ಸರ್ಕಾರಿ ಶಾಲೆಯಲ್ಲಿ ಪಿಂಕ್​ ರೂಂ

ಸಿಟಿಗೂ

ಹೆಣ್ಣುಮಕ್ಕಳ ಆರೋಗ್ಯಕ್ಕೆ ಒತ್ತು ನೀಡಿದ ಖಾಸಗಿ ಉದ್ಯೋಗಿ | 16ಕ್ಕೆ ಕ್ಯಾಲನೂರಿನಲ್ಲಿ 3ನೇ ಕೇಂದ್ರ ಉದ್ಘಾಟನೆ

 ಕೋಲಾರ : ಬೆಂಗಳೂರಿನ ಖಾಸಗಿ ಉದ್ಯೋಗಿಯೊಬ್ಬರು ಮಗಳಿಗೆ ಶಾಲೆಯಲ್ಲಿ ಆದ ಮುಟ್ಟಿನ ತೊಂದರೆ ಅರಿತು ಆ ರೀತಿ ಯಾವೊಬ್ಬ ಹೆಣ್ಣು ಮಗಳಿಗೂ ಆಗಬಾರದು ಎಂದು ದಾನಿಗಳ ಸಹಕಾರ ಪಡೆದು ಪಿಂಕ್​ ರೂಂಗಳ ನಿಮಾರ್ಣಕ್ಕೆ ಮುಂದಾಗಿದ್ದಾರೆ.

ಈಗಾಗಲೇ ಕೋಲಾರ ತಾಲೂಕು ಮದನಹಳ್ಳಿ ಕ್ರಾಸ್​ ಬಳಿಯ ಸರ್ಕಾರಿ ಪದವಿ ಪೂರ್ವ ಕಾಲೇಜು ಹಾಗೂ ಕುರುಗಲ್​ ಸರ್ಕಾರಿ ಶಾಲೆ ಮತ್ತು ತಾಲೂಕಿನ ಕ್ಯಾಲನೂರು ಸರ್ಕಾರಿ ಶಾಲೆಯಲ್ಲಿ ಕೊಠಡಿ ನಿರ್ಮಿಸಲಾಗಿದೆ.

ಬೆಂಗಳೂರಿನ ಉದ್ಯೋಗಿಯಾಗಿರುವ ಅಂಥೋಣಿ ಸುಜಿತ್​ ಅವರು ಈ ಕಾರ್ಯಕ್ಕೆ ಮುಂದಾಗಿದ್ದು, ಗ್ರಾಮೀಣ ಭಾಗದಿಂದ ಹತ್ತಾರು ಕಿಮೀ ದೂರದಿಂದ ಸರ್ಕಾರಿ ಶಾಲೆ&ಕಾಲೇಜಿಗೆ ಹೆಣ್ಣು ಮಕ್ಕಳು ಶಿಕ್ಷಣ ಪಡೆಯಲು ಬರುತ್ತಾರೆ. ಶಾಲೆ ಅವಧಿಯಲ್ಲಿ ಮುಟ್ಟು ಆದಾಗ ಅನೇಕ ತೊಂದರೆ ಅನುಭವಿಸುವ ಪ್ರಸಂಗಗಳು ಎದುರಾಗುತ್ತವೆ. ಕೆಲವು ಶಾಲೆಗಳಲ್ಲಿ ಸುಸಜ್ಜಿತ ಶೌಚಗೃಹ ಇರುವುದಿಲ್ಲ. ಇದ್ದರೂ ನೀರಿನ ಕೊರತೆ, ವಿಶ್ರಾಂತಿ ಕೊಠಡಿಗಳ ಸಮಸ್ಯೆಯಿಂದ ಮುಜುಗರ ಅನುಭವಿಸುತ್ತಾರೆ. ಈ ಸಮಸ್ಯೆ ನೀಗಿಸಲು ಅಂಥೋಣಿ ಸುಜಿತ್​ ಪಿಂಕ್​ ರೂಂಗಳ ನಿಮಾರ್ಣಕ್ಕೆ ಮಂದಾಗಿದ್ದಾರೆ.

ಏನಿದು ಪಿಂಕ್​ ರೂಂ?

ಪಿಂಕ್​ ರೂಂನಲ್ಲಿ ತಲಾ ಒಂದು ಭಾರತೀಯ ಹಾಗೂ ಪಾಶ್ಚಿಮಾತ್ಯ ಶೈಲಿಯ ಶೌಚಗೃಹ, ಉಡುಪು ಬದಲಾಯಿಸುವ ಕೊಠಡಿ, ಕೈ ತೊಳೆಯುವ ಬೇಷಿನ್​, ಸ್ಯಾನಿಟರಿ ಪ್ಯಾಡ್​ ಯಂತ್ರ, ಪ್ಯಾಡ್​ ಸುಡುವ ಯಂತ್ರ, ಎರಡು ಮಂಚ ಹಾಗೂ ಎರಡು ಹಾಸಿಗೆ ವ್ಯವಸ್ಥೆ ಇದೆ. ಓದಲು ಟೇಬಲ್​ ಹಾಗೂ ಪುಸ್ತಕಗಳು ಲಭ್ಯವಿರುತ್ತವೆ.

ಸರ್ಕಾರ, ದಾನಿಗಳು ಮುಂದೆ ಬರಬೇಕು

ಸರ್ಕಾರಿ ಶಾಲೆಗಳಲ್ಲಿ ಹೆಣ್ಣು ಮಕ್ಕಳಿಗೆ ಮುಟ್ಟಿನ ವೇಳೆ ಸೌಲಭ್ಯಗಳು ಇಲ್ಲದ 2 ಶಾಲೆಗಳಲ್ಲಿ ಪಿಂಕ್​ ರೂಂ ಪ್ರಾರಂಭಿಸಿದ್ದೇನೆ. ಮೂರನೇಯದಾಗಿ ಕ್ಯಾಲನೂರು ಪದವಿ ಪೂರ್ವ ಕಾಲೇಜಿನಲ್ಲಿ ಪ್ರಾರಂಭಿಸಲಾಗಿದ್ದು, ಶನಿವಾರ ಉದ್ಘಾಟನೆಗೊಳ್ಳಲಿದೆ. ಸರ್ಕಾರ ಕಾರ್ಖಾನೆಗಳ ಸಿಎಸ್​ಆರ್​ ಅನುದಾನ, ದಾನಿಗಳ ಸಹಾಯ ಪಡೆದು ಜಿಲ್ಲೆಯ ಎಲ್ಲ ಸರ್ಕಾರಿ ಶಾಲಾ ಕಾಲೇಜುಗಳಲ್ಲಿ ಪ್ರಾರಂಭಿಸುವ ಜತೆಗೆ ಖಾಸಗಿ ಶಾಲಾ ಕಾಲೇಜುಗಳಲ್ಲೂ ಪ್ರಾರಂಭಿಸುವ ಚಿಂತನೆ ಮಾಡಲಾಗಿದೆ ಎಂದು ಅಂಥೋಣಿ ತಿಳಿಸಿದ್ದಾರೆ.

ನತೆಯಿಂದ ಬದುಕುವ ಬದಲಾವಣೆ

ವಿದ್ಯಾರ್ಥಿನಿಯರು ತಿಂಗಳ ಋತು ಸಮಯದಲ್ಲಿ ತರಗತಿ ತಪ್ಪಿಸಿಕೊಳ್ಳಬಾರದು, ಬದಲಾಗಿ ಈ ಕೊಠಡಿಯಲ್ಲಿ ವಿಶ್ರಾಂತಿ ಪಡೆದು ಮತ್ತೆ ತರಗತಿಗೆ ಹೋಗಬಹುದು ಎಂಬ ಉದ್ದೇಶದಿಂದ ಸೌಲಭ್ಯ ಕಲ್ಪಿಸಲಾಗಿದೆ. ಗ್ರಾಮೀಣ ಶಾಲೆಗಳಿಗೆ ದೂರದಿಂದ ಬರುವ ಪ್ರತಿ ಬಾಲಕಿಗೂ ಇಂಥ ಸೌಲಭ್ಯ ಸಿಗಬೇಕೆಂಬ ನಿಟ್ಟಿನಲ್ಲಿ ಯೋಜನೆಯ ನೆರವಿಗೆ ಪ್ರತಿಯೊಬ್ಬರೂ ಕೈಜೋಡಿಸಬೇಕೆಂದು ಅಂಥೋಣಿ ಸಜೀತ್​ ಕೋರುತ್ತಾರೆ. ಮುಟ್ಟಿನ ಅವಧಿಯಲ್ಲಿ ಯುವತಿಯರು ಧೈರ್ಯ ಹಾಗೂ ಘನತೆಯಿಂದ ಬದುಕುವ ವಾತಾವರಣ ಸೃಷ್ಟಿಸುವ ಮೂಲಕ ಬದಲಾವಣೆ ಬರೆಯೋಣ ಎಂದು ಮನವಿ ಮಾಡಿದ್ದಾರೆ ಖಾಸಗಿ ಉದ್ಯಮಿ.