ಮುಳಬಾಗಿಲು: ಮೂರು ತಿಂಗಳ ಹಿಂದೆ ನಾಪತ್ತೆಯಾಗಿದ್ದ ಮಹಿಳೆಯ ಅಸ್ಥಿಪಂಜರ ತಾಲೂಕಿನ ದುಗ್ಗಸಂದ್ರ ಹೋಬಳಿ ವ್ಯಾಪ್ತಿಯ ಅಗರ ಅರಣ್ಯ ಪ್ರದೇಶದಲ್ಲಿ ಪತ್ತೆಯಾಗಿವೆೆ. ಬುಧವಾರ ಬೆಳಗ್ಗೆ ಅರಣ್ಯದಲ್ಲಿ ಗಸ್ತು ಮಾಡುತ್ತಿದ್ದ ಅರಣ್ಯ ರಕ್ಷಕರಿಗೆ ಮಹಿಳೆಯ ಅಸ್ಥಿಪಂಜರ ಕಾಣಿಸಿದ್ದು, ಈ ಬಗ್ಗೆ ಮುಳಬಾಗಿಲು ಗ್ರಾಮಾಂತರ ಪೊಲೀಸರಿಗೆ ಮಾಹಿತಿ ನೀಡಿದ್ದರು. ಪೊಲೀಸರು ಸ್ಥಳಕ್ಕೆ ಧಾವಿಸಿ ಮಹಜರ್ ಮಾಡಿ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.
ಪ್ರಕರಣದ ಹಿನ್ನೆಲೆ: ತಾಲೂಕಿನ ಅಗರ ಗ್ರಾಮದ ನಾರಾಯಣಸ್ವಾಮಿ, ಶಾರದಾ ದಂಪತಿ ಗಾರೆ ಕೆಲಸ ಮಾಡಿಕೊಂಡು ಜೀವನ ಸಾಗಿಸುತ್ತಿದ್ದು, ಆ.8ರಂದು ಶಾರದಾ(36) ನಾಪತ್ತೆಯಾಗಿದ್ದಳು. ಗಂಡ ನಾರಾಯಣಸ್ವಾಮಿ ಪತ್ನಿಯನ್ನು ಹುಡುಕಾಡಿ ಸುಳಿವು ಸಿಕ್ಕದ ಕಾರಣ, ಆ.13ರಂದು ಮುಳಬಾಗಿಲು ಗ್ರಾಮಾಂತರ ಪೊಲೀಸ್ ಠಾಣೆಗೆ ದೂರು ನೀಡಿದ್ದು, ಅಗರ ಗ್ರಾಮದ ಗಾರೆ ಮೇಸ್ತ್ರಿ ವೆಂಕಟರಾಮ್ ಮೇಲೆ ಅನುಮಾನ ವ್ಯಕ್ತಪಡಿಸಿದ್ದರು. ಈ ಬಗ್ಗೆ ಪೊಲೀಸರು ಕರೆದು ವಿಚಾರಣೆ ನಡೆಸಿದ್ದರು. ಈ ಬಗ್ಗೆ ಯಾವುದೇ ಸುಳಿವು ಸಿಕ್ಕಿರಲಿಲ್ಲ ಎನ್ನಲಾಗಿದೆ.
ಬುಧವಾರ ಅರಣ್ಯ ಪ್ರದೇಶದಲ್ಲಿ ಸಿಕ್ಕ ಮಹಿಳೆಯ ಉದ್ದನೆಯ ತಲೆ ಕೂದಲು, ಧರಿಸಿದ್ದ ಚೂಡಿದಾರ್, ಬಟ್ಟೆ, ಚಪ್ಪಲಿ, ತಾಳಿ, ಕಾಲುಂಗುರ, ಮೂಗುತಿ, ಹಾಗೂ ಮೊಬೈಲ್ ಪತ್ನಿ ಶಾರದಾ ಅವರದ್ದೇ ಎಂದು ನಾರಾಯಣಸ್ವಾಮಿ ಮತ್ತು ಕುಟುಂಬದವರು ಗುರುತಿಸಿದ್ದು, ಈಕೆಯನ್ನು ಗಾರೆ ಮೇಸ್ತ್ರಿ ವೆಂಕಟರಾಮ್ ಮತ್ತು ಮೂವರು ಕೊಲೆ ಮಾಡಿರುವ ಶಂಕೆ ವ್ಯಕ್ತಪಡಿಸಿ ಈಗ ಮತ್ತೊಂದು ದೂರನ್ನು ನೀಡಿದ್ದಾರೆ. ಮಹಿಳೆಯ ಮೇಲೆ ಅರಣ್ಯದಲ್ಲಿ ಅತ್ಯಾಚಾರ ಮಾಡಿ ಕೊಲೆ ಮಾಡಲಾಗಿದೆಯೇ ಅಥವಾ ಬರಿ ಕೊಲೆ ಮಾಡಲಾಗಿದೆಯೇ ಎಂಬುದು ತನಿಖೆಯಿಂದ ತಿಳಿಯಬೇಕಾಗಿದೆ.