ಮೋದಿ ಅವಧಿಯಲ್ಲಿ ರೈಲ್ವೆ ಅಭಿವೃದ್ಧಿ

ಕೊಪ್ಪಳ: ಪ್ರಧಾನಿ ನರೇಂದ್ರ ಮೋದಿ ಅವಧಿಯಲ್ಲಿ ನಮ್ಮ ಲೋಕಸಭಾ ಕ್ಷೇತ್ರದ ರೈಲ್ವೆ ಯೋಜನೆಗಳು ಸಾಕಷ್ಟು ಅಭಿವೃದ್ಧಿ ಆಗಿವೆ ಎಂದು ಸಂಸದ ಸಂಗಣ್ಣ ಕರಡಿ ಹೇಳಿದರು.

ನಗರದ ರೈಲ್ವೆ ನಿಲ್ದಾಣದಲ್ಲಿ ಭಾನುವಾರ ಹಮ್ಮಿಕೊಂಡಿದ್ದ ರೈಲು ನಿಲ್ದಾಣ ಮರು ನಿರ್ಮಾಣ ಕಾಮಗಾರಿ ಭೂಮಿ ಪೂಜಾ ಕಾರ್ಯಕ್ರಮದಲ್ಲಿ ಮಾತನಾಡಿದರು. ದೇಶದ ಅಭಿವೃದ್ಧಿಗಾಗಿ ಮೋದಿ ತಮ್ಮನ್ನು ಅರ್ಪಿಸಿಕೊಂಡಿದ್ದಾರೆ. ಅವರ ದೂರದೃಷ್ಟಿ ಇತರರಲ್ಲಿ ಕಾಣಲು ಸಾಧ್ಯವಿಲ್ಲ. 508 ರೈಲು ನಿಲ್ದಾಣಗಳು ಏಕಕಾಲಕ್ಕೆ ಅಭಿವೃದ್ಧಿ ಆಗಲಿವೆ. ಇದೇ ಬದಲಾವಣೆ.

ಜಗತ್ತಿನ ಮೂರನೇ ದೇಶವಾಗಬೇಕೆಂಬ ಗುರಿ

ಭಾರತ ಅಭಿವೃದ್ಧಿಯಲ್ಲಿ ಜಗತ್ತಿನ ಮೂರನೇ ದೇಶವಾಗಬೇಕೆಂಬ ಗುರಿ ಇಟ್ಟುಕೊಂಡಿದ್ದಾರೆ. ಸಾರಿಗೆ ಸಂಪರ್ಕವನ್ನು ಅತಿ ಹೆಚ್ಚು ವಿಸ್ತರಿಸುವುದು ಅಭಿವೃದ್ಧಿ ಸಂಕೇತ. ಕೊಪ್ಪಳ ನಿಲ್ದಾಣಕ್ಕೆ 21 ಕೋಟಿ ರೂ., ಮುನಿರಾಬಾದ್ ನಿಲ್ದಾಣಕ್ಕೆ 20 ಕೋಟಿ ರೂ. ಮಂಜೂರಾಗಿದ್ದು, ಮರು ನಿರ್ಮಾಣವಾಗಲಿವೆ. ಅದರಂತೆ ಗಂಗಾವತಿ ನಿಲ್ದಾಣ ಅಭಿವೃದ್ಧಿ ಮಾಡಲು ಮನವಿ ಸಲ್ಲಿಸಿರುವೆ. ಇದಕ್ಕೆ ರೈಲ್ವೆ ಮಂತ್ರಿ ಅಶ್ವಿನ್ ವೈಷ್ಣವ್ ಒಪ್ಪಿಗೆ ಸೂಚಿಸಿದ್ದಾರೆ ಎಂದರು.

ಇದನ್ನೂ ಓದಿ: ರಾಜ್ಯಕ್ಕೆ 47 ಸಾವಿರ ಕೋಟಿ ರೂ. ಅನುದಾನ

ರೈಲ್ವೆ ಯೋಜನೆಗಳು ಮೊದಲು ರಾಜ್ಯ, ಕೇಂದ್ರ ಸರ್ಕಾರದ ಸಹಭಾಗಿತ್ವದಲ್ಲಿ ನಡೆಯುತ್ತಿದ್ದವು. ಹೀಗಾಗಿ ಸ್ವಾಮಿ ವಿವೇಕಾನಂದ ಶಾಲೆ, ಹುಲಿಗಿ ಸೇತುವೆಗಳು ನನೆಗುದಿಗೆ ಬಿದ್ದಿವೆ. ಆದರೆ ಹೊಸ ನಿಯಮದಂತೆ ಆ ಎಲ್ಲ ಯೋಜನೆಗಳಿಗೆ ಅನುದಾನ ದೊರೆಯಲಿದ್ದು, ಶೀಘ್ರವೇ ಪೂರ್ಣಗೊಳ್ಳಲಿವೆ. ಕುಷ್ಟಗಿ ರೈಲ್ವೆ ಮೇಲ್ಸೇತುವೆ ಯೋಜನೆ ಮರು ನಿಗದಿಯಾಗಿದ್ದು, ಅದಕ್ಕೂ ಅನುದಾನ ಬಿಡುಗಡೆ ಆಗಲಿದೆ. ಮೆಡಿಕಲ್ ಕಾಲೇಜು ರಸ್ತೆಗೂ 35 ಕೋಟಿ ರೂ. ಅನುದಾನ ಬಿಡುಗಡೆಯಾಗಿದೆ. ಅಲ್ಲಿಯೂ ಸೇತುವೆ ಆಗಲಿದೆ ಎಂದು ಮಾಹಿತಿ ನೀಡಿದರು.

ಬ್ಲಡ್ ಬ್ಯಾಂಕ್‌ಗೆ ಪರವಾನಗಿ, ಬೈಪಾಸ್ ರಸ್ತೆ, ಕೇಂದ್ರೀಯ ವಿದ್ಯಾಲಯ ನಿರ್ಮಾಣ, ಭಾಗ್ಯನಗರ ಸೇತುವೆ, ಮಳೆ ಮಾಪನ ಕೇಂದ್ರ, ಮೆಡಿಕಲ್ ಕಾಲೇಜು, ಜೂನ್ ವೇಳೆಗೆ ಕುಷ್ಟಗಿವರೆಗೆ ರೈಲು ಓಡಲಿದೆ. ಕೇವಲ ನಾಲ್ಕೈದು ವರ್ಷದಲ್ಲಿ ತಳಕಲ್-ವಾಡಿ ಕಾಮಗಾರಿ ವೇಗವಾಗಿ ನಡೆದಿದೆ. 1990ರಲ್ಲಿ ಆರಂಭವಾದ ಮುನಿರಾಬಾದ್- ಮೆಹಬೂಬ್ ನಗರ 20 ವರ್ಷವಾದರೂ ಮುಗಿದಿಲ್ಲ. ನಾನು ಸಂಸದನಾದ ಮೇಲೆ ಸಿಂಧನೂರಿನವರೆಗೆ ಹಳಿ ಆಗಿದೆ. ಶೀಘ್ರ ರೈಲು ಓಡಲಿದೆ. ಸಿಂಧನೂರು-ಮಸ್ಕಿ, ಕುಕನೂರು-ಯಲಬುರ್ಗಾ ಮಂಜೂರಾಗಿವೆ. ಪುಣಾ-ಬೆಂಗಳೂರು ನಮ್ಮ ಜಿಲ್ಲೆಯಲ್ಲಿ ಹಾದು ಹೋಗಲಿದೆ. ಜಿಲ್ಲೆಗೆ ವಿಮಾನ ನಿಲ್ದಾಣ ಬೇಕಿದೆ. ನಮ್ಮ ಸರ್ಕಾರ ಕೆಕೆಆರ್‌ಡಿಬಿಯಲ್ಲಿ 40 ಕೋಟಿ ರೂ. ಅನುದಾನ ಘೋಷಿಸಿದೆ. ಆದರೆ ಅನುಷ್ಠಾನ ಮಾಡಿಲ್ಲ. ಈಗಿನ ಸರ್ಕಾರ ಅದನ್ನು ಮುಂದುವರಿಸಬೇಕಿದೆ.

ಸೂಪರ್ ಸ್ಪೇಷಾಲಿಟಿ ಆಸ್ಪತ್ರೆ ಆಗಬೇಕಿದೆ. ಈ ಬಗ್ಗೆಯೂ ಕೇಂದ್ರ ಆರೋಗ್ಯ ಸಚಿವ ಮನಸೂಕ್ ಮಾಂಡವೀಯ ಅವರಿಗೆ ಪತ್ರವ್ಯವಹಾರ ನಡೆಸಿರುವೆ. ಅವರು ಒಪ್ಪಿಗೆ ಸೂಚಿಸಿದ್ದು, ರಾಜ್ಯ ಸರ್ಕಾರ ಪ್ರಸ್ತಾವನೆ ಸಲ್ಲಿಸಬೇಕು. ನಮ್ಮ ರೈಲ್ವೆ ಅಧಿಕಾರಿಗಳು ಅಭಿವೃದ್ಧಿಗಾಗಿ ಸಾಕಷ್ಟು ಶ್ರಮಿಸಿದ್ದಾರೆ ಎಂದರು.

ನಗರಸಭೆ ಸದಸ್ಯರಾದ ವಿದ್ಯಾ ಹೆಸರೂರು, ಉಮಾ ಪಾಟೀಲ್, ದೇವಕ್ಕ ಕಂದಾರಿ, ಸರ್ವೇಶಗೌಡ ಬನ್ನಿಕೊಪ್ಪ, ಡಿಸಿ ಎಂ.ಸುಂದರೇಶ ಬಾಬು, ಎಸ್ಪಿ ಯಶೋದಾ ವಂಟಗೋಡಿ, ಮಾಜಿ ಶಾಸಕರಾದ ಕೆ.ಶರಣಪ್ಪ, ಪರಣ್ಣ ಮುನವಳ್ಳಿ, ಹುಬ್ಬಳ್ಳಿ ರೈಲ್ವೆ ಎಡಿಎಂ ಸಂಜಯ್ ಸಿಂಗ್, ಸಾರ್ವಜನಿಕ ಸಂಪರ್ಕಾಧಿಕಾರಿ ಪ್ರಾಣೇಶ್ ಇತರರಿದ್ದರು.

ದೊಡ್ಡನಗೌಡ ಪಾಟೀಲ್, ಶಾಸಕ

ಹೇಮಲತಾ ನಾಯಕ, ವಿಪ ಸದಸ್ಯೆ

ಸಂಗಣ್ಣ ಕರಡಿ, ಸಂಸದ