ರೈತರ ಗೋಳು ಕೇಳದ ಸರ್ಕಾರ : ರಾಗಿ ಖರೀದಿ ನಿಲ್ಲಿಸಿದ್ದರಿಂದ ಅಲೆದಾಟ, ತಂತ್ರಜ್ಞಾನ, ಮಾಹಿತಿ ಕೊರತೆ

ಮುಳಬಾಗಿಲು: ರಾಗಿ ಖರೀದಿಗೆ ಸರ್ಕಾರ ಹಲವು ನಿಬಂಧನೆ ಹಾಕಿದ್ದು, ಬಹುತೇಕ ರೈತರು ರಾಗಿ ಮಾರಾಟದಿಂದ ವಂಚಿತರಾಗುತ್ತಿದ್ದಾರೆ. 2021&-22ನೇ ಸಾಲಿನಲ್ಲಿ ಬೆಂಬಲ ಬೆಲೆ ಯೋಜನೆಯಡಿ ರೈತರ ನೋಂದಣಿಗಾಗಿ ್ರೂಟ್ಸ್​ ಐ.ಡಿ.ಕಡ್ಡಾಯ ಮಾಡಿದ್ದು, ಐ.ಡಿ.ಪಡೆದರೂ ಸರ್ಕಾರ ಖರೀದಿಗೆ ಮಿತಿ ನಿಗದಿಪಡಿಸಿ 25 ಸಾವಿರ ರೈತರಲ್ಲಿ 120 ರೈತರಿಗೆ ಮಾತ್ರ ನೋಂದಣಿಗೆ ಅವಕಾಶ ನೀಡಿರುವುದು ಕಂಡು ಬಂದಿದೆ. ಫ್ರೂಟ್ಸ್​ ಐ.ಡಿಯಲ್ಲಿ ರಾಗಿ ಬೆಳೆ ಮಾಹಿತಿ, ಬೆಳೆ ಸಮೀಕ್ಷೆಯಲ್ಲಿ ದಾಖಲೆ ಸರಿಪಡಿಸಿಕೊಂಡು ಬರುವ ವೇಳೆಗೆ ನೋಂದಣಿಯಲ್ಲಿ ತಾಂತ್ರಿಕ ಸಮಸ್ಯೆ, ಜತೆಗೆ ನಿಗದಿತ ಪ್ರಮಾಣದ ಖರೀದಿ ರಾಜ್ಯದಲ್ಲಿ ಮುಗಿದಿದೆ ಎಂಬ ಮಾಹಿತಿಯಿಂದ ರೈತರು ಮನೆಗೆ ವಾಪಸ್​ ತೆರಳುತ್ತಿದ್ದಾರೆ. ಸರ್ಕಾರ 3377 ರೂ.ಗೆ ಕ್ವಿಂಟಾಲ್​ ರಾಗಿ ಖರೀದಿ ಮಾಡಿದರೆ ಒಂದಷ್ಟು ಲಾಭ ಸಿಗುತ್ತದೆ ಎಂಬ ಆಸೆ ರೈತನಲ್ಲಿ ಕಮರಿಹೋಗಿದೆ. ಕಳೆದ 2 ದಿನಗಳಿಂದ ರಾಗಿ ಖರೀದಿ ನೋಂದಣಿ ಆರಂಭವಾಗಿದ್ದು, 120 ರೈತರು ನೋಂದಣಿ ವೇಳೆಗೆ ನಿಗದಿತ ಪ್ರಮಾಣದ ರಾಗಿ ನೋಂದಣಿ ಸ್ಥಗಿತಗೊಂಡಿದ್ದು, ಬಹುತೇಕ ರೈತರು ರಾಗಿ ಮಾರಾಟ ಮಾಡಲು ಸಾಧ್ಯವಾಗದೆ, ಖಾಸಗಿ ವ್ಯಾಪಾರಿ, ದಲ್ಲಾಳಿಗಳ ಬಲೆಗೆ ಬೀಳುವಂತಾಗಿದೆ.