ಬನ್ನೇರುಘಟ್ಟದಲ್ಲಿ ಮರಳಿದ ವೈಭವ, ಪ್ರವಾಸಿಗರನ್ನು ಸೆಳೆಯುತ್ತಿರುವ ಪ್ರಾಣಿ ಪ್ರಪಂಚ ಆನೆಮರಿಗಳ ಜಲಕ್ರೀಡೆಗೆ ಫಿದಾ

ನವೀನ್ ಚಂದ್ರ ಶೆಟ್ಟಿ ಆನೇಕಲ್

ಎರಡು ವರ್ಷದಿಂದ ಮಂಕು ಕವಿದಿದ್ದ ಬನ್ನೇರುಘಟ್ಟ ಜೈವಿಕ ಉದ್ಯಾನದಲ್ಲಿ ಪ್ರವಾಸಿಗರ ಕಲರವ ಆರಂಭವಾಗಿದೆ. ಬೇಸಿಗೆ ರಜೆ ಹಿನ್ನೆಲೆಯಲ್ಲಿ ಪ್ರಾಣಿ ಪಕ್ಷಿಗಳ ವೀಕ್ಷಣೆಗೆ ಸಾವಿರಾರು ಪ್ರವಾಸಿಗರು ಭೇಟಿ ನೀಡುತ್ತಿದ್ದು, ಉದ್ಯಾನದ ವೈಭವ ಮರುಕಳಿಸಿದೆ.

ಪ್ರತಿದಿನ ಸಾವಿರಾರು ಪ್ರವಾಸಿಗರು ಪ್ರಾಣಿ-ಪಕ್ಷಿಗಳ ವೀಕ್ಷಣೆಗೆ ಬರುತ್ತಿರುವ ದೃಶ್ಯ ಕಂಡುಬರುತ್ತಿದೆ.

ಬೇಸಿಗೆಯಲ್ಲಿ ಪ್ರಾಣಿಗಳು ಉದ್ಯಾನದ ಕೆರೆ ಹಾಗೂ ಕೊಳ್ಳಗಳ ನೀರಿನಲ್ಲಿ ಆಟವಾಡುತ್ತಿರುವುದನ್ನು ಕಣ್ತುಂಬಿಕೊಳ್ಳಲು ಪ್ರವಾಸಿಗರು ಮುಗಿಬೀಳುತ್ತಿದ್ದಾರೆ. ಅದರಲ್ಲೂ ಉದ್ಯಾನದ ಆನೆ ಬಿಡಾರ, ಸೀಗೆಕಟ್ಟೆ ಕೆರೆಯಲ್ಲಿ 20ಕ್ಕೂ ಹೆಚ್ಚು ಆನೆಗಳು, ಮರಿಗಳ ಜತೆ ಜಲಕ್ರೀಡೆ ನಡೆಸುತ್ತಿರುವುದು ಪ್ರಮುಖ ಆಕರ್ಷಣೆ ಎನಿಸಿದೆ. ಮಾವುತರು ಆನೆಗಳನ್ನು ನೀರಿನಿಂದ ಹೊರತರಲು ಹರಸಾಹಸ ನಡೆಸುವುದು, ಆನೆಗಳು ಹೊರಬರಲು ಹಿಂದೇಟು ಹಾಕುವ ದೃಶ್ಯ ಪ್ರವಾಸಿಗರಿಗೆ ಮನರಂಜನೆ ನೀಡುತ್ತಿದೆ.

ನೀರಿಗಿಲ್ಲ ಕೊರತೆ: ಉದ್ಯಾನದಲ್ಲಿ ಜಿರಾಫೆ, ಜೀಬ್ರಾ, ಹುಲಿ, ಹಾವು ಸೇರಿ ನೂರಾರು ಪ್ರಾಣಿಗಳ ನೀರಿನ ದಾಹ ತಣಿಸಲು ಕೊಳವೆಬಾವಿಗಳನ್ನು ಕೊರೆಸಲಾಗಿದ್ದು, ಬೇಸಿಗೆಯಾದರೂ ಎಲ್ಲಿಯೂ ನೀರಿನ ಕೊರತೆ ಎದುರಾಗದಂತೆ ಸಿಬ್ಬಂದಿ ಮುಂಜಾಗ್ರತೆ ವಹಿಸಿದ್ದಾರೆ. ಜಿಂಕೆ, ಕಡವೆ ಸೇರಿ ನೂರಾರು ಪ್ರಾಣಿಗಳನ್ನು ಒಂದೇ ಜಾಗದಲ್ಲಿ ನೋಡುವ ವ್ಯವಸ್ಥೆ ಇರುವುದು ಪ್ರವಾಸಿಗರ ನೆಚ್ಚಿನ ತಾಣವಾಗಿ ಗುರುತಿಸಿಕೊಂಡಿದೆ.