ಚಳಿಗಾಲದ ಸೈಲೆಂಟ್ ಕಿಲ್ಲರ್: ನೀರು ಕಡಿಮೆ ಕುಡಿದರೆ ಮೆದುಳು ಕುಗ್ಗುತ್ತದೆಯೇ? ಆರೋಗ್ಯ ತಜ್ಞರ ಎಚ್ಚರಿಕೆ ಹೀಗಿದೆ... Dehydration

Winter: ಬೇಸಿಗೆಯಲ್ಲಿ ಅತಿಯಾದ ಬೆವರುವಿಕೆ ಮತ್ತು ಬಾಯಾರಿಕೆಯಿಂದಾಗಿ ನಾವು ನಿರಂತರವಾಗಿ ನೀರನ್ನು ಕುಡಿಯುತ್ತಾ ಇರುತ್ತೇವೆ. ಆದರೆ ಚಳಿಗಾಲ ಆರಂಭವಾಗುತ್ತಿದ್ದಂತೆ ನಮ್ಮ ನೀರಿನ ಸೇವನೆ ಗಣನೀಯವಾಗಿ ಕಡಿಮೆಯಾಗುತ್ತದೆ. ಚಳಿಗಾಲದಲ್ಲಿ ಬಾಯಾರಿಕೆಯ ಅನುಭವ ಕಡಿಮೆಯಾಗೂವ ಜತೆಗೆ ವಾತಾವರಣದ ತಂಪಿನಿಂದಾಗಿ ದೇಹಕ್ಕೆ ನೀರಿನ ಅಗತ್ಯವಿಲ್ಲ ಎಂದು ನಾವು ಭಾವಿಸುತ್ತೇವೆ. ಆದರೆ ಇದು ಮೆದುಳಿನ ಕಾರ್ಯಕ್ಷಮತೆಯ ಮೇಲೆ ಗಂಭೀರ ಪರಿಣಾಮ ಬೀರುವ ಒಂದು ಗುಪ್ತ ಅಪಾಯ ಎನ್ನುತ್ತಾರೆ ಆರೋಗ್ಯ ತಜ್ಞರು.

ನಮ್ಮ ಮೆದುಳಿನ ಸುಮಾರು 75% ರಿಂದ 80% ಭಾಗ ನೀರಿನಾಂಶದಿಂದ ಕೂಡಿದೆ. ದೇಹದಲ್ಲಿ ನೀರಿನ ಪ್ರಮಾಣ ಸ್ವಲ್ಪ ಕಡಿಮೆಯಾದರೂ ಅದರ ನೇರ ಪರಿಣಾಮ ಮೆದುಳಿನ ಕೋಶಗಳ ಮೇಲೆ ಉಂಟಾಗುತ್ತದೆ. ಚಳಿಗಾಲದ ನಿರ್ಜಲೀಕರಣವು ಈ ಕೆಳಗಿನ ಸಮಸ್ಯೆಗಳಿಗೆ ಕಾರಣವಾಗಬಹುದು:

ದೇಹದಲ್ಲಿ ನೀರಿನಾಂಶ ಕಡಿಮೆಯಾದಾಗ ಮೆದುಳಿಗೆ ರಕ್ತ ಪರಿಚಲನೆ ನಿಧಾನವಾಗುತ್ತದೆ. ಇದರಿಂದಾಗಿ ಗಮನ ಕೇಂದ್ರೀಕರಿಸಲು ತೊಂದರೆ, ಗೊಂದಲ ಮತ್ತು ಕೆಲಸದಲ್ಲಿ ಆಲಸ್ಯ ಉಂಟಾಗುತ್ತದೆ.

ಸಂಶೋಧನೆಗಳ ಪ್ರಕಾರ, ಕೇವಲ 1% ರಿಂದ 2% ರಷ್ಟು ನಿರ್ಜಲೀಕರಣ ಉಂಟಾದರೂ ಅಲ್ಪಕಾಲಿಕ ಜ್ಞಾಪಕಶಕ್ತಿಯ ಮೇಲೆ ನಕಾರಾತ್ಮಕ ಪರಿಣಾಮ ಬೀರುತ್ತದೆ.

ಮೆದುಳಿನ ಸುತ್ತಲಿನ ದ್ರವದ ಮಟ್ಟ ಕಡಿಮೆಯಾದಾಗ ಮೆದುಳು ತಲೆಬುರುಡೆಯಿಂದ ಸ್ವಲ್ಪ ಸಂಕುಚಿತಗೊಳ್ಳುತ್ತದೆ. ಇದು ತೀವ್ರ ತಲೆನೋವು ಮತ್ತು ಮಾನಸಿಕ ಕಿರಿಕಿರಿಯನ್ನು ಉಂಟುಮಾಡುತ್ತದೆ.

ನೀರು ಸರಿಯಾಗಿ ಕುಡಿಯದಿದ್ದರೆ ಹಾರ್ಮೋನ್ ಸಮತೋಲನ ತಪ್ಪಿ, ಕಾರಣವಿಲ್ಲದೆ ಕೋಪ ಬರುವುದು ಅಥವಾ ಆತಂಕಕ್ಕೆ ಒಳಗಾಗುವ ಸಾಧ್ಯತೆ ಇರುತ್ತದೆ.

ಚಳಿಗಾಲದಲ್ಲಿ ನಮ್ಮ ದೇಹದ ಬಾಯಾರಿಕೆಯ ಸಂಕೇತ ಸುಮಾರು 40% ರಷ್ಟು ಕಡಿಮೆಯಾಗುತ್ತದೆ. ತಣ್ಣನೆಯ ಗಾಳಿಯಿಂದಾಗಿ ದೇಹವು ತನ್ನ ಉಷ್ಣತೆಯನ್ನು ಕಾಪಾಡಿಕೊಳ್ಳಲು ರಕ್ತವನ್ನು ಕೇಂದ್ರ ಭಾಗಕ್ಕೆ ಕಳುಹಿಸುತ್ತದೆ, ಇದರಿಂದಾಗಿ ಮೆದುಳು ದೇಹಕ್ಕೆ ನೀರಿನ ಅಗತ್ಯವಿದೆ ಎಂಬ ಸಂಕೇತವನ್ನು ನೀಡುವುದಿಲ್ಲ. ಅಲ್ಲದೆ, ನಾವು ಧರಿಸುವ ಉಣ್ಣೆಯ ಬಟ್ಟೆಗಳು ಮತ್ತು ರೂಮ್ ಹೀಟರ್‌ಗಳು ನಮಗೆ ತಿಳಿಯದಂತೆ ಚರ್ಮದ ಮೂಲಕ ತೇವಾಂಶವನ್ನು ಹೊರಹಾಕುತ್ತವೆ.

ಬಾಯಾರಿಕೆಯಾಗುವವರೆಗೆ ಕಾಯಬೇಡಿ. ಪ್ರತಿ ಗಂಟೆಗೊಮ್ಮೆ ಕನಿಷ್ಠ ಒಂದು ಲೋಟ ನೀರು ಕುಡಿಯುವ ಅಭ್ಯಾಸ ಮಾಡಿಕೊಳ್ಳಿ.

ಚಳಿಗಾಲದಲ್ಲಿ ತಣ್ಣೀರು ಕುಡಿಯಲು ಕಷ್ಟವೆನಿಸಿದರೆ, ಉಗುರುಬೆಚ್ಚಗಿನ ನೀರನ್ನು ಕುಡಿಯಿರಿ. ಇದು ಜೀರ್ಣಕ್ರಿಯೆಗೂ ಸಹಕಾರಿ.

ಕಿತ್ತಳೆ, ಸೇಬು ಮತ್ತು ಹಸಿರು ತರಕಾರಿಗಳಲ್ಲಿ ನೀರಿನಂಶ ಹೆಚ್ಚಿರುತ್ತದೆ. ಇವುಗಳನ್ನು ನಿಮ್ಮ ಆಹಾರದಲ್ಲಿ ಸೇರಿಸಿಕೊಳ್ಳಿ.

ಅತಿಯಾದ ಕೆಫೀನ್ ಸೇವನೆಯು ದೇಹದಿಂದ ನೀರನ್ನು ಮೂತ್ರದ ರೂಪದಲ್ಲಿ ಹೊರಹಾಕುತ್ತದೆ, ಇದು ನಿರ್ಜಲೀಕರಣಕ್ಕೆ ಕಾರಣವಾಗಬಹುದು.