ರಟ್ಟಿಹಳ್ಳಿ: ಪಟ್ಟಣ ಸೇರಿ ತಾಲೂಕಿನ ವಿವಿಧೆಡೆ ಗುರುವಾರ ಮಧ್ಯಾಹ್ನ ಸತತ 2 ತಾಸು ಸುರಿದ ಭಾರಿ ಮಳೆಯಿಂದಾಗಿ ಜನಜೀವನ ಅಸ್ತವ್ಯಸ್ತವಾಯಿತು.
ಪಟ್ಟಣದ ಶಿವಾಜಿ ನಗರ, ಕೋಟೆ ಭಾಗ ಮೊದಲಾದೆಡೆ ಮನೆಗಳಿಗೆ ನೀರು ನುಗ್ಗಿ ನಿವಾಸಿಗಳಿಗೆ ತೊಂದರೆಯಾಗಿದೆ. ಪ್ರಮುಖ ರಸ್ತೆಗಳು ನೀರಿನಿಂದ ತುಂಬಿಕೊಂಡಿವೆ. ಶಿವಾಜಿ ನಗರದ ದ್ವಿಮುಖ ರಸ್ತೆಯಲ್ಲಿ ಒಂದು ರಸ್ತೆ ಮುಳುಗಡೆಯಾಗಿ ಸಂಚಾರಕ್ಕೆ ಅಡ್ಡಿಯಾಗಿತ್ತು. ರಸ್ತೆಯ ಎರಡು ಬದಿಯ ಮನೆಗಳಿಗೆ ನೀರು ನುಗ್ಗಿತ್ತು. ನೀರು ಹೊರಹಾಕಲು ನಿವಾಸಿಗಳು ಹರಸಾಹಸಪಟ್ಟರು.
ಗೋವಿನಜೋಳ ಬೆಳೆ ಕಳೆದ ವಾರದಿಂದ ಕಟಾವಿಗೆ ಬಂದಿದೆ. ಆದರೆ, ಮಳೆ ಬಿಟ್ಟು ಬಿಡದೇ ಸುರಿಯುತ್ತಿರುವುದರಿಂದ ಜಮೀನುಗಳಲ್ಲಿ ನೀರು ತುಂಬಿ ರೈತರು ಹೋಗದ ಪರಿಸ್ಥಿತಿ ನಿರ್ವಣವಾಗಿದೆ. ಮಳೆ ಆರ್ಭಟ ಹೀಗೆ ಮುಂದುವರಿದರೆ ಉತ್ತಮವಾಗಿ ಬೆಳೆದ ಗೋವಿನಜೋಳ ಕೈಗೆ ಸಿಗದಂತಾಗುತ್ತದೆ.