ಭಟ್ಕಳ: ಪಟ್ಟಣದಲ್ಲಿ ಪರಸ್ಪರ ಅಂತರ, ಲಾಕ್ಡೌನ್ ನಿಯಮ ಉಲ್ಲಂಘನೆಯ ಪ್ರಕರಣಗಳು ಹೆಚ್ಚುತ್ತಿವೆ. ಇದನ್ನು ನಿಯಂತ್ರಿಸಲು ಪೊಲೀಸ್ ಇಲಾಖೆಯು ಮತ್ತೆ ಡಿಜಿಟಲ್ ತಂತ್ರಜ್ಞಾನದ ಮೊರೆ ಹೋಗಿದೆ. ಸೋಮವಾರದಿಂದ ಡ್ರೋನ್ ಮೂಲಕ ಜನರ ಮೇಲೆ ಕಣ್ಣಿಟ್ಟಿದೆ.
ಸ್ಥಳೀಯ ಜಾಲಿ ಪಟ್ಟಣ ಪಂಚಾಯಿತಿ, ಭಟ್ಕಳ ಪುರಸಭೆ ಮತ್ತು ಹೆಬಳೆ ಪಂಚಾಯಿತಿಯಲ್ಲಿ ಬೆಳಗ್ಗೆ 6 ರಿಂದ 2ರವರೆಗೆ ಮಾತ್ರ ವಿನಾಯಿತಿ ನೀಡಿದ್ದು, ನಂತರ ಲಾಕ್ಡೌನ್ ಮಾಡಲಾಗಿದೆ. ಆದರೂ ಜನರ ಓಡಾಟ ಕಡಿಮೆಯಾಗಿಲ್ಲ. ಪ್ರತಿ ಬಾರಿಯೂ ಪೊಲೀಸರೆ ತೆರಳಿ ನಿಯಂತ್ರಿಸಬೇಕಾದ ಸ್ಥಿತಿ ಇದೆ.
ಅಲ್ಲದೆ, ಪೊಲೀಸರಲ್ಲೂ ಕರೊನಾ ಸೋಂಕು ಪತ್ತೆಯಾಗುತ್ತಿದ್ದು, ಗ್ರಾಮೀಣ ಠಾಣೆಯನ್ನು ಸೀಲ್ಡೌನ್ ಮಾಡಲಾಗಿದೆ. ಲಾಕ್ಡೌನ್ ಸಂದರ್ಭದಲ್ಲಿ ಅನವಶ್ಯಕವಾಗಿ ತಿರುಗಾಡುತ್ತಿರುವವರ ನಿಯಂತ್ರಣ, ಪರಸ್ಪರ ಅಂತರ ಕಾಯ್ದುಕೊಳ್ಳದ ಸ್ಥಳಗಳನ್ನು ಸುಲಭವಾಗಿ ಗುರುತಿಸಿ ಅವರ ವಿರುದ್ಧ ಕ್ರಮ ಕೈಗೊಳ್ಳುವ ಉದ್ದೇಶದಿಂದ ಭಟ್ಕಳ ಪೊಲೀಸರು ಮತ್ತೆ ಡ್ರೋನ್ ಮೊರೆ ಹೋಗಿದ್ದಾರೆ. ಶಂಸುದ್ದೀನ್ ಸರ್ಕಲ್ನಲ್ಲಿ ಸಿಪಿಐ ದಿವಾಕರ ಡ್ರೋನ್ ಕಾರ್ಯನಿರ್ವಹಣೆಯನ್ನು ಸೋಮವಾರ ವೀಕ್ಷಿಸಿದರು.
ನಂತರ ಪಟ್ಟಣದ ನ್ಯಾಯಾಲಯದ ಬಳಿ, ರಂಗಿನಕಟ್ಟೆ, ಮಾರಿಕಟ್ಟೆ, ರಥಬೀದಿ, ನವಾಯತ್ ಕಾಲನಿ, ಸುಲ್ತಾನ್ ಸ್ಟ್ರೀಟ್, ಚೌಕ ಬಜಾರ ಸೇರಿ ಪಟ್ಟಣದ ಸೂಕ್ಷ್ಮ ಪ್ರದೇಶಗಳಲ್ಲೂ ಡ್ರೋನ್ ಕಾರ್ಯಾಚರಣೆ ನಡೆಸಿದೆ. ಅಲ್ಲದೆ, ಪ್ರತಿದಿನ ಮಧ್ಯಾಹ್ನ 2 ಗಂಟೆಯ ಬಳಿಕ ಯಾವುದೇ ಸಂದರ್ಭದಲ್ಲೂ ಡ್ರೋನ್ ಹಾರಾಟ ನಡೆಸಿ ಜನರ ಚಲನವಲನಗಳಲ್ಲಿ ನಿಗಾ ಇಡಲಾಗುವುದು ಎಂದು ಸಿಪಿಐ ದಿವಾಕರ ಪತ್ರಿಕೆಗೆ ತಿಳಿಸಿದ್ದಾರೆ. ಕುಂದಾಪುರ ಮೂಲದ ಡಿಜೆ ರಂಜಿತ, ಶ್ರೀವರ್ಷಾ ಅವರು ಡ್ರೋನ್ ಹಾರಾಟ ನಡೆಸಿ ಪೊಲೀಸರಿಗೆ ಮಾಹಿತಿ ನೀಡಿದರು.