5 ನಿಮಿಷ ಅಂತ ಮೊಬೈಲ್ ತೆಗೆದುಕೊಳ್ತೀರಾ ಆದ್ರೆ ಗಂಟೆ ಕಳೆದರೂ ಗೊತ್ತಾಗಲ್ಲ ಅಲ್ವಾ? ಇದರ ಹಿಂದಿರುವ ಕಾರಣ ಇದೇ... Scrolling
- ಬಿಡುವು ಸಿಕ್ಕರೆ ಸಾಕು ಸಾಮಾಜಿಕ ಜಾಲತಾಣಗಳಲ್ಲಿ ಕಳೆದುಹೋಗುವುದು ಇಂದಿನ ಜನರ ಇತ್ತೀಚಿನ ಅಳಲು
- ಮುಂದೇನು ಸಿಗಬಹುದು ಎಂಬ ಕುತೂಹಲ ಹಾಗೂ ಹೊಸ ವಿಷಯಗಳ ಆಕರ್ಷಣೆಯಿಂದ ನಿರಂತರ ಸ್ಕ್ರಾಲಿಂಗ್
- ಬಸ್ಗಾಗಿ ಕಾಯುವಾಗ ಅಥವಾ ಬೇಸರವಾದಾಗ ಮೊಬೈಲ್ ನೋಡುವುದು ನಿಧಾನವಾಗಿ ಅಭ್ಯಾಸವಾಗಿ ಬದಲಾಗುವುದು
- ಸೆಕೆಂಡುಗಳಲ್ಲಿ ವಿಷಯ ಬದಲಾಗುವುದರಿಂದ ಸಮಯದ ಅರಿವಿಲ್ಲದೆ ಗಂಟೆಗಟ್ಟಲೆ ಕಾಲಹರಣವಾಗುವುದು
Scrolling : ಒಂದು ಕ್ಷಣ ಬಿಡುವು ಸಿಕ್ಕರೆ ಸಾಕು, ಕೈ ತಾನಾಗಿಯೇ ಮೊಬೈಲ್ ಕಡೆ ಹೋಗುತ್ತದೆ. ಸ್ವಲ್ಪ ಹೊತ್ತು ನೋಡೋಣ ಎಂದು ಸಾಮಾಜಿಕ ಜಾಲತಾಣ ತೆರೆದರೆ ಸಾಕು, ಒಂದಾದ ಮೇಲೆ ಮತ್ತೊಂದು ವಿಡಿಯೋ, ಫೋಟೋ, ಸುದ್ದಿ ಹಾಗೂ ಸಂದೇಶಗಳು ಕಣ್ಣ ಮುಂದೆ ಬರುತ್ತಲೇ ಇರುತ್ತವೆ. ಸಮಯ ನೋಡಿದಾಗ ಮಾತ್ರ ಎಷ್ಟೋ ಹೊತ್ತು ಕಳೆದಿದೆ ಎಂಬುದು ಅರಿವಾಗುತ್ತದೆ. ಕೆಲವೊಮ್ಮೆ ಮೊಬೈಲ್ ಕೈಗೆತ್ತಿಕೊಂಡಿದ್ದು ಏಕೆ ಎಂಬುದೇ ಮರೆತು ಹೋಗಿರುತ್ತದೆ.
ಇದು ಕೇವಲ ಸಮಯದ ಅರಿವಿಲ್ಲದಿರುವುದರಿಂದ ಆಗುವುದಲ್ಲ. ಸಾಮಾಜಿಕ ಜಾಲತಾಣಗಳ ವಿನ್ಯಾಸವೇ ನಮ್ಮ ಗಮನವನ್ನು ಹೆಚ್ಚು ಹೊತ್ತು ಹಿಡಿದಿಡುವ ರೀತಿಯಲ್ಲಿರುತ್ತದೆ.
ಮುಂದೇನು ಸಿಗಬಹುದು ಎಂಬ ಕುತೂಹಲ
ಸಾಮಾಜಿಕ ಜಾಲತಾಣದಲ್ಲಿ ಸ್ಕ್ರೋಲ್ ಮಾಡುವಾಗ ಪ್ರತಿಯೊಂದು ಪೋಸ್ಟ್ ನಂತರವೂ ಮುಂದಿನ ವಿಷಯ ಏನಿರಬಹುದು ಎಂಬ ಕುತೂಹಲ ಮೂಡುತ್ತದೆ. ಒಂದು ವಿಡಿಯೋ ಇಷ್ಟವಾಗದಿದ್ದರೆ ಮತ್ತೊಂದು ಉತ್ತಮವಾದದ್ದು ಸಿಗಬಹುದು ಎಂಬ ನಿರೀಕ್ಷೆಯಲ್ಲಿ ನಾವು ಸ್ಕ್ರೋಲ್ ಮಾಡುತ್ತಲೇ ಹೋಗುತ್ತೇವೆ. ಇದೇ ಕಾರಣಕ್ಕೆ “ಇದು ಕೊನೆಯ ವಿಡಿಯೋ” ಎಂದುಕೊಂಡರೂ ಮತ್ತೊಂದು ವಿಡಿಯೋ ತೆರೆದುಕೊಳ್ಳುತ್ತದೆ. ಹೀಗೆ ಕೆಲವೇ ನಿಮಿಷಗಳಲ್ಲಿ ಅರ್ಧ ಗಂಟೆ ಅಥವಾ ಅದಕ್ಕಿಂತ ಹೆಚ್ಚಿನ ಸಮಯ ಕಳೆಯಬಹುದು.
ಹೊಸ ವಿಷಯಗಳು ಗಮನ ಸೆಳೆಯುತ್ತವೆ
ಮಾನವನ ಮೆದುಳು ಹೊಸತನವನ್ನು ಸುಲಭವಾಗಿ ಗಮನಿಸುತ್ತದೆ. ಸಾಮಾಜಿಕ ಜಾಲತಾಣಗಳಲ್ಲಿ ಪ್ರತಿಕ್ಷಣವೂ ಹೊಸ ಚಿತ್ರ, ವಿಡಿಯೊ, ಸುದ್ದಿ ಅಥವಾ ಸಂದೇಶ ಕಾಣಿಸಿಕೊಳ್ಳುವುದರಿಂದ ಗಮನ ಒಂದೇ ಕಡೆ ಹೆಚ್ಚು ಹೊತ್ತು ಉಳಿಯುವುದಿಲ್ಲ. ಪ್ರತಿಯೊಂದು ಹೊಸ ವಿಷಯವೂ ಮತ್ತೆ ನಮ್ಮ ಗಮನವನ್ನು ಸೆಳೆಯುತ್ತದೆ. ಅದರಲ್ಲೂ ನಮಗೆ ಇಷ್ಟವಾಗುವ ವಿಷಯಗಳು ಪದೇಪದೆ ಕಾಣಿಸಿಕೊಂಡಾಗ ಸ್ಕ್ರೋಲ್ ಮಾಡುವುದನ್ನು ನಿಲ್ಲಿಸುವುದು ಇನ್ನಷ್ಟು ಕಷ್ಟವಾಗಬಹುದು.
ಖಾಲಿ ಸಮಯ ಕಳೆಯಲು ಮೊಬೈಲ್ ಬಳಕೆ
ಬಸ್ಗಾಗಿ ಕಾಯುವಾಗ, ಊಟ ಮಾಡುವಾಗ, ಮಲಗುವ ಮುನ್ನ ಅಥವಾ ಓದಿನ ನಡುವೆ ಸ್ವಲ್ಪ ವಿರಾಮ ಸಿಕ್ಕಾಗ ಮೊಬೈಲ್ ನೋಡುವುದು ಸಾಮಾನ್ಯವಾಗಿದೆ. ನಿಧಾನವಾಗಿ ಇದು ಅಭ್ಯಾಸವಾಗಬಹುದು. ಬೇಸರವಾದಾಗ ಅಥವಾ ಏನು ಮಾಡಬೇಕು ಎಂದು ತಿಳಿಯದಾಗ ಮೊಬೈಲ್ ತೆರೆಯುವುದು ಸಹಜ ಪ್ರತಿಕ್ರಿಯೆಯಾಗಿ ಬದಲಾಗುತ್ತದೆ. ಹೀಗಾಗಿ ಕೆಲಸವಿಲ್ಲದ ಸಮಯ ಮಾತ್ರವಲ್ಲದೆ, ಕೆಲಸ ಮಾಡಬೇಕಾದ ಸಮಯದಲ್ಲೂ ಕೈ ಮೊಬೈಲ್ ಕಡೆ ಹೋಗಬಹುದು.
ಸಮಯ ಗೊತ್ತಾಗದಂತೆ ಮಾಡುವ ಮತ್ತೊಂದು ಕಾರಣ
ಸಾಮಾಜಿಕ ಜಾಲತಾಣದಲ್ಲಿ ಒಂದೇ ರೀತಿಯ ವಿಷಯ ನಿರಂತರವಾಗಿ ಕಾಣಿಸುವುದಿಲ್ಲ. ಕೆಲವೇ ಸೆಕೆಂಡುಗಳಲ್ಲಿ ವಿಷಯ ಬದಲಾಗುತ್ತಿರುತ್ತದೆ. ಇದರಿಂದ “ನಾನು ಇಷ್ಟು ಹೊತ್ತು ನೋಡುತ್ತಿದ್ದೇನೆ” ಎಂಬ ಅರಿವು ಕಡಿಮೆಯಾಗಬಹುದು. ಒಂದು ವಿಡಿಯೋ ಮುಗಿದ ಕೂಡಲೇ ಮತ್ತೊಂದು ಆರಂಭವಾಗುವುದರಿಂದ ಮಧ್ಯದಲ್ಲಿ ನಿಲ್ಲಿಸಿ ಸಮಯವನ್ನು ಪರಿಶೀಲಿಸುವ ಅವಕಾಶವೂ ಕಡಿಮೆಯಾಗುತ್ತದೆ.
ಸಮಯ ಉಳಿಸಿಕೊಳ್ಳಲು ಏನು ಮಾಡಬಹುದು
ಮೊಬೈಲ್ ಬಳಸುವ ಸಮಯವನ್ನು ಸಂಪೂರ್ಣವಾಗಿ ನಿಲ್ಲಿಸುವ ಅಗತ್ಯವಿಲ್ಲ. ಆದರೆ ಯಾವ ಸಮಯದಲ್ಲಿ ಎಷ್ಟು ಹೊತ್ತು ಬಳಸುತ್ತಿದ್ದೇವೆ ಎಂಬ ಅರಿವು ಇರಬೇಕು. ಸಾಮಾಜಿಕ ಜಾಲತಾಣಗಳಿಗೆ ಸಮಯ ಮಿತಿ ನಿಗದಿಪಡಿಸುವುದು, ಅನಗತ್ಯ ಸೂಚನೆಗಳನ್ನು ಕಡಿಮೆ ಮಾಡುವುದು ಮತ್ತು ಮಲಗುವ ಮುನ್ನ ಮೊಬೈಲ್ನ್ನು ದೂರ ಇಡುವುದು ಸಹಾಯ ಮಾಡಬಹುದು. ಮುಖ್ಯವಾಗಿ ಮೊಬೈಲ್ ಕೈಗೆತ್ತಿಕೊಳ್ಳುವ ಮೊದಲು “ನಾನು ಈಗ ಏಕೆ ತೆರೆಯುತ್ತಿದ್ದೇನೆ” ಎಂದು ಒಂದೇ ಕ್ಷಣ ಯೋಚಿಸುವ ಅಭ್ಯಾಸ ಬೆಳೆಸಿಕೊಳ್ಳಿ. ಈ ಸಣ್ಣ ಪ್ರಶ್ನೆಯೇ ಅನಗತ್ಯ ಸ್ಕ್ರೋಲಿಂಗ್ ಕಡಿಮೆ ಮಾಡಲು ಸಹಾಯ ಮಾಡಬಹುದು.
ಸಾಮಾಜಿಕ ಜಾಲತಾಣ ತಪ್ಪಲ್ಲ. ಆದರೆ, ನಮಗೆ ಗೊತ್ತಾಗದಂತೆ ನಮ್ಮ ಸಮಯವನ್ನು ಅದು ಎಷ್ಟು ತೆಗೆದುಕೊಳ್ಳುತ್ತಿದೆ ಎಂಬುದನ್ನು ಗಮನಿಸುವುದು ಮುಖ್ಯ. ಕೆಲವೊಮ್ಮೆ ಮೊಬೈಲ್ನಲ್ಲಿ ಕಳೆಯುತ್ತಿರುವ ಸಮಯಕ್ಕಿಂತ, ಕಳೆದುಹೋಗುತ್ತಿರುವ ಸಮಯವೇ ನಮಗೆ ಅರಿವಿಲ್ಲದ ದೊಡ್ಡ ವಿಷಯವಾಗಿರಬಹುದು, (ಏಜೆನ್ಸೀಸ್).