ಹೆಸರು ಬೆಳೆಗೆ ಕೀಟ ಕಾಟ

ಲಕ್ಷ್ಮೇಶ್ವರ: ಪ್ರಸಕ್ತ ಮುಂಗಾರಿನ ಭರವಸೆಯೊಂದಿಗೆ ಬಿತ್ತನೆ ಮಾಡಿರುವ ಹೆಸರು ಬೆಳೆಗೆ ಕೀಟಬಾಧೆ ಮತ್ತು ಹಳದಿ ರೋಗ ಕಾಣಿಸಿಕೊಂಡು ರೈತರನ್ನು ಚಿಂತೆಗೀಡು ಮಾಡಿದೆ. ಲಕ್ಷ್ಮೇಶ್ವರ/ಶಿರಹಟ್ಟಿ ತಾಲೂಕಿನಲ್ಲಿ ಜೂನ್ ಮೊದಲ ವಾರದಲ್ಲಿಯೇ 10,045 ಹೆಕ್ಟೇರ್ ಪ್ರದೇಶದಲ್ಲಿ ಹೆಸರು ಬಿತ್ತನೆಯಾಗಿದೆ. ಉತ್ತಮವಾಗಿರುವ ಬೆಳೆಗೆ ರೋಗ ಆವರಿಸಿಕೊಳ್ಳುತ್ತಿದೆ.

ಹೂವು ಬಿಡುವ ಹಂತದಲ್ಲಿರುವ ಬೆಳೆಗೆ ಸುರಳಿಪುಚಿ, ರಸಹೀರುವ ಕೀಟ ಬಾಧೆ, ಎಲೆಚುಕ್ಕಿ, ಹಳದಿ ನಂಜಾಣು ಮತ್ತು ತಾಮ್ರದ ರೋಗಗಳು ಕಾಣಿಸಿಕೊಂಡಿವೆ.

ಲಕ್ಷ್ಮೇಶ್ವರ, ಶಿಗ್ಲಿ, ದೊಡ್ಡೂರ, ಸೂರಣಗಿ, ಬಾಲೆಹೊಸೂರ, ಅಕ್ಕಿಗುಂದ, ಬಡ್ನಿ, ಬಟ್ಟೂರ, ಹರದಗಟ್ಟಿ, ಅಡರಕಟ್ಟಿ, ಗೊಜನೂರ, ಯಳವತ್ತಿ, ಮಾಡಳ್ಳಿ ಮತ್ತಿತರ ಕಡೆ ಬೆಳೆಗೆ ರೋಗ ಬಾಧೆ ಕಾಣಿಸಿಕೊಳ್ಳುತ್ತಿದೆ.

ಪರಿಹಾರ ಕ್ರಮಕ್ಕೆ ಸೂಚನೆ:

ಶುಕ್ರವಾರ ಕೃಷಿ ಇಲಾಖೆಯ ಕೀಟ ತಜ್ಞರಾದ ಡಾ.ಸಿ.ಎಂ. ರಫಿ ಮತ್ತು ತಾಲೂಕು ಸಹಾಯಕ ಕೃಷಿ ನಿರ್ದೇಶಕ ಚಂದ್ರಶೇಖರ ನರಸಮ್ಮನವರ ಹೆಸರು ಬೆಳೆದ ರೈತರ ಜಮೀನುಗಳಿಗೆ ಭೇಟಿ ನೀಡಿ ಬೆಳೆ ಪರಿಶೀಲಿಸಿ ಪರಿಹಾರ ಕ್ರಮ ಸೂಚಿಸಿದರು.

ಪ್ರಾರಂಭ ಹಂತದಲ್ಲಿರುವ ಸುರಳಿಪುಚಿ, ರಸಹೀರುವ ಕೀಟ ಬಾಧೆ ಮತ್ತು ಎಲೆ ಚುಕ್ಕಿ ರೋಗ ನಿಯಂತ್ರಣಕ್ಕೆ 10 ಲೀಟರ್ ನೀರಿಗೆ 10 ಎಂಎಲ್ ಥಯಾಮಿಥಾಕ್ಸೆಮ್ ಮತ್ತು ಲಾಂಬ್ಡಾಸೈಥಾಲೋಥ್ರಾನ್ ದ್ರಾವಣ ಸಿಂಪಡಿಸಬೇಕು. ಅಲ್ಲದೆ, ಹಳದಿ ನಂಜಾಣು ಕೀಟ ಬಾಧೆ ಆವರಿಸಿದ ಬೆಳೆಯನ್ನು ಕಿತ್ತು ಭೂಮಿಯಲ್ಲಿ ಹೂಳುವ ಮೂಲಕ ರೋಗ ನಿಯಂತ್ರಿಸಬಹುದಾಗಿದೆ. ಹೆಚ್ಚಿನ ಮಾಹಿತಿಗೆ ಸಮೀಪದ ರೈತ ಸಂಪರ್ಕ ಕೇಂದ್ರವನ್ನು ಸಂರ್ಪಸಲು ತಿಳಿಸಿದರು.