ನವದೆಹಲಿ: ಫ್ಯಾಶನ್ ಲೋಕದಲ್ಲಿ ದಿನಕ್ಕೊಂದು ಹೊಸ ಪ್ರಯೋಗಗಳು ನಡೆಯುತ್ತಲೇ ಇರುತ್ತವೆ. ಕೆಲವೊಮ್ಮೆ ಈ ಪ್ರಯೋಗಗಳು ಅದೆಷ್ಟು ವಿಚಿತ್ರವಾಗಿರುತ್ತವೆ ಎಂದರೆ, ಸಾಮಾನ್ಯ ಜನರಿಗೆ ಇದು ಫ್ಯಾಶನ್ ಹೌದೋ ಅಥವಾ ತಮಾಷೆಯೋ ಎಂಬ ಸಂಶಯ ಮೂಡುವುದು ಸಹಜ. ಈಗ ಅಂತಹದ್ದೇ ಒಂದು ವಿಚಿತ್ರ ವಿನ್ಯಾಸದ ಹ್ಯಾಂಡ್ಬ್ಯಾಗ್ ಮೂಲಕ ವಿಶ್ವಪ್ರಸಿದ್ಧ ಐಷಾರಾಮಿ ಬ್ರ್ಯಾಂಡ್ 'ಲೂಯಿ ವಿಟಾನ್' (Louis Vuitton) ಸುದ್ದಿಯಲ್ಲಿದೆ.
ತೋಟದ ಕ್ಯಾನ್ ಈಗ ಲಕ್ಷಾಂತರ ರೂಪಾಯಿಯ ಬ್ಯಾಗ್!
ಹೌದು, ನೀವು ಓದುತ್ತಿರುವುದು ನಿಜ. ನಾವು ಸಾಮಾನ್ಯವಾಗಿ ತೋಟದಲ್ಲಿ ಗಿಡಗಳಿಗೆ ನೀರು ಹಾಕಲು ಬಳಸುವ 'ವಾಟರಿಂಗ್ ಕ್ಯಾನ್' (Watering Can) ಮಾದರಿಯಲ್ಲೇ ಈ ಹೊಸ ಹ್ಯಾಂಡ್ಬ್ಯಾಗ್ ಅನ್ನು ವಿನ್ಯಾಸಗೊಳಿಸಲಾಗಿದೆ. ಇದರ ಬೆಲೆ ಕೇಳಿದರೆ ನೀವು ಖಂಡಿತ ದಂಗಾಗುತ್ತೀರಿ. ಭಾರತೀಯ ರೂಪಾಯಿ ಮೌಲ್ಯದಲ್ಲಿ ಈ ಬ್ಯಾಗ್ನ ಬೆಲೆ ಬರೋಬ್ಬರಿ 4.3 ಲಕ್ಷ ರೂಪಾಯಿ!
ಏನಿದರ ವಿಶೇಷತೆ?
ಮೇಲ್ನೋಟಕ್ಕೆ ಇದು ಕೇವಲ ಒಂದು ವಾಟರಿಂಗ್ ಕ್ಯಾನ್ನಂತೆ ಕಂಡರೂ, ಇದರ ತಯಾರಿಕೆಯಲ್ಲಿ ಲೂಯಿ ವಿಟಾನ್ ತನ್ನ ಐಕಾನಿಕ್ 'ಮೊನೊಗ್ರಾಮ್ ಕ್ಯಾನ್ವಾಸ್' ಅನ್ನು ಬಳಸಿದೆ.
ವಿನ್ಯಾಸ: ಬ್ಯಾಗ್ನ ಬದಿಗಳಲ್ಲಿ ಬ್ರ್ಯಾಂಡ್ನ ಲೋಗೋ ಇರುವ ವಿಶಿಷ್ಟ ವಿನ್ಯಾಸವಿದೆ. ಒಂದು ಕಡೆ ಬಾಗಿದ ಕೊಳವೆ (Spout) ಮತ್ತು ಮೇಲೆ ಹಿಡಿಯಲು ಹ್ಯಾಂಡಲ್ ನೀಡಲಾಗಿದೆ.
ಬಳಕೆ: ಇದು ಕೇವಲ ಶೋಕಿಗಲ್ಲ, ನಿಜವಾಗಿಯೂ ವಸ್ತುಗಳನ್ನು ಇಡಲು ಬಳಸಬಹುದು. ಫೋನ್, ವಾಲೆಟ್ ಮತ್ತು ಕೀಗಳನ್ನು ಇಡಲು ಜಿಪ್ ವ್ಯವಸ್ಥೆ ಇದೆ.
ಕಂಫರ್ಟ್: ಕೈಯಲ್ಲಿ ಹಿಡಿಯಲು ಹ್ಯಾಂಡಲ್ ಮಾತ್ರವಲ್ಲದೆ, ಕುತ್ತಿಗೆಗೆ ಅಥವಾ ಹೆಗಲಿಗೆ ಹಾಕಿಕೊಳ್ಳಲು (Crossbody) ಪ್ರತ್ಯೇಕವಾದ ಸ್ಟ್ರಾಪ್ ಕೂಡ ನೀಡಲಾಗಿದೆ.
ಫಾರೆಲ್ ವಿಲಿಯಮ್ಸ್ ಅವರ ವಿಭಿನ್ನ ಆಲೋಚನೆ
ಈ ವಿಲಕ್ಷಣ ಬ್ಯಾಗ್ ಅನ್ನು ಲೂಯಿ ವಿಟಾನ್ನ ಪುರುಷರ ವಿಭಾಗದ ಕ್ರಿಯೇಟಿವ್ ಡೈರೆಕ್ಟರ್ ಆಗಿರುವ ಖ್ಯಾತ ಗಾಯಕ ಹಾಗೂ ವಿನ್ಯಾಸಕ ಫಾರೆಲ್ ವಿಲಿಯಮ್ಸ್ (Pharrell Williams) ಅವರ ವಸಂತ/ಬೇಸಿಗೆ ಸಂಗ್ರಹದ (Spring/Summer Collection) ಭಾಗವಾಗಿ ಪರಿಚಯಿಸಲಾಗಿದೆ. "ಬೆಳವಣಿಗೆ" ಮತ್ತು "ಪೋಷಣೆ" ಎಂಬ ವಿಷಯವನ್ನಿಟ್ಟುಕೊಂಡು ಈ ಸಂಗ್ರಹವನ್ನು ಸಿದ್ಧಪಡಿಸಲಾಗಿದೆ. ಗಿಡಗಳಿಗೆ ನೀರುಣಿಸುವುದು ಬೆಳವಣಿಗೆಯ ಸಂಕೇತವಾಗಿರುವುದರಿಂದ, ವಾಟರಿಂಗ್ ಕ್ಯಾನ್ ಆಕಾರದ ಬ್ಯಾಗ್ ವಿನ್ಯಾಸಗೊಳಿಸಲಾಗಿದೆ ಎಂದು ಸಂಸ್ಥೆ ತಿಳಿಸಿದೆ.
ನೆಟ್ಟಿಗರ ಮಿಶ್ರ ಪ್ರತಿಕ್ರಿಯೆ
ಈ ಬ್ಯಾಗ್ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿದ್ದಂತೆ ನೆಟ್ಟಿಗರು ಬಗೆಬಗೆಯಾಗಿ ಕಾಮೆಂಟ್ ಮಾಡುತ್ತಿದ್ದಾರೆ.
"ಇಷ್ಟೊಂದು ಹಣ ಕೊಟ್ಟು ಯಾರಾದರೂ ಗಿಡಕ್ಕೆ ನೀರು ಹಾಕುವ ಕ್ಯಾನ್ ತರಹದ ಬ್ಯಾಗ್ ಖರೀದಿ ಮಾಡ್ತಾರಾ?" ಎಂದು ಒಬ್ಬರು ಪ್ರಶ್ನಿಸಿದರೆ, "ಶ್ರೀಮಂತರ ಫ್ಯಾಶನ್ ಅರ್ಥ ಮಾಡಿಕೊಳ್ಳುವುದು ಸಾಮಾನ್ಯ ಜನರಿಗೆ ಅಸಾಧ್ಯ" ಎಂದು ಇನ್ನೊಬ್ಬರು ಕಾಲೆಳೆದಿದ್ದಾರೆ.
ಇನ್ನು ಒಂದು ಹೆಜ್ಜೆ ಮುಂದೆ ಹೋಗಿರುವ ಕಂಪನಿಯು, ಇದರ ಪುಟ್ಟ ಆವೃತ್ತಿಯನ್ನು (Mini version) ಕೂಡ ಬಿಡುಗಡೆ ಮಾಡಿದೆ. ಅದರಲ್ಲಿ ಸುಂದರವಾದ ಚರ್ಮದ ಹೂವಿನ ಡಿಸೈನ್ಗಳಿದ್ದು, ಇದನ್ನು ಚಾರ್ಮ್ನಂತೆ ಬಳಸಬಹುದಾಗಿದೆ,(ಏಜೆನ್ಸೀಸ್).