ಮಳೆಗಾಲದ ರಾತ್ರಿ ಹೊತ್ತು ಹಸಿರು ಅಥವಾ ಹಳದಿ ಬೆಳಕಿನೊಂದಿಗೆ ಮಿಂಚುವ ಮಿಂಚುಹುಳುಗಳನ್ನು ನೀವು ನೋಡಿರಬಹುದು. ಇವುಗಳ ಹೊಟ್ಟೆಯ ಭಾಗದಲ್ಲಿರುವ ವಿಶೇಷ ಅಂಗಗಳಲ್ಲಿ ನಡೆಯುವ ರಾಸಾಯನಿಕ ಕ್ರಿಯೆಯಿಂದ ಬೆಳಕು ಉತ್ಪತ್ತಿಯಾಗುತ್ತದೆ. ಈ ಬೆಳಕನ್ನು ಸಂಗಾತಿಯನ್ನು ಆಕರ್ಷಿಸಲು ಸಂವಹನದ ಸಂಕೇತವಾಗಿ ಬಳಸುತ್ತವೆ. ವಿಶೇಷವೆಂದರೆ ಇವು ಹೊರಸೂಸುವ ಬೆಳಕಿನಲ್ಲಿ ಶಾಖದ ವ್ಯರ್ಥ ಉತ್ಪಾದನೆ ಬಹಳ ಕಡಿಮೆ.
ಸಮುದ್ರದ ಆಳದಲ್ಲಿ ವಾಸಿಸುವ ಈ ವಿಚಿತ್ರ ಮೀನು ನೋಡಲು ಭಯಾನಕವಾಗಿದ್ದರೂ ಇದರ ಬೇಟೆಯಾಡುವ ತಂತ್ರ ಇನ್ನಷ್ಟು ಅಚ್ಚರಿ ಮೂಡಿಸುತ್ತದೆ. ತಲೆಯ ಮೇಲಿರುವ ದೀಪದಂತಿರುವ ಅಂಗವು ಬೇಟೆಯನ್ನು ಆಕರ್ಷಿಸುವ ಸಾಧನವಾಗಿದೆ. ಕೆಲವು ಪ್ರಭೇದಗಳಲ್ಲಿ ಈ ಬೆಳಕು ಉತ್ಪತ್ತಿಯಾಗಲು ಅದರೊಂದಿಗೆ ಸಹಜೀವನ ನಡೆಸುವ ಬ್ಯಾಕ್ಟೀರಿಯಾಗಳು ನೆರವಾಗುತ್ತವೆ. ಸಂಪೂರ್ಣ ಕತ್ತಲೆಯ ಸಮುದ್ರದಲ್ಲಿ ಬೆಳಕನ್ನೇ ಬೇಟೆಯ ಬಲೆಯನ್ನಾಗಿ ಬಳಸುವ ಜೀವಿ ಇದು!
ಸಮುದ್ರದ ನೀರಿನಲ್ಲಿ ತೇಲಾಡುವ ಜೆಲ್ಲಿ ಮೀನುಗಳು ಬೆಳಕು ಹೊರಸೂಸುವ ಮೂಲಕ ನೋಡುಗರನ್ನು ಬೆರಗುಗೊಳಿಸುತ್ತವೆ. ಕೆಲವು ಪ್ರಭೇದಗಳು ನೀಲಿ ಅಥವಾ ಹಸಿರು ಬಣ್ಣದ ಬೆಳಕನ್ನು ಹೊರಸೂಸುತ್ತವೆ. ಅಪಾಯ ಎದುರಾದಾಗ ಅಥವಾ ಸ್ಪರ್ಶಕ್ಕೆ ಪ್ರತಿಕ್ರಿಯೆಯಾಗಿ ಬೆಳಕು ಕಾಣಿಸಿಕೊಳ್ಳಬಹುದು. ಇವುಗಳ ಪಾರದರ್ಶಕ ದೇಹದೊಂದಿಗೆ ಹೊಳೆಯುವ ಬೆಳಕು ಸಮುದ್ರದೊಳಗೆ ಅದ್ಭುತ ದೃಶ್ಯವನ್ನು ಸೃಷ್ಟಿಸುತ್ತದೆ.
ಕತ್ತಲೆಯ ಗುಹೆಗಳು ಮತ್ತು ತೇವಾಂಶವಿರುವ ಪ್ರದೇಶಗಳಲ್ಲಿ ಕಂಡುಬರುವ ಗ್ಲೋವರ್ಮ್‌ಗಳು ತಮ್ಮ ಬೆಳಕಿನಿಂದಲೇ ಗಮನ ಸೆಳೆಯುತ್ತವೆ. ಇವುಗಳ ಲಾರ್ವಾ ಹಂತದಲ್ಲಿರುವ ಜೀವಿಗಳು ಬೆಳಕನ್ನು ಹೊರಸೂಸುತ್ತವೆ. ಕೆಲವು ಗ್ಲೋವರ್ಮ್‌ಗಳು ಬೆಳಕಿನ ಜೊತೆಗೆ ಅಂಟಿಕೊಳ್ಳುವ ದಾರದಂತಹ ರಚನೆಗಳನ್ನು ನಿರ್ಮಿಸಿ ಸಣ್ಣ ಕೀಟಗಳನ್ನು ಬಲೆಗೆ ಬೀಳಿಸುತ್ತವೆ. ಕತ್ತಲೆಯ ಗುಹೆಯೊಳಗೆ ನಕ್ಷತ್ರಗಳು ಮಿನುಗುತ್ತಿರುವಂತೆ ಕಾಣುವ ದೃಶ್ಯಕ್ಕೆ ಇವೇ ಕಾರಣ!
ಹೆಸರಿನಲ್ಲೇ ರೈಲು ಇದ್ದರೂ ಇದಕ್ಕೂ ರೈಲಿಗೂ ಯಾವುದೇ ಸಂಬಂಧವಿಲ್ಲ ಈ ವಿಶಿಷ್ಟ ಕೀಟದ ದೇಹದ ವಿವಿಧ ಭಾಗಗಳಲ್ಲಿ ಬೆಳಕು ಉತ್ಪತ್ತಿಯಾಗುತ್ತದೆ. ಇದರ ದೇಹದ ಬದಿಗಳಲ್ಲಿ ಹಸಿರು ಅಥವಾ ಹಳದಿ ಬಣ್ಣದ ಬೆಳಕು ಕಾಣಿಸಿಕೊಂಡರೆ, ತಲೆಯ ಭಾಗದಲ್ಲಿ ಕೆಂಪು ಬಣ್ಣದ ಬೆಳಕು ಕಾಣಿಸಿಕೊಳ್ಳಬಹುದು. ರೈಲಿನ ಕಿಟಕಿಗಳಲ್ಲಿ ದೀಪಗಳು ಸಾಲಾಗಿ ಹೊಳೆಯುವಂತೆ ಇದರ ದೇಹದಲ್ಲಿನ ಬೆಳಕಿನ ಸಾಲುಗಳು ಕಾಣುವುದರಿಂದ ಇದಕ್ಕೆ ರೈಲ್ರೋಡ್ ವರ್ಮ್ ಎಂಬ ಹೆಸರು ಬಂದಿದೆ. ಶತ್ರುಗಳಿಗೆ ಎಚ್ಚರಿಕೆ ನೀಡಲು ಈ ಬೆಳಕು ಸಹಾಯ ಮಾಡುತ್ತದೆ, (ಏಜೆನ್ಸೀಸ್).