ಹುಬ್ಬಳ್ಳಿ: ಕರೊನಾ ಸೋಂಕಿನಿಂದ ಗುಣ ಹೊಂದಿ ಕರ್ತವ್ಯಕ್ಕೆ ಹಾಜರಾಗಿರುವ ಘಂಟಿಕೇರಿ ಪೊಲೀಸ್ ಠಾಣೆ ಕಾನ್ಸ್ಟೇಬಲ್ ವಿಠ್ಠಲ ಮಾದರ ಸೋಂಕಿತ ವೃದ್ಧರೊಬ್ಬರಿಗೆ ಪ್ಲಾಸ್ಮಾ ದಾನ ಮಾಡುವ ಮೂಲಕ ಇತರರಿಗೆ ಮಾದರಿ ಎನಿಸಿದ್ದಾರೆ.
ಆ.3ರಂದು ಸೋಂಕಿಗೆ ತುತ್ತಾಗಿದ್ದ ವಿಠ್ಠಲ, ದೇಶಪಾಂಡೆ ಫೌಂಡೇಶನ್ ಕೋವಿಡ್ ಕೇರ್ ಸೆಂಟರ್ನಲ್ಲಿ ಚಿಕಿತ್ಸೆ ಪಡೆದು ಆ.12ರಂದು ಬಿಡುಗಡೆಯಾಗಿದ್ದರು. ನವನಗರದ ಕ್ಯಾನ್ಸರ್ ಆಸ್ಪತ್ರೆಯ ಕೋವಿಡ್ ಸೆಂಟರ್ನಲ್ಲಿ ದಾಖಲಾಗಿರುವ ಸೋಂಕಿತ ವೃದ್ಧರೊಬ್ಬರಿಗೆ ‘ಎ’ ಪಾಸಿಟಿವ್ ರಕ್ತದ ಗುಂಪಿನವರ ಪ್ಲಾಸ್ಮಾ ಬೇಕಿತ್ತು. ಈ ಬಗ್ಗೆ ಮಾಹಿತಿ ದೊರೆತ ಕೂಡಲೇ ವಿಠ್ಠಲ ಪ್ಲಾಸ್ಮಾ ದಾನ ಮಾಡಿ ಸೋಂಕಿತರೊಬ್ಬರ ಜೀವ ಉಳಿಸಲು ಮುಂದಾಗಿದ್ದಾರೆ. ಒತ್ತಡದ ಕರ್ತವ್ಯದ ನಡುವೆಯೂ ಪ್ಲಾಸ್ಮಾ ದಾನ ಮಾಡಿದ ವಿಠ್ಠಲ ಕಾರ್ಯಕ್ಕೆ ಇನ್ಸ್ಪೆಕ್ಟರ್ ಮಹಾಂತೇಶ ಹೊಳಿ ಸೇರಿ ಎಲ್ಲ ಸಿಬ್ಬಂದಿ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.