ಸಹೋದರನ ಮಗನಿಗೆ ಪಟ್ಟ ಕಟ್ಟಿದ ಸ್ವಾಮೀಜಿ

ಆನಂದಪುರ: ಮುರುಘರಾಜೇಂದ್ರ ಮಹಾ ಸಂಸ್ಥಾನ ಮಠಕ್ಕೆ ಗುರುವಾರ ದಿಢೀರನೆ ಉತ್ತರಾಧಿಕಾರಿ ನೇಮಕ ಮಾಡಲಾಗಿದ್ದು ಭಕ್ತರಲ್ಲಿ ಅಸಮಾಧಾನಕ್ಕೆ ಕಾರಣವಾಗಿದೆ. ಹಾಲಿ ಪಟ್ಟಾಧಿಕಾರಿಯಾಗಿರುವ ಡಾ.ಮಲ್ಲಿಕಾರ್ಜುನ ಮುರುಘರಾಜೇಂದ್ರ ಸ್ವಾಮೀಜಿ, ತಮ್ಮ ಸಹೋದನ ಮಗನಿಗೆ ದಿಢೀರನೆ ದೀಕ್ಷೆ ನೀಡಿ, ಉತ್ತರಾಧಿಕಾರಿಯಾಗಿ ೋಷಿಸಿರುವುದು ಭಕ್ತರ ವಿರೋಧಕ್ಕೆ ಕಾರಣವಾಗಿದೆ. ಅಲ್ಲದೆ ಮರಿ ಸ್ವಾಮೀಜಿ ದೀಕ್ಷಾ ಕಾರ್ಯಕ್ರಮವನ್ನು ಇಲ್ಲಿನ ಪ್ರಧಾನ ಮಠದಲ್ಲಿ ನಡೆಸದೆ ದೂರದ ಬಾಗಲಕೋಟೆ ಜಿಲ್ಲೆಯ ಬಾದಾಮಿ ತಾಲೂಕಿನ ಶಿವಯೋಗ ಮಂದಿರದಲ್ಲಿ ನಡೆಸಿರುವುದು ಹಲವು ಅನುಮಾನ ಮತ್ತು ಗೊಂದಲ, ಅಸಮಾಧಾನಕ್ಕೆ ಕಾರಣವಾಗಿದೆ. ಸ್ವಾಮೀಜಿಯ ಸಹೋದರನ ಮಗ ನಿತಿನ್ ಆರಾಧ್ಯನಿಗೆ ಉತ್ತರಾಧಿಕಾರಿ ದೀಕ್ಷೆ ನೀಡಿರುವ ಬಗ್ಗೆ ಭಕ್ತರಿಂದ ಆಕ್ಷೇಪ ವ್ಯಕ್ತವಾಗಿದೆ. ಕಳೆದ ಮೇ 26ರಂದು ಮಠದಲ್ಲಿ ನಿರ್ದಿಷ್ಟ ಅಜೆಂಡ ಇಲ್ಲದೆ ಸಭೆ ನಡೆಸಿ ಹಲವು ವಿಷಯಗಳ ಚರ್ಚೆ ನಡೆಸಲಾಗಿದೆ. ಸಭೆ ಕೊನೆಯಲ್ಲಿ ಮರಿ ಸ್ವಾಮೀಜಿ ನೇಮಕದ ಬಗ್ಗೆ ಸ್ವಾಮೀಜಿ ಪ್ರಸ್ತಾಪಿಸಿದಾಗ, ಭಕ್ತರು ಯಾರು? ಎಲ್ಲಿಯವರು ಎಂದು ಪ್ರಶ್ನಿಸಿದ್ದಾರೆ. ಇದಕ್ಕೆ ಪ್ರತಿಕ್ರಿಯಿಸಿರುವ ಸ್ವಾಮೀಜಿ, ನಿತಿನ್ ಆರಾಧ್ಯಗೆ ಎರಡು ವರ್ಷಗಳ ಹಿಂದೆ ವಿಲ್ ಬರೆದಿರುವುದಾಗಿ ತಿಳಿಸಿದಾಗ ಭಕ್ತರು ವಿರೋಧ ವ್ಯಕ್ತಪಡಿಸಿದ್ದಾರೆ. ಮಠದ ಪಾರಂಪರಿಕ ಭಕ್ತರಲ್ಲಿ ಓರ್ವರಾದ ಶಾಂತಕುಮಾರ ಆಚಾಪುರ ಪ್ರತಿಕ್ರಿಯಿಸಿದ್ದು, ಇದು ಶಿಷ್ಯ ವೃಂದದ ಮಠ. ಕುಟುಂಬ ವರ್ಗದ ಮಠವಲ್ಲ. ಮಠದ ಸರ್ವ ಶಿಷ್ಯರ ಮತ್ತು ಭಕ್ತರ ಸಭೆ ನಡೆಸಿ ಯೋಗ್ಯ ಬಾಲಕನನ್ನು ಮರಿಸ್ವಾಮೀಜಿಯಾಗಿ ಆಯ್ಕೆ ಮಾಡಬೇಕು ಎಂದು ತಿಳಿಸಿದ್ದು, ಇದಕ್ಕೆ ಹಲವು ಶಿಷ್ಯರು ಸಹ ದನಿಗೂಡಿಸಿದ್ದಾರೆ.