- ಮಳೆಗಾಲದಲ್ಲಿ ಪುಟ್ಟ ಮಕ್ಕಳ ಆರೋಗ್ಯ ಕಾಪಾಡಲು ಆಹಾರದಲ್ಲೇ ಇರಲಿ ಎಚ್ಚರ
- ಹೊರಗಿನ ಆಹಾರದಿಂದ ತಂಪು ಪಾನೀಯದವರೆಗೆ; ಮಳೆಗಾಲದಲ್ಲಿ ಮಕ್ಕಳಿಗೆ ಏನು ಕೊಡಬಾರದು?
- ಮಳೆಗಾಲದಲ್ಲಿ ಮಕ್ಕಳಿಗೆ ಈ ಆಹಾರಗಳನ್ನು ಕೊಡಬೇಡಿ; ಸೋಂಕಿನ ಅಪಾಯ ಹೆಚ್ಚಾಗಬಹುದು!
ನವದೆಹಲಿ: ಮಳೆಗಾಲದಲ್ಲಿ ಹೆಚ್ಚಿದ ಆರ್ದ್ರತೆ, ಬ್ಯಾಕ್ಟೀರಿಯಾ ಹಾಗೂ ವೈರಸ್ಗಳ ಚಟುವಟಿಕೆಯಿಂದ ಮಕ್ಕಳಲ್ಲಿ ಸೋಂಕು ಮತ್ತು ಅನಾರೋಗ್ಯದ ಅಪಾಯ(Monsoon Care) ಹೆಚ್ಚಾಗುತ್ತದೆ. ಆದ್ದರಿಂದ ಈ ಸಮಯದಲ್ಲಿ ಮಕ್ಕಳ ಆಹಾರ ಪದ್ಧತಿ, ಸ್ವಚ್ಛತೆ ಮತ್ತು ದೈನಂದಿನ ಆರೈಕೆಯ ಬಗ್ಗೆ ಪಾಲಕರು ಹೆಚ್ಚಿನ ಗಮನ ಹರಿಸಬೇಕು ಎಂದು ಆರೋಗ್ಯ ತಜ್ಞರು ಸಲಹೆ ನೀಡಿದ್ದಾರೆ.
ಹೊರಗಿನ ಆಹಾರದಿಂದ ದೂರವಿಡಿ
ಮಳೆಗಾಲದಲ್ಲಿ ಚಾಟ್, ಗೋಲ್ಗಪ್ಪ, ಪಕೋಡ, ಸಮೋಸ ಸೇರಿದಂತೆ ಬೀದಿ ಬದಿಯ ಆಹಾರಗಳನ್ನು ಮಕ್ಕಳಿಗೆ ನೀಡಬಾರದು ಎಂದು ತಜ್ಞರು ಹೇಳಿದ್ದಾರೆ. ಈ ಆಹಾರಗಳಲ್ಲಿ ಬಳಸುವ ನೀರು ಹಾಗೂ ಎಣ್ಣೆ ಕಲುಷಿತವಾಗಿರುವ ಸಾಧ್ಯತೆ ಹೆಚ್ಚಿರುತ್ತದೆ. ಇದರಿಂದ ಹೊಟ್ಟೆ ಸೋಂಕು, ಅತಿಸಾರ ಮತ್ತು ಇತರ ಜೀರ್ಣಕಾರಿ ಸಮಸ್ಯೆಗಳು ಉಂಟಾಗಬಹುದು. ಮಕ್ಕಳಿಗೆ ಮನೆಯಲ್ಲೇ ತಯಾರಿಸಿದ ತಾಜಾ ಹಾಗೂ ಸ್ವಚ್ಛ ಆಹಾರ ನೀಡುವುದು ಉತ್ತಮ.
ಕತ್ತರಿಸಿದ ಹಣ್ಣು, ಹಳೆಯ ಆಹಾರ ಬೇಡ
ಹೊರಗೆ ಬಹಳ ಸಮಯ ಇಟ್ಟಿರುವ ಕತ್ತರಿಸಿದ ಹಣ್ಣುಗಳನ್ನು ಮಕ್ಕಳಿಗೆ ನೀಡಬಾರದು. ಇವುಗಳ ಮೇಲೆ ಧೂಳು, ಕೊಳಕು ಹಾಗೂ ಬ್ಯಾಕ್ಟೀರಿಯಾಗಳು ಸುಲಭವಾಗಿ ಸೇರಿಕೊಳ್ಳುತ್ತವೆ.ಅದೇ ರೀತಿ, ಹಳೆಯ ಆಹಾರದಲ್ಲೂ ಬ್ಯಾಕ್ಟೀರಿಯಾ ಮತ್ತು ಶಿಲೀಂಧ್ರ (ಅಚ್ಚು) ಬೆಳೆಯುವ ಸಾಧ್ಯತೆ ಹೆಚ್ಚಿರುತ್ತದೆ. ಆದ್ದರಿಂದ ಮಕ್ಕಳಿಗೆ ಯಾವಾಗಲೂ ತಾಜಾ ಆಹಾರ ಹಾಗೂ ಹೊಸದಾಗಿ ಕತ್ತರಿಸಿದ ಹಣ್ಣುಗಳನ್ನು ಮಾತ್ರ ನೀಡಬೇಕು.
ತಂಪು ಪಾನೀಯ, ಹೆಚ್ಚು ಮಸಾಲೆ ಆಹಾರ ತಪ್ಪಿಸಿ
ಮಳೆಗಾಲದಲ್ಲಿ ತಂಪು ಪಾನೀಯಗಳು, ಐಸ್ ಸೇರಿಸಿದ ಪಾನೀಯಗಳು ಹಾಗೂ ಅತಿಯಾಗಿ ತಣ್ಣನೆಯ ಆಹಾರಗಳನ್ನು ಮಕ್ಕಳಿಗೆ ನೀಡುವುದನ್ನು ತಪ್ಪಿಸಬೇಕು. ಇವುಗಳಿಂದ ಗಂಟಲು ಸೋಂಕು, ಶೀತ ಹಾಗೂ ಜೀರ್ಣಕಾರಿ ಸಮಸ್ಯೆಗಳು ಕಾಣಿಸಿಕೊಳ್ಳಬಹುದು.ಇದರ ಬದಲು ಸಾಕಷ್ಟು ನೀರು, ತೆಂಗಿನ ನೀರು ಮತ್ತು ಆರೋಗ್ಯಕರ ಪಾನೀಯಗಳನ್ನು ನೀಡುವುದು ಉತ್ತಮ ಎಂದು ತಜ್ಞರು ಸಲಹೆ ನೀಡಿದ್ದಾರೆ.
ಅತಿಯಾಗಿ ಹುರಿದ, ಎಣ್ಣೆಯುಕ್ತ ಹಾಗೂ ಮಸಾಲೆಯುಕ್ತ ಆಹಾರವೂ ಮಕ್ಕಳ ಜೀರ್ಣಾಂಗದ ಮೇಲೆ ಒತ್ತಡ ಉಂಟುಮಾಡಬಹುದು. ಇದರಿಂದ ಗ್ಯಾಸ್, ಅಜೀರ್ಣ ಹಾಗೂ ಹೊಟ್ಟೆ ಉಬ್ಬರದಂತಹ ಸಮಸ್ಯೆಗಳು ಎದುರಾಗುವ ಸಾಧ್ಯತೆ ಇದೆ.
ಎಲೆ ತರಕಾರಿಗಳನ್ನು ಚೆನ್ನಾಗಿ ತೊಳೆಯಿರಿ
ಮಳೆಗಾಲದಲ್ಲಿ ಪಾಲಕ್, ಮೆಂತೆ ಸೇರಿದಂತೆ ಎಲೆ ತರಕಾರಿಗಳ ಮೇಲೆ ಮಣ್ಣು ಹಾಗೂ ಸೂಕ್ಷ್ಮಜೀವಿಗಳು ಹೆಚ್ಚು ಇರಬಹುದು. ಆದ್ದರಿಂದ ಇವುಗಳನ್ನು ಬಳಸುವ ಮೊದಲು ಚೆನ್ನಾಗಿ ತೊಳೆದು, ಸ್ವಚ್ಛವಾಗಿ ಬೇಯಿಸಿ ಮಕ್ಕಳಿಗೆ ನೀಡಬೇಕು ಎಂದು ತಜ್ಞರು ತಿಳಿಸಿದ್ದಾರೆ.ಮಳೆಗಾಲದಲ್ಲಿ ಸರಿಯಾದ ಆಹಾರ ಮತ್ತು ಸ್ವಚ್ಛತೆಗೆ ಆದ್ಯತೆ ನೀಡಿದರೆ ಮಕ್ಕಳನ್ನು ಹಲವು ಸೋಂಕುಗಳಿಂದ ರಕ್ಷಿಸಬಹುದು ಎಂದು ಆರೋಗ್ಯ ತಜ್ಞರು ಸಲಹೆ ನೀಡಿದ್ದಾರೆ,(ಏಜೆನ್ಸೀಸ್).