ಬೆಂಗಳೂರು: ಕಾಮಗಾರಿಗೆ ಟೆಂಡರ್ ಕರೆದ ಅನುದಾನ ವಾಪಸ್ ಪಡೆಯಲು ಬರುವುದಿಲ್ಲ. ಸಿಎಂ ಸಿದ್ದರಾಮಯ್ಯ ಅಡಿಗಲ್ಲು ಹಾಕಿದ ಕಾಮಗಾರಿ ಹಣ ಹಿಂಪಡೆದಿರುವುದು ಅವಮಾನಿಸಿದಂತಾಗಿದೆ.
ಇದಕ್ಕಾಗಿ 50 ಬಾರಿ ಪತ್ರ ಬರೆದೆ, ನಾಯಿಯಂತೆ ಅಲೆದೆ, ನಿಮ್ಮ ಕಾಲು ಹಿಡಿಯುವುದೊಂದೇ ಬಾಕಿಯಿದೆ.
ತುಮಕೂರು ಗ್ರಾಮಾಂತರದ ಬಿಜೆಪಿ ಶಾಸಕ ಬಿ.ಸುರೇಶ್ಗೌಡ ರೋಷಾವೇಶದ ಮಾತುಗಳಿವು, ವಿಧಾನಸಭೆಯಲ್ಲಿ ಮಾರ್ದನಿಸಿ ಸ್ಪೀಕರ್ ಆದಿಯಾಗಿ ಇಡೀ ಸದನ ಅತ್ತ ತಿರುಗಿತು. ಶಾಲಾ ಶಿಕ್ಷಣ ಸಚಿವ ಮಧು ಬಂಗಾರಪ್ಪ ವಿರುದ್ಧ ಸುರೇಶ್ ಗೌಡ ಏರುಧ್ವನಿಯಲ್ಲಿ ಮಾತಾಡುವುದು ಮುಂದುವರಿಸಿದ್ದರೆ ಅಕ್ಕಪಕ್ಕದಲ್ಲಿ ಕುಳಿತಿದ್ದವರು ಸಿಟ್ಟು ತಮಣಿಗೆ ಪ್ರಯತ್ನಿಸಿದರು. ನಂತರ ಸ್ಪೀಕರ್ ಜೋರುಧ್ವನಿಯಲ್ಲಿ ಮಾತನಾಡುವುದು ಬಿಡಿ, ಸಚಿವರ ಉತ್ತರವನ್ನಾದರೂ ಕೇಳಿ ಎಂದು ಸಮಾಧಾನಪಡಿಸಿದರು. ಸಚಿವ ಮಧು ಬಂಗಾರಪ್ಪ ಪ್ರತಿಕ್ರಿಯಿಸಿ, ಶಾಸಕರ ನೋವು ಅರ್ಥವಾಗುತ್ತದೆ. ಆರ್ಥಿಕ ಇಲಾಖೆ ಅಧಿಕಾರಿಗಳ ಜತೆಗೆ ಮಾತನಾಡಿ ಆದಷ್ಟು ಬೇಗ ಹಣ ಬಿಡುಗಡೆಗೆ ವ್ಯವಸ್ಥೆ ಮಾಡುವೆ ಎಂದು ಭರವಸೆ ನೀಡಿದರು.
ಆಗಿದ್ದೇನು ?: ತುಮಕೂರು ಗ್ರಾಮಾಂತರ ಕ್ಷೇತ್ರದ ನಾಗವಲ್ಲಿ ಗ್ರಾಮದ ಮೈಸೂರು ಮಹಾರಾಜರ ಕಾಲದ ಶಾಲಾ ಕಟ್ಟಡ ಶಿಥಿಲಾವಸ್ಥೆಗೆ ತಲುಪಿದೆ. ಈ ಶಾಲೆಯನ್ನು ಮೇಲ್ದರ್ಜೆಗೇರಿಸಲಾಗಿದ್ದು, ಇಲಾಖೆ ಅಧಿಕಾರಿಗಳ ಅನುಮೋದನೆ ಪ್ರಕಾರ 1.40 ಕೋಟಿ ರೂ. ವೆಚ್ಚದಲ್ಲಿ ನೂತನ ಶಾಲಾ ಕಟ್ಟಡ ನಿರ್ಮಿಸಲು ಟೆಂಡರ್ ಕೂಡ ಕರೆಯಲಾಗಿದೆ. ಈ ಮಧ್ಯೆ ಒಂದೂವರೆ ವರ್ಷದ ಸಿಎಂ ಸಿದ್ದರಾಮಯ್ಯ ಅವರು ಶಾಲಾ ಕಟ್ಟಡಕ್ಕೆ ಅಡಿಗಲ್ಲು ಕೂಡ ಹಾಕಿ ಬಂದಿದ್ದಾರೆ. ಟೆಂಡರ್ ಕರೆದಾದ ಮೇಲೆ ಜಿ.ಪಂ.ಗೆ ಪತ್ರ ಬರೆದು ಹಣ ವಾಪಸ್ಗೆ ತಿಳಿಸಿದ್ದು, ಶಾಸಕ ಸುರೇಶ್ ಗೌಡ ಆಕ್ರೋಶಕ್ಕೆ ಕಾರಣ. ಹಣ ವಾಪಸ್ಗೆ ಸೂಚಿಸಿದ ನಂತರ ಸಿಎಂ ಗುದ್ದಲಿ ಪೂಜೆ ನೆರವೇರಿಸಿದ, ಕಾಮಗಾರಿಗೆ ಕರೆದ ಟೆಂಡರ್ ಪ್ರಕ್ರಿಯೆ ಸ್ಥಗಿತವಾಗಿದೆ. ಪುನಾರಂಭಿಸಲು ಪತ್ರ ಬರೆದು, ಸಚಿವರನ್ನು ಖುದ್ದು ಭೇಟಿಯಾದ ಬಳಿಕವೂ ಬಗೆಹರಿದಿಲ್ಲ. ಬೆಳಗಾವಿಯ ಸುವರ್ಣ ವಿಧಾನಸೌಧಕ್ಕ ಸಿಎಂ ಹಾಕಿದ್ದ ಅಡಿಗಲ್ಲು ಸಮೇತ ಬಂದಿದ್ದೆ. ಅನುದಾನ ವಾಪಸ್ ರದ್ದುಪಡಿಸುವುದಾಗಿ ಹೇಳಿದ್ದರೂ ಕಾರ್ಯರೂಪಕ್ಕೆ ಬಂದಿಲ್ಲ. ಇದೇ ಕಾರಣದಿಂದ ಸಿಟ್ಟು ಬಂತು ಎಂದು ನಂತರ ಸದನದ ಹೊರಗೆ ಸುರೇಶ್ ಗೌಡ ಮಾಹಿತಿ ನೀಡಿದರು.