ಮಾವಿಗೆ ಊಜಿ ನೊಣ ಕಾಟ : ಹವಾಮಾನ ಏರುಪೇರಿನಿಂದ ಬಂದೊದಗಿದ ಮತ್ತೊಂದು ಸಮಸ್ಯೆ, ಬೆಳೆಗಾರರಿಗೆ ಆದಾಯ ಖೋತಾ ಭೀತಿ

ಎನ್​. ವೆಂಕಟೇಶ್​ ಚಿಕ್ಕಬಳ್ಳಾಪುರ

ಫಸಲು ಮಾರಾಟದ ಸಂದರ್ಭದಲ್ಲಿ ಮಾವಿಗೆ ಊಜಿ ನೊಣ ಸಮಸ್ಯೆ ಕಾಡಲಾರಂಭಿಸಿದೆ. ಇದರಿಂದಾಗಿ ಬೆಳೆಗಾರರು ಆದಾಯ ಖೋತಾ ಆಗುವ ಆತಂಕಕ್ಕೆ ಒಳಗಾಗಿದ್ದಾರೆ.

ಇತ್ತೀಚೆಗೆ ಸುರಿದ ಬಿರುಗಾಳಿಸಹಿತ ಆಲಿಕಲ್ಲು ಮಳೆಗೆ ಅಲ್ಲಲ್ಲಿ ಮಾವು ಬೆಳೆ ಹಾಳಾಗಿದೆ. ಇದೀಗ ಹವಾಮಾನ ಏರುಪೇರಿನಿಂದಾಗಿ ಮರದಲ್ಲೇ ಬಲಿತಿರುವ ಮಾವಿನಲ್ಲಿ ನೊಣ (ಊಜಿ) ಬಾಧೆ ಹೆಚ್ಚಾಗುತ್ತಿದೆ. ಇದರಿಂದ ನಷ್ಟ ಅನುಭವಿಸುವಂತಾಗಿದೆ ಎಂದು ಬೆಳೆಗಾರರು ಅಳಲು ತೋಡಿಕೊಂಡಿದ್ದಾರೆ.

ಜಿಲ್ಲೆಯ ಆರು ತಾಲೂಕಿನಲ್ಲಿ 12 ಸಾವಿರ ಹೆಕ್ಟೇರ್​ ಪ್ರದೇಶದಲ್ಲಿ ಮಾವು ಬೆಳೆಯಲಾಗಿದೆ. ಪ್ರಸಕ್ತ ವರ್ಷ ಹವಾಮಾನದಲ್ಲಿನ ಬದಲಾವಣೆಯಿಂದ ಶೇ.60 ಪ್ರಮಾಣದಲ್ಲಿ ಮಾವು ಇಳುವರಿ ಕುಸಿದಿದೆ. ಅಳಿದುಳಿದ ಬೆಳೆಯನ್ನು ರಸಿಕೊಳ್ಳಲು ಕೀಟ ಬಾಧೆ ಅಡ್ಡಿಯಾಗಿದೆ. ಇದು ಹಣ್ಣುಗಳ ರಾಜ ಮಾರುಕಟ್ಟೆಗೆ ಲಗ್ಗೆ ಇಡುವ ಸಮಯ. ಭರಪೂರ ಆದಾಯ ತಂದು ಕೊಡಬೇಕಾದ ಸಂದರ್ಭದಲ್ಲೇ ಕೀಟ ಸಮಸ್ಯೆ ಕಾಣಿಸಿಕೊಂಡಿರುವುದು ಗಾಯದ ಮೇಲೆ ಬರೆ ಎಳೆದಂತೆ ಆಗಿದೆ.

ಶೇ.25 ಇಳುವರಿ ನಷ್ಟ ಭೀತಿ: ಊಜಿ ನೊಣದ ಬಾಧೆಯಿಂದ ಸರಾಸರಿ ಶೇ.25 ಮಾವು ಇಳುವರಿ ನಷ್ಟವಾಗುತ್ತದೆ ಎಂದು ಅಂದಾಜಿಸಲಾಗುತ್ತಿದೆ. ಉಳಿದಿರುವ ಬೆಳೆಯ ಗುಣಮಟ್ಟ ಕುಸಿತದಿಂದ ಮಾರುಕಟ್ಟೆಯಲ್ಲಿ ನಿರೀತ ಬೆಲೆ ಸಿಗುವ ಬಗ್ಗೆ ಅನುಮಾನ ವ್ಯಕ್ತವಾಗುತ್ತಿದೆ.

ಮೋಹಕ ಬಲೆ ಪರಿಣಾಮಕಾರಿ: ಊಜಿ ನೊಣದ ಹತೋಟಿಗೆ ರೈತರು ಮೋಹಕ ಬಲೆ ತಂತ್ರ ಬಳಸಬೇಕು ಎಂದು ತೋಟಗಾರಿಕೆ ಇಲಾಖೆ ಸಲಹೆ ನೀಡಿದೆ. ಒಂದು ಲೀಟರ್​ ಸಾಮರ್ಥ್ಯದ ಖಾಲಿ ಪ್ಲಾಸ್ಟಿಕ್​ ಬಾಟಲಿಯ ಸ್ವಲ್ಪ ಕೆಳ ಭಾಗದಲ್ಲಿ 2 ರಂಧ್ರ ಕೊರೆಯಬೇಕು. ಬಾಟಲಿಯ ಒಳಗೆ ಒಂದು ಮರದ ತುಂಡು ಕಟ್ಟಬೇಕು. ಆ ಮರದ ತುಂಡಿನ ಮೇಲೆ 1 ಮಿಲೀ ಮೀಥೈಲ್​ ಯೂಜಿನಾಲ್​ ಮತ್ತು 1 ಮೀಲಿ ಡೈಕ್ಲೋರಾವಾಸ್​ ಔಷಧ ಲೇಪಿಸಬೇಕು. ಬಾಟಲಿಯ ಮುಚ್ಚಳ ಹಾಕಿದ ನಂತರ, ಅದನ್ನು ಆಳೆತ್ತರದಲ್ಲಿ ಮಾವಿನ ಮರದ ಕೊಂಬೆಗೆ ಕಟ್ಟಬೇಕು. ಔಷಧ ವಾಸನೆಯಿಂದ ಆಕಷಿರ್ತವಾದ ಊಜಿ ನೊಣಗಳಲ್ಲಿ ಶೇ.90 ನೊಣಗಳು ಬಾಟಲಿ ಪ್ರವೇಶಿಸಿ ಸಾಯುತ್ತವೆ ಎಂದು ವಿವರಿಸಿದೆ. ಮಾರುಕಟ್ಟೆಯಲ್ಲಿ ಸಿದ್ಧ ಮೋಹಕ ಬಲೆಗಳು ಸಿಗುತ್ತವೆ. ಒಂದು ಎಕರೆ ಮಾವಿನ ತೋಟಕ್ಕೆ 5ರಿಂದ 6 ಕಡೆ ಮೋಹಕ ಬಲೆ ಕಟ್ಟಬೇಕು. ಇನ್ನು ಪ್ರಾರಂಭದಲ್ಲಿಯೇ ನೊಣದ ಹತೋಟಿಗೆ ಕ್ರಮ ಕೈಗೊಳ್ಳದಿದ್ದರೆ ಇಳುವರಿ ಹಾಳಾಗುವ ಸಾಧ್ಯತೆ ಹೆಚ್ಚಾಗುತ್ತದೆ ಎಂದು ಎಚ್ಚರಿಕೆ ನೀಡಿದೆ.