಸಿ ಚಟ್ನಿಪುಡಿ ಮಾಡಬೇಕು. ಅದನ್ನು ಅನ್ನದಲ್ಲಿ ಮಜ್ಜಿಗೆಯೊಂದಿಗೆ ಕಲಸಿ ಉಣ್ಣುವುದರಿಂದ ಜೀರ್ಣಕ್ರಿಯೆ ಸರಾಗವಾಗುತ್ತದೆ.* ಹೆರಿಗೆಯಾದವರು ಸಬ್ಬಸಿಗೆ ಸೊಪ್ಪನ್ನು ಆಹಾರದಲ್ಲಿ ಬಳಸುವುದರಿಂದ ಹಾಲಿನ ಪ್ರಮಾಣ ವೃದ್ಧಿಸುತ್ತದೆ. ಅಲ್ಲದೆ ಇದು ಆರೋಗ್ಯಕ್ಕೂ ತುಂಬ ಒಳ್ಳೆಯದು.* ಆಹಾರಪದಾರ್ಥದಲ್ಲಿ ಸಬ್ಬಸಿಗೆ ಸೊಪ್ಪನ್ನು ಅಳವಡಿಸಿಕೊಳ್ಳುವುದರಿಂದ ಅದರಲ್ಲಿರುವ ಕ್ಯಾಲ್ಸಿಯಂ ಅಂಶವು ಮೂಳೆಗಳನ್ನು ಬಲಪಡಿಸುತ್ತದೆ.* ಪ್ರತಿನಿತ್ಯವೂ ಆಹಾರದ ರೂಪದಲ್ಲಿ ಸಬ್ಬಸಿಗೆ ಸೊಪ್ಪನ್ನು ಸೇವಿಸುವುದರಿಂದ ಅನಿಯಮಿತ ಋತುಚಕ್ರದ ಸಮಸ್ಯೆ ನಿವಾರಣೆಯಾಗುತ್ತದೆ.* ದೈನಂದಿನ ಆಹಾರದಲ್ಲಿ ಸಬ್ಬಸಿಗೆ ಸೊಪ್ಪಿನ ಬಳಕೆಯನ್ನು ಹೆಚ್ಚಿಸಿದಲ್ಲಿ ಪದೇಪದೆ ಬಿಕ್ಕಳಿಕೆ ಬರುವುದನ್ನು ನಿಯಂತ್ರಿಸಬಹುದು.* ಮಧುಮೇಹಿಗಳು ಸಬ್ಬಸಿಗೆ ಸೊಪ್ಪನ್ನು ಬಳಸುವುದರಿಂದ, ರಕ್ತದಲ್ಲಿನ ಸಕ್ಕರೆ ಪ್ರಮಾಣವನ್ನು ನಿಯಂತ್ರಣದಲ್ಲಿಡಬಹುದು.