ಬೆಳಗಾವಿ: ಬೈಕ್ ಅಪಘಾತದ ಹಿನ್ನೆಲೆಯಲ್ಲಿ ನಡೆದ ಜಗಳದಲ್ಲಿ ಪರಿಶಿಷ್ಟ ವ್ಯಕ್ತಿಯ ಮೇಲೆ ಜಾತಿ ನಿಂದನೆ ಮಾಡಿ, ಹಲ್ಲೆ ಮಾಡಿದ್ದ ಪ್ರಕರಣಕ್ಕೆ ಸಂಬಂಧಿಸಿದಂತೆ 9 ಸವರ್ಣಿಯರಿಗೆ ಇಲ್ಲಿನ 3ನೇ ಅಧಿಕ ಜಿಲ್ಲಾ ಮತ್ತು ಸತ್ರ ನ್ಯಾಯಾಲಯ 2 ವರ್ಷ ಕಾರಾಗೃಹ ಶಿಕ್ಷೆ ಮತ್ತು 70,500 ರೂ. ದಂಡ ವಿಧಿಸಿದೆ.
ಬಸಪ್ಪ ಕೊಪ್ಪದ, ಫಕೀರಪ್ಪ ತೇನಗಿ, ಜ್ಞಾನೇಶ್ವರ ತೇನಗಿ, ಮುರಾರಿ ತೇನಗಿ, ಬಸವಂತಪ್ಪ ತೇನಗಿ, ರೇಣವ್ವ ದಂಡಯ್ಯಪ್ಪಗೋಲ, ಲಕ್ಕವ್ವ ಮುದ್ದನ್ನವರ, ಯಲ್ಲವ್ವ ತೇನಗಿ ಮತ್ತು ಶಿವಪ್ಪ ದಂಡಯ್ಯಪ್ಪಗೋಲ ಶಿಕ್ಷೆಗೊಳಗಾದವರು.
ಪ್ರಕರಣ ಹಿನ್ನೆಲೆ: ಮುರಗೋಡ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ 2017ರ ಮಾರ್ಚ್ 10ರಂದು ಬೂದಿಗೊಪ್ಪ ಮತ್ತು ಯರಜರ್ವಿ ಗ್ರಾಮದ ಮಧ್ಯೆ ಬಸಪ್ಪ ಕೊಪ್ಪದ ಬೈಕ್ ಮೇಲೆ ಫಕೀರಪ್ಪನ ಜತೆಗೆ ಹೊರಟಿದ್ದಾಗ ಎದುರಿನಿಂದ ಬರುತ್ತಿದ್ದ ವ್ಯಕ್ತಿಯ ಬೈಕ್ಗೆ ಅಪಘಾತ ಮಾಡಿದ್ದನು. ಆಗ ಇಬ್ಬರ ಮಧ್ಯೆ ಜಗಳವಾಗಿತ್ತು. ತದನಂತರ ದೂರುದಾರನ ಮೇಲೆ ಗುಂಪು ಕಟ್ಟಿಕೊಂಡು ಅವಾಚ್ಯ ಶಬ್ದಗಳಿಂದ ಜಾತಿ ನಿಂದನೆ ಮಾಡಿ ಹಲ್ಲೆ ಮಾಡಿದ್ದರು. ಮರಗೋಡ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು. ರಾಮದುರ್ಗ ಡಿಎಸ್ಪಿ ಎಂ.ಬಿ. ನಂದಗಾವಿ ತನಿಖೆ ಕೈಗೊಂಡು ದೋಷಾರೋಪ ಪಟ್ಟಿ ಸಲ್ಲಿಸಿದ್ದರು. ಪ್ರಕರಣದ ವಿಚಾರಣೆ ನಡೆಸಿದ 3ನೇ ಅಧಿಕ ಜಿಲ್ಲಾ ಮತ್ತು ಸತ್ರ ನ್ಯಾಯಾಲಯದ ನ್ಯಾಯಾಧೀಶೆ ಸವಿತಾಕುಮಾರಿ ಎನ್. ತೀರ್ಪು ನೀಡಿದ್ದಾರೆ. ಸರ್ಕಾರದ ಪರವಾಗಿ ಅಭಿಯೋಜಕ ಆರ್.ಜಿ. ದೇವರೆಡ್ಡಿ ವಾದ ಮಂಡಿಸಿದ್ದಾರೆ.