ಹುಬ್ಬಳ್ಳಿ: ಹುಬ್ಬಳ್ಳಿ-ಧಾರವಾಡ-ಬೆಳಗಾವಿ ಭಾಗದ ಮಹಿಳಾ ಸ್ಟಾರ್ಟಪ್ಗಳಿಗೆ ಉತ್ತೇಜನ ನೀಡುವ ಉದ್ದೇಶದಿಂದ ಬೆಂಗಳೂರು ಮೂಲದ ಜಿನ್ಸರ್ವ್ ಗ್ಲೋಬಲ್ ಇನ್ಕ್ಯುಬೇಶನ್ ಸರ್ವಿಸಸ್ ಹಾಗೂ ಕೆಎಲ್ಇ ತಾಂತ್ರಿಕ ವಿಶ್ವವಿದ್ಯಾಲಯದ ಸಿಟೈ (ಸಿಟಿಐಇ-ಸೆಂಟರ್ ಆಫ್ ಟೆಕ್ನಾಲಜಿ ಇನ್ನೊವೇಶನ್ ಆಂಡ್ ಎಂಟರ್ಪ್ರ್ಯುನರ್ಶಿಪ್) ಒಪ್ಪಂದ ಮಾಡಿಕೊಂಡಿದೆ.
ಹುಬ್ಬಳ್ಳಿಯ ಕೆಎಲ್ಇ ಎಸ್ಎಂಎಸ್ಆರ್ನಲ್ಲಿ ಶುಕ್ರವಾರ ಈ ಒಪ್ಪಂದಕ್ಕೆ ಸಂಬಂಧಿಸಿದಂತೆ ಜಿನ್ಸರ್ವ್ನ ಸಿಒಒ ಗಿರೀಶ ಹಿರೇಮಠ ಹಾಗೂ ಕೆಎಲ್ಇ ತಾಂತ್ರಿಕ ವಿವಿ ರಜಿಸ್ಟ್ರಾರ್ ಡಾ. ಬಸವರಾಜ ಅನಾಮಿ ಅವರು ಒಡಂಬಡಿಕೆ ಪತ್ರಕ್ಕೆ ಸಹಿ ಹಾಕಿದರು.
ಜೈವಿಕ ತಂತ್ರಜ್ಞಾನ, ಆರೋಗ್ಯ ಸೇವೆ, ಶಿಕ್ಷಣ, ಇ-ಕಾಮರ್ಸ್ ಹಾಗೂ ಆಹಾರ ಕ್ಷೇತ್ರಗಳಿಗೆ ಸಂಬಂಧಿಸಿದಂತೆ 16 ಮಹಿಳಾ ತಾಂತ್ರಿಕ ಸ್ಟಾರ್ಟಪ್ಗಳನ್ನು ಆಯ್ಕೆ ಮಾಡಲಾಗಿದೆ. ಇವುಗಳಿಗೆ 2022ರ ಅಕ್ಟೋಬರ್ನಿಂದ 2023ರ ಮಾರ್ಚ್ ವರೆಗೆ ರಚನಾತ್ಮಕ ಇನ್ಕ್ಯುಬೇಶನ್ ಪ್ರೋಗ್ರಾಮ್ ನಡೆಸಲಾಗುವುದು. ಇದರಡಿ 200 ಗಂಟೆಗಳ ಕಾಲ ತಾಂತ್ರಿಕ ಮಾರ್ಗದರ್ಶನ ನೀಡಲಾಗುವುಗು. ಆನ್ಲೈನ್ನಲ್ಲಿ ಉದ್ಯಮ ಕ್ಷೇತ್ರದ ಪರಿಣತರಿಂದ ಸಲಹೆ ಪಡೆಯಬಹುದಾಗಿದೆ ಎಂದು ಜಿನ್ಸರ್ವ್ನ ಸಿಒಒ ಗಿರೀಶ ಹಿರೇಮಠ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು.
2020ರಲ್ಲಿ ಆರಂಭಗೊಂಡ ಜಿನ್ಸರ್ವ್ ಕೇಂದ್ರದ ವಿಜ್ಞಾನ ಮತ್ತು ತಂತ್ರಜ್ಞಾನ ಇಲಾಖೆ ಮಾನ್ಯತೆ ಹೊಂದಿದೆ. ಕಳೆದ 12 ವರ್ಷಗಳಲ್ಲಿ ಸುಮಾರು 200 ತಾಂತ್ರಿಕ ಸ್ಟಾರ್ಟಪ್ಗಳಿಗೆ ಉತ್ತೇಜನ ನೀಡುವ ಕೆಲಸ ಮಾಡಿದ್ದೇವೆ. ಇವು 5 ಸಾವಿರ ಉದ್ಯೋಗಗಳನ್ನು ಸೃಷ್ಟಿ ಮಾಡಿದ್ದು, ಸಾವಿರ ಕೋಟಿ ಬಂಡವಾಳವನ್ನು ತೊಡಗಿಸಿವೆ. ಇದನ್ನು ನೋಡಿ ರಾಜ್ಯ ಸರ್ಕಾರ ಸ್ಟಾರ್ಟಪ್ ಕರ್ನಾಟಕ ಬ್ಯಾನರ್ ನಡಿ ಮಹಿಳಾ ತಾಂತ್ರಿಕ ಸ್ಟಾರ್ಟಪ್ಗಳಿಗೆ ಉತ್ತೇಜನ ನೀಡುವ ಜವಾಬ್ದಾರಿಯನ್ನು ವಹಿಸಿದೆ. ಯೋಚನಾ ಮಟ್ಟದಲ್ಲಿರುವ ಸ್ಟಾರ್ಟಪ್ಗಳನ್ನು ಯಶಸ್ವಿ ಉದ್ಯಮವನ್ನಾಗಿ ಪರಿವರ್ತಿಸಲು ಬೇಕಾಗುವ ಮಾರ್ಗದರ್ಶನ ಮಾಡಬೇಕಿದೆ ಎಂದರು.
ಕೆಎಲ್ಇ ಸಿಟೈ ನಿರ್ದೇಶಕ ಶಿವಯೋಗಿ ತುರಮುರಿ ಮಾತನಾಡಿ, ನಮ್ಮಲ್ಲಿ ಉತ್ಕೃಷ್ಟ ಪ್ರಯೋಗಾಲಯಗಳು, ಸಾಫ್ಟವೇರ್, ಅಧ್ಯಾಪಕ ವೃಂದ, ಮೂಲಸೌಕರ್ಯಗಳಿವೆ. ಯಾವುದೇ ವಿಧವಾದ ತಾಂತ್ರಿಕ ನೆರವನ್ನು ಬಳಸಿಕೊಳ್ಳಲು ಅವರಿಗೆ (ಜಿನ್ಸರ್ವ್) ಅವಕಾಶ ಕಲ್ಪಿಸಲಾಗಿದೆ ಎಂದು ತಿಳಿಸಿದರು.