ಹಡ್ಸನ್​ ವೃತ್ತದಲ್ಲಿ ಸ್ಕೈವಾಕ್

ಪವನ್​ ಆಚಾರ್ಯ ನೀರ್ಚಾಲು ಬೆಂಗಳೂರು ರಾಜಧಾನಿಯ ಪಾದಚಾರಿ ಮೇಲ್ಸೇತುವೆ (ಸ್ಕೈವಾಕ್​) ವರ್ಷಾಂತ್ಯಕ್ಕೆ ಜನಸೇವೆಗೆ ಲಭ್ಯವಾಗಲಿದೆ. ಸಂಚಾರ ಸಿಕ್ಕಿನ ಹಾಟ್​ಸ್ಪಾಟ್​ ಎನಿಸಿರುವ ಹಡ್ಸನ್​ ವೃತ್ತದ ಸುತ್ತ ಈ ಅತಿದೊಡ್ಡ ಸ್ಕೈವಾಕ್​​ ನಿರ್ಮಾಣ ಕಾರ್ಯ ನಿರ್ಮಾಣ ಕಾಮಗಾರಿ ಆರಂಭಿಸಿದ್ದು, ಸಾರ್ವಜನಿಕ ಖಾಸಗಿ ಸಹಭಾಗಿತ್ವ (ಪಿಪಿಪಿ) ಮಾದರಿಯಲ್ಲಿ ಯೋಜನೆ ಜಾರಿಯಾಗುತ್ತಿದೆ. ಅಂದಾಜು 2.5 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಾಣವಾಗಲಿರುವ "ಯು' ಆಕಾರದ ಸ್ಕೈವಾಕ್​​ 150 ಮೀಟರ್​ ಉದ್ದವಿರಲಿದ್ದು, ಕಬ್ಬನ್​ಪಾರ್ಕ್​ ಪ್ರವೇಶ ದ್ವಾರದ ಸಮೀಪದಿಂದ ಪ್ರಾರಂಭಗೊಂಡು, ಕಸ್ತೂರ್​ಬಾ ರಸ್ತೆ, ರಾಜಾರಾಮ್​ ಮೋಹನ್​ ರಾಯ್​ ರಸ್ತೆ, ದೇವಾಂಗ ಸಮಾಜ ರಸ್ತೆ ಮೇಲೆ ಹಾದುಹೋಗಿ ಬಿಬಿಎಂಪಿ ಪ್ರಧಾನ ಕಚೇರಿ ಸಮೀಪದವರೆಗೆ ನಿಮಾರ್ಣಗೊಳ್ಳಲಿದೆ. ಕಬ್ಬನ್​ ಪಾರ್ಕ್​ ಕಡೆಯಿಂದ ಬಿಬಿಎಂಪಿ ಪ್ರಧಾನ ಕಚೇರಿ ಕಡೆಗೆ ಸಾಗುವ ಪಾದಚಾರಿಗಳಿಗೆ ಹೆಚ್ಚು ಅನುಕೂಲವಾಗಲಿದೆ. ಸ್ಕೈವಾಕ್​​ನ ವಿನ್ಯಾಸವು ಈಗಿರುವ ಪಾದಚಾರಿ ಮಾರ್ಗವನ್ನು ಸಂಪೂರ್ಣವಾಗಿ ರ್ನಿಬಂಧಿಸಿದೆ. ಕಾಮಗಾರಿ ನೀಲಿನೆಯನ್ನು ಗಮನಿಸಿದರೆ, ಪ್ರಸ್ತಾವಿತ ಸ್ಕೈವಾಕ್​​ ಪ್ರಮುಖ ಮೂರು ರಸ್ತೆಗಳ ಮೇಲೆ ಹಾದುಹೋಗಬೇಕಿದೆ. ಬಿಬಿಎಂಪಿ ಗೋಪುರ ಮತ್ತು ವೃತ್ತದ ಹಿಂದಿನ ಖಾಲಿ ಜಾಗದಲ್ಲಿ ಅಡಿಪಾಯ ಕೆಲಸವೂ ನಡೆಯುತ್ತಿದೆ. ಕಸ್ತೂರ್​ಬಾ ರಸ್ತೆಯಲ್ಲಿ ಸ್ಕೈವಾಕ್​ನ ಕಬ್ಬಿಣದ ಕೆಲಸಗಳು ಪ್ರಾರಂಭವಾಗಿ ತಿಂಗಳಾಗಿದ್ದು, ಇನ್ನೂ 4&5 ತಿಂಗಳ ಕಾಮಗಾರಿ ಬಾಕಿಯಿದೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ. 2017ರಲ್ಲಿ ಯೋಜನೆಗೆ ಅನುಮೋದನೆ ಲಭಿಸಿತ್ತು. ತಾಂತ್ರಿಕ ಸಮಸ್ಯೆ, ಕೋವಿಡ್​ ಸೇರಿ ಹಲವು ಕಾರಣಗಳಿಂದ ಸ್ಥಗಿತಗೊಂಡಿತ್ತು. ಇದೀಗ ಮತ್ತೆ ಮರುಜೀವ ಪಡೆದುಕೊಂಡಿದೆ. ಪ್ರಯಾಣಿಕರಿಂದ ಸ್ಕೆ$ವಾಕ್​ ಉಪಯುಕ್ತತೆಯ ಬಗ್ಗೆ ಮಿಶ್ರ ಪ್ರತಿಕ್ರಿಯೆಗಳಿವೆ. ಕೆಲವರು ಉಪಯೋಗಶೂನ್ಯ ಹಾಗೂ ಉಪಯುಕ್ತ ಎಂದವರಿದ್ದಾರೆ. ಆದರೆ, ಇನ್ನೂ ಕೆಲವರು ಭಾಗಶಃ (ಕೃಷಿ ಭವನದ ಬಳಿ) ಉಪಯುಕ್ತವಾಗಬಹುದು ಎಂದು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ನಿರ್ಮಾಣ ಸವಾಲು

* ಬೃಹದಾಕಾರದ ಸೇತುವೆ ನಿರ್ಮಾಣ ಕಾಮಗಾರಿ ನಡೆಸಲು ಜಾಗದ ಕೊರತೆ.

* ಕಾಮಗಾರಿ ಪ್ರದೇಶದಲ್ಲಿ ರಕ್ಷಣಾ ಸಿಬ್ಬಂದಿ ಕೊರತೆ. ಬೆಲೆಬಾಳುವ ಕಬ್ಬಿಣದ ತುಂಡುಗಳ ಕಳವಿಗೆ ಯತ್ನ ನಡೆದಿದೆ.

* ಕಾಮಗಾರಿಗಾಗಿ ವಿದ್ಯುತ್​ ಸರಬರಾಜಿನಲ್ಲೂ ಸಮಸ್ಯೆ

* ಸಂಚಾರ ಸಿಕ್ಕಿನ ಮಧ್ಯೆ ಕಾಮಗಾರಿ ಪೂರ್ಣಗೊಳಿಸುವ ಸವಾಲು