ಭೂಮಿಯ ಮೇಲಿನ ವಿಚಿತ್ರ ನೈಸರ್ಗಿಕ ಅದ್ಭುತಗಳು!  WEB
ಫೋಟೋ ಗ್ಯಾಲರಿ

ಭೂಮಿಯ ಮೇಲಿನ ವಿಚಿತ್ರ ನೈಸರ್ಗಿಕ ಅದ್ಭುತಗಳು! ನೋಡಿದರೆ ನಂಬೋದೇ ಕಷ್ಟ| earth wonders

ಪ್ರಕೃತಿಯ ಸೃಷ್ಟಿಯೇ ಒಂದು ವಿಸ್ಮಯ. ಭೂಮಿಯ ಮೇಲೆ ಮನುಷ್ಯನ ಕಲ್ಪನೆಗೂ ಮೀರಿದ ಹಲವು ಅದ್ಭುತ ಸ್ಥಳಗಳಿವೆ. ಎಲ್ಲೋ ನೆಲದೊಳಗೆ ಬೆಂಕಿ ಉರಿಯುತ್ತಿದ್ದರೆ, ಇನ್ನೊಂದೆಡೆ ಸರೋವರದ ನೀರು ಗುಲಾಬಿ ಬಣ್ಣದಲ್ಲಿ ಕಂಗೊಳಿಸುತ್ತದೆ. ಮತ್ತೊಂದೆಡೆ ಆಕಾಶವೇ ಭೂಮಿಗೆ ಇಳಿದಂತೆ ಭಾಸವಾಗುವ ದೃಶ್ಯಗಳಿವೆ. ಇವೆಲ್ಲವೂ ಯಾವುದೇ ಕೃತಕ ನಿರ್ಮಾಣಗಳಲ್ಲ, ಪ್ರಕೃತಿಯೇ ಸೃಷ್ಟಿಸಿರುವ ಅಪರೂಪದ ತಾಣಗಳು. ಜಗತ್ತಿನ ಮೂಲೆಮೂಲೆಗಳಲ್ಲಿರುವ ಇಂತಹ ಐದು ವಿಚಿತ್ರ ನೈಸರ್ಗಿಕ ಅದ್ಭುತಗಳ ಪರಿಚಯ ಇಲ್ಲಿದೆ.earth wonders

ವಿಜಯವಾಣಿ ಸುದ್ದಿ ಜಾಲ

ನರಕದ ಬಾಗಿಲು – ತುರ್ಕಮೆನಿಸ್ತಾನ

door to hell

ತುರ್ಕಮೆನಿಸ್ತಾನದ ಕಾರಕಮ್ ಮರುಭೂಮಿಯಲ್ಲಿರುವ ಡೋರ್ ಟು ಹೆಲ್ ಜಗತ್ತಿನ ಅತ್ಯಂತ ವಿಚಿತ್ರ ಸ್ಥಳಗಳಲ್ಲಿ ಒಂದು. ಹೆಸರೇ ಸೂಚಿಸುವಂತೆ, ಭೂಮಿಯ ಮೇಲೆಯೇ ನರಕದ ಬಾಗಿಲು ತೆರೆದಿದೆಯೇನೋ ಎಂಬ ಭಾವನೆ ಮೂಡಿಸುವ ಈ ಸ್ಥಳದಲ್ಲಿ ಬೃಹತ್ ಕುಳಿಯೊಳಗೆ ಬೆಂಕಿ ಉರಿಯುತ್ತಿರುತ್ತದೆ. 1971ರಲ್ಲಿ ನೈಸರ್ಗಿಕ ಅನಿಲದ ಸಂಗ್ರಹವನ್ನು ಪತ್ತೆಹಚ್ಚುವ ಕಾರ್ಯಾಚರಣೆ ವೇಳೆ ಭೂಮಿ ಕುಸಿದು ಈ ಕುಳಿ ನಿರ್ಮಾಣವಾಯಿತು. ಅನಿಲ ಹರಡುವುದನ್ನು ತಡೆಯಲು ಬೆಂಕಿ ಹಚ್ಚಲಾಯಿತು ಎನ್ನಲಾಗುತ್ತದೆ. ಅಂದಿನಿಂದ ಈ ಸ್ಥಳ ಬೆಂಕಿಯ ಜ್ವಾಲೆಗಳಿಂದ ಪ್ರಸಿದ್ಧಿ ಪಡೆದಿದೆ. ವಿಶೇಷವಾಗಿ ರಾತ್ರಿಯ ವೇಳೆ ಕತ್ತಲಿನ ನಡುವೆ ಉರಿಯುವ ಬೆಂಕಿಯ ದೃಶ್ಯ ಪ್ರವಾಸಿಗರನ್ನು ಬೆರಗುಗೊಳಿಸುತ್ತದೆ.

ಗುಲಾಬಿ ಬಣ್ಣದ ಸರೋವರ – ಆಸ್ಟ್ರೇಲಿಯಾ

Lake Hillier

ಸರೋವರವೆಂದರೆ ಸಾಮಾನ್ಯವಾಗಿ ನೀಲಿ ಅಥವಾ ಹಸಿರು ಬಣ್ಣದ ನೀರು ನೆನಪಾಗುತ್ತದೆ. ಆದರೆ ಆಸ್ಟ್ರೇಲಿಯಾದ ಲೇಕ್ ಹಿಲಿಯರ್ ಮಾತ್ರ ತನ್ನ ವಿಶಿಷ್ಟ ಗುಲಾಬಿ ಬಣ್ಣದಿಂದ ಜಗತ್ತಿನ ಗಮನ ಸೆಳೆದಿದೆ. ಪಶ್ಚಿಮ ಆಸ್ಟ್ರೇಲಿಯಾದ ಮಿಡಲ್ ಐಲ್ಯಾಂಡ್‌ನಲ್ಲಿರುವ ಈ ಸರೋವರದ ನೀರು ಗುಲಾಬಿ ಬಣ್ಣದಲ್ಲಿ ಕಾಣಿಸಿಕೊಳ್ಳುತ್ತದೆ. ನೀರಿನಲ್ಲಿರುವ ಹೆಚ್ಚಿನ ಉಪ್ಪಿನ ಪ್ರಮಾಣ ಹಾಗೂ ಡುನಾಲಿಯೆಲ್ಲಾ ಸಲಿನಾ ಎಂಬ ಸೂಕ್ಷ್ಮ ಪಾಚಿ ಸೇರಿದಂತೆ ಕೆಲವು ಸೂಕ್ಷ್ಮಜೀವಿಗಳು ಈ ಬಣ್ಣಕ್ಕೆ ಕಾರಣವಾಗಿವೆ. ಸುತ್ತಲೂ ಹಸಿರು ಮರಗಳು, ಪಕ್ಕದಲ್ಲೇ ನೀಲಿ ಸಮುದ್ರ ಮತ್ತು ಮಧ್ಯದಲ್ಲಿ ಗುಲಾಬಿ ಬಣ್ಣದ ಸರೋವರ. ಈ ಮೂರು ಬಣ್ಣಗಳ ಸಂಯೋಜನೆ ನೋಡುಗರಿಗೆ ಪ್ರಕೃತಿಯ ವರ್ಣಮಯ ಲೋಕವನ್ನೇ ತೆರೆದಿಡುತ್ತದೆ.

ಭೂಮಿಯ ಮೇಲಿನ ಬೃಹತ್ ಕನ್ನಡಿ – ಬೊಲಿವಿಯಾ

Salar de Uyuni

ಆಕಾಶವೇ ಭೂಮಿಗೆ ಇಳಿದಿದೆಯೇ ಎಂಬ ಅನುಭವ ನೀಡುವ ಅದ್ಭುತ ತಾಣವೇ ಬೊಲಿವಿಯಾದ ಸಾಲಾರ್ ಡಿ ಉಯುನಿ . ಇದು ವಿಶ್ವದ ಅತಿದೊಡ್ಡ ಉಪ್ಪಿನ ಸಮತಟ್ಟು ಪ್ರದೇಶವಾಗಿದೆ. ದೂರದಿಂದ ನೋಡಿದಾಗ ಬಿಳಿ ಹಿಮದ ಹೊದಿಕೆಯಂತೆ ಕಾಣುವ ಈ ಪ್ರದೇಶ ಮಳೆಗಾಲದಲ್ಲಿ ಮತ್ತಷ್ಟು ವಿಶೇಷವಾಗುತ್ತದೆ. ಮಳೆಯ ನೀರು ನೆಲದ ಮೇಲೆ ತೆಳುವಾದ ಪದರವಾಗಿ ಹರಡಿಕೊಂಡಾಗ ಆಕಾಶ, ಮೋಡಗಳು ಮತ್ತು ಸುತ್ತಲಿನ ದೃಶ್ಯಗಳು ನೀರಿನಲ್ಲಿ ಪ್ರತಿಬಿಂಬಿಸುತ್ತವೆ. ಇದರಿಂದ ಇಡೀ ಪ್ರದೇಶವೇ ಬೃಹತ್ ಕನ್ನಡಿಯಂತೆ ಕಾಣುತ್ತದೆ. ಭೂಮಿ ಮತ್ತು ಆಕಾಶ ಒಂದಾಗಿರುವಂತೆ ಭಾಸವಾಗುವ ಈ ದೃಶ್ಯವನ್ನು ಕಣ್ತುಂಬಿಕೊಳ್ಳಲು ವಿಶ್ವದ ವಿವಿಧ ಭಾಗಗಳಿಂದ ಪ್ರವಾಸಿಗರು ಇಲ್ಲಿಗೆ ಆಗಮಿಸುತ್ತಾರೆ.

ದೈತ್ಯ ಹರಳುಗಳ ಗುಹೆ – ಮೆಕ್ಸಿಕೊ

Cave of the Crystals

ಮೆಕ್ಸಿಕೊದ ನೈಕಾ ಪ್ರದೇಶದಲ್ಲಿರುವ ಕ್ರಿಸ್ಟಲ್ ಗುಹೆ ಪ್ರಕೃತಿಯ ಅಪರೂಪದ ಸೃಷ್ಟಿಗಳಲ್ಲಿ ಒಂದು. ಈ ಗುಹೆಯೊಳಗೆ ಕಂಡುಬರುವ ಬೃಹತ್ ಜಿಪ್ಸಮ್ ಹರಳುಗಳು ನೋಡುಗರನ್ನು ಬೆರಗುಗೊಳಿಸುತ್ತವೆ. ಕೆಲವು ಹರಳುಗಳು ಹಲವು ಮೀಟರ್ ಉದ್ದದವರೆಗೆ ಬೆಳೆದಿದ್ದು, ಬೃಹತ್ ಗಾಜಿನ ಕಂಬಗಳಂತೆ ಕಾಣುತ್ತವೆ. ಸಾವಿರಾರು ವರ್ಷಗಳ ಕಾಲ ಖನಿಜಯುಕ್ತ ಬಿಸಿನೀರು ಗುಹೆಯೊಳಗೆ ಹರಿದ ಪರಿಣಾಮ ಈ ಹರಳುಗಳು ನಿಧಾನವಾಗಿ ಬೆಳೆದಿವೆ. ಗುಹೆಯೊಳಗಿನ ಅತಿಯಾದ ಉಷ್ಣತೆ ಮತ್ತು ತೇವಾಂಶದಿಂದಾಗಿ ಮನುಷ್ಯರು ಹೆಚ್ಚು ಸಮಯ ಉಳಿಯುವುದು ಅಪಾಯಕಾರಿ. ಭೂಮಿಯ ಆಳದಲ್ಲಿ ಪ್ರಕೃತಿ ಸೃಷ್ಟಿಸಿರುವ ಈ ಅದ್ಭುತ ಖನಿಜ ಲೋಕ ವಿಜ್ಞಾನಿಗಳಿಗೂ ಕುತೂಹಲದ ವಿಷಯವಾಗಿದೆ.

ಕಾಮನಬಿಲ್ಲಿನ ಪರ್ವತಗಳು – ಚೀನಾ

Zhangye Danxia

ಚೀನಾದ ಝಾಂಗ್ಯೆ ಡ್ಯಾನ್ಸಿಯಾ ಪರ್ವತಗಳು ಪ್ರಕೃತಿಯೇ ಬಣ್ಣಗಳಿಂದ ಚಿತ್ರ ಬಿಡಿಸಿದಂತೆ ಕಾಣುತ್ತವೆ. ಪರ್ವತಗಳ ಮೇಲೆ ಕೆಂಪು, ಹಳದಿ, ಕಿತ್ತಳೆ ಮತ್ತು ಹಸಿರು ಬಣ್ಣಗಳ ಪದರಗಳು ಹರಡಿಕೊಂಡಿವೆ. ಲಕ್ಷಾಂತರ ವರ್ಷಗಳ ಕಾಲ ಮರಳುಗಲ್ಲು ಮತ್ತು ವಿವಿಧ ಖನಿಜಗಳ ಮೇಲೆ ನಡೆದ ಭೌಗೋಳಿಕ ಬದಲಾವಣೆಗಳಿಂದ ಈ ವಿಶಿಷ್ಟ ಬಣ್ಣದ ಪದರಗಳು ರೂಪುಗೊಂಡಿವೆ. ಗಾಳಿ, ಮಳೆ ಮತ್ತು ನೈಸರ್ಗಿಕ ಸವೆತ ಪ್ರಕ್ರಿಯೆಗಳು ಪರ್ವತಗಳಿಗೆ ಇಂದಿನ ಆಕಾರವನ್ನು ನೀಡಿವೆ. ಸೂರ್ಯನ ಬೆಳಕು ಬೀಳುವಾಗ ಈ ಬಣ್ಣಗಳು ಇನ್ನಷ್ಟು ಸ್ಪಷ್ಟವಾಗಿ ಗೋಚರಿಸುತ್ತವೆ. ಹೀಗಾಗಿ ಇವುಗಳನ್ನು ಕಾಮನಬಿಲ್ಲಿನ ಪರ್ವತಗಳು ಎಂದೇ ಕರೆಯಲಾಗುತ್ತದೆ. ಪ್ರಕೃತಿಯ ಬಣ್ಣದಾಟವನ್ನು ಕಣ್ತುಂಬಿಕೊಳ್ಳಲು ಇದು ವಿಶ್ವದ ಪ್ರಮುಖ ಪ್ರವಾಸಿ ತಾಣಗಳಲ್ಲಿ ಒಂದಾಗಿದೆ