ಮಾನವರ ಮೇಲೆ ದಾಳಿ ಮಾಡದೆಯೇ ಜೀವ ತೆಗೆಯುವ ಡೇಂಜರಸ್​ ಜೀವಿಗಳಿವು! ನಿಮಗಿದು ತಿಳಿದಿರಲೇಬೇಕು...Creatures

Creatures : ಹುಲಿ, ಚಿರತೆ ಅಥವಾ ವಿಷಕಾರಿ ಹಾವು ದಾಳಿ ಮಾಡಿದಾಗ ಮನುಷ್ಯನ ಪ್ರಾಣ ಪಕ್ಷಿ ಹಾರಿ ಹೋಗುತ್ತದೆ ಅನ್ನೋದು ಎಲ್ಲರಿಗೂ ಗೊತ್ತೇ ಇದೆ. ಇಂತಹ ಜೀವಿಗಳು ನೇರವಾಗಿ ದಾಳಿ ಮಾಡಿದರೆ ಅಥವಾ ಕಚ್ಚಿದರೆ ಮಾತ್ರ ಅಪಾಯಕಾರಿ ಎಂದು ಅನೇಕರು ಭಾವಿಸುತ್ತಾರೆ. ಆದರೆ, ಕೆಲವು ಜೀವಿಗಳು ನಿಮ್ಮ ದೇಹವನ್ನು ಮುಟ್ಟದೆಯೇ ನಿಮ್ಮ ಸಾವಿಗೆ ಕಾರಣವಾಗಬಹುದು. ಈ ಸಂಗತಿ ಹೆಚ್ಚಿನ ಜನರಿಗೆ ತಿಳಿದೇ ಇಲ್ಲ. ಅಂತಹ ಕೆಲವು ಜೀವಿಗಳ ಬಗ್ಗೆ ನಾವಿಂದು ತಿಳಿದುಕೊಳ್ಳೋಣ.

ಸೊಳ್ಳೆಗಳು ಬಹಳ ಚಿಕ್ಕ ಜೀವಿಗಳಾಗಿದ್ದರೂ, ಅವು ಭೂಮಿಯ ಮೇಲಿನ ಅತ್ಯಂತ ಅಪಾಯಕಾರಿ ಜೀವಿಗಳಲ್ಲಿ ಒಂದಾಗಿದೆ. ಕೇವಲ ಸೊಳ್ಳೆ ಕಡಿತದಿಂದ ಮಾತ್ರ ಸಮಸ್ಯೆ ಉಂಟಾಗುವುದಿಲ್ಲ. ಸೊಳ್ಳೆಗಳು ರೋಗ ವಾಹಕಗಳಾಗಿ ಕಾರ್ಯನಿರ್ವಹಿಸುತ್ತವೆ. ಅವು ಮಲೇರಿಯಾ, ಡೆಂಘೆ, ಜಿಕಾ, ಚಿಕೂನ್‌ಗುನ್ಯಾ ಮತ್ತು ವೆಸ್ಟ್ ನೈಲ್ ವೈರಸ್‌ನಂತಹ ರೋಗಗಳನ್ನು ಹರಡುತ್ತವೆ. ನಿಮಗೆ ಹಾನಿಯಾಗಲು ಸೊಳ್ಳೆಗಳು ನಿಮ್ಮ ಮೇಲೆ ನೇರವಾಗಿಯೇ ದಾಳಿ ಮಾಡಬೇಕಾಗಿಲ್ಲ. ಬದಲಾಗಿ, ನಿಮ್ಮ ದೇಹಕ್ಕೆ ಹಾನಿ ಮಾಡುವ ಮತ್ತು ಸಾವಿಗೆ ಕಾರಣವಾಗುವ ರೋಗಗಳನ್ನು ಹರಡುತ್ತವೆ.

ಪಫ್ಫರ್​ ಫಿಶ್‌ಗಳು ವಿಶ್ವದ ಅತ್ಯಂತ ವಿಷಕಾರಿ ಮೀನುಗಳಲ್ಲಿ ಒಂದಾಗಿದ್ದು, ಬೆದರಿಕೆ ಬಂದಾಗ ತಮ್ಮ ದೇಹವನ್ನು ಬಲೂನ್‌ಗಳಂತೆ ಉಬ್ಬಿಸುವ ಸಾಮರ್ಥ್ಯವನ್ನು ಹೊಂದಿವೆ. ಅವುಗಳ ಆಂತರಿಕ ಅಂಗಗಳಲ್ಲಿರುವ ವಿಷ ಟೆಟ್ರೋಡೋಟಾಕ್ಸಿನ್ ಸೈನೈಡ್‌ಗಿಂತ 1200 ಪಟ್ಟು ಹೆಚ್ಚು ಮಾರಕವಾಗಿದೆ. ನಿರುಪದ್ರವವಾಗಿದ್ದರೂ, ಅವುಗಳ ವಿಷವನ್ನು ಸೇವಿಸಿದರೆ ಪಾರ್ಶ್ವವಾಯು, ಉಸಿರಾಟದ ತೊಂದರೆಗಳು ಮತ್ತು ಹೃದಯ ವೈಫಲ್ಯಕ್ಕೆ ಕಾರಣವಾಗಬಹುದು. ಅಂದಹಾಗೆ, ಕೆಲವು ತರಬೇತಿ ಪಡೆದ ಜಪಾನಿನ ಬಾಣಸಿಗರಿಗೆ ಮಾತ್ರ ಈ ಮೀನನ್ನು ಸೂಕ್ಷ್ಮವಾಗಿ ಬೇಯಿಸುವುದು ಹೇಗೆ ಎಂದು ತಿಳಿದಿದೆ. ಅಲ್ಲದೆ, ಈ ಮೀನು ಅಡುಗೆ ಮಾಡಲು ಲೈಸೆನ್ಸ್​ ಸಹ ಪಡೆಯಬೇಕಿದೆ. ಈ ಮೀನು ಖಾದ್ಯ ತಿಂದು ಪ್ರತಿ ವರ್ಷ ನೂರಾರು ಜಪಾನಿಗರು ಸಾಯುತ್ತಾರೆ.

ಕೊಲಂಬಿಯಾದ ಮಳೆಕಾಡುಗಳಲ್ಲಿ ಕಂಡುಬರುವ ಗೋಲ್ಡನ್ ಪಾಯಿಸನ್​ ಡಾರ್ಟ್ ಕಪ್ಪೆ, ವಿಶ್ವದ ಅತ್ಯಂತ ವಿಷಕಾರಿ ಜೀವಿಗಳಲ್ಲಿ ಒಂದಾಗಿದೆ. ಇದರ ಪ್ರಕಾಶಮಾನವಾದ ಹಳದಿ, ಕಿತ್ತಳೆ ಮತ್ತು ಹಸಿರು ಚರ್ಮವು ಬ್ಯಾಟ್ರಾಚೋಟಾಕ್ಸಿನ್ ಎಂಬ ಮಾರಕ ವಿಷವನ್ನು ಹೊಂದಿರುತ್ತದೆ. ಬಹಳ ಕಡಿಮೆ ಪ್ರಮಾಣದ ವಿಷ ಕೂಡ ಮನುಷ್ಯರನ್ನು ಕೊಲ್ಲುತ್ತದೆ. ಈ ಬ್ಯಾಟ್ರಾಚೋಟಾಕ್ಸಿನ್ ಎಂಬ ವಿಷ, ನರಮಂಡಲದ ಮೇಲೆ ಪರಿಣಾಮ ಬೀರುತ್ತದೆ. ಇದು ಹೃದಯ ವೈಫಲ್ಯಕ್ಕೂ ಕಾರಣವಾಗಬಹುದು. ಲಿಯೋಫಿಸ್ ಎಪಿನೆಫೆಲಸ್ ಎಂಬ ಹಾವಿನ ಪ್ರಭೇದ ಮಾತ್ರ ಇದರ ವಿಷವನ್ನು ವಿರೋಧಿಸಿ ಕಪ್ಪೆಗಳನ್ನು ಬೇಟೆಯಾಡಬಲ್ಲದು. ಕಪ್ಪೆಯ ವಿಷವು ಮಾನವ ದೇಹವನ್ನು ತಲುಪಲು ಅದು ದೇಹವನ್ನು ಮುಟ್ಟಬೇಕಾಗಿಲ್ಲ. ಈ ವಿಷವು ಮಾನವ ದೇಹದಲ್ಲಿನ ಗಾಯದ ಮೂಲಕ ಪ್ರವೇಶಿಸುವ ಸಾಧ್ಯತೆ ಹೆಚ್ಚು. ಇದು ಸಾವಿಗೆ ಸಹ ಕಾರಣವಾಗಬಹುದು.

ಹಾವು ಕಡಿತವು ಕೇವಲ ಒಂದು ಸಮಸ್ಯೆ ಎಂದು ಅನೇಕ ಜನರು ಭಾವಿಸುತ್ತಾರೆ. ಆದಾಗ್ಯೂ, ಕಾಳಿಂಗ ಸರ್ಪಗಳು ತಮ್ಮ ವಿಷವನ್ನು ಉಗುಳುತ್ತವೆ. ಅವು ಮುಖ ಅಥವಾ ಕಣ್ಣುಗಳಿಗೆ ವಿಷವನ್ನು ಉಗುಳುತ್ತವೆ. ಇದು ತೀವ್ರ ನೋವು, ಕಾರ್ನಿಯಲ್ ಹಾನಿ, ಊತ ಮತ್ತು ಕೆಲವು ಸಂದರ್ಭಗಳಲ್ಲಿ ಶಾಶ್ವತ ಕುರುಡುತನಕ್ಕೆ ಕಾರಣವಾಗುತ್ತದೆ. ಅವುಗಳ ವಿಷವು ನರವಿಷಕಾರಿ ಅಂಶಗಳನ್ನು ಹೊಂದಿರುತ್ತದೆ. ಆದಾಗ್ಯೂ, ಅವು ಉಗುಳುವ ವಿಷವು ಮನುಷ್ಯರನ್ನು ಕೊಲ್ಲಲು ಸಾಧ್ಯವಿಲ್ಲ ಎಂದು ಅಧ್ಯಯನಗಳು ತೋರಿಸಿವೆ, (ಏಜೆನ್ಸೀಸ್​).