ನೊಣವಿನಕೆರೆ: ಹೋಬಳಿಯ ಕರೀಕೆರೆ ಗ್ರಾಮದಲ್ಲಿ ಗುರುವಾರ ಜಮೀನು ವಿಚಾರಕ್ಕೆ ಸಂಬಂಧಿಸಿದಂತೆ ಶುರುವಾದ ಅಣ್ಣ ತಮ್ಮಂದಿರ ನಡುವಿನ ಗಲಾಟೆಯಲ್ಲಿ ಓರ್ವ ಮೃತಪಟ್ಟಿದ್ದಾನೆ.ಮಂಜುನಾಥ್ (28)ಮೃತ. ಕರೀಕೆರೆಯ ಮಂಜುನಾಥ್ ಅವರ ಜಮೀನಿ ಪಕ್ಕ ತಮ್ಮ ಚಿಕ್ಕಪ್ಪಂದಿರಾದ ಗೋವಿಂದಯ್ಯ ಮತ್ತು ಶೇಖರಪ್ಪ ಅವರ ಜಮೀನಿದ್ದು, ಜುಲೈ 10ರಂದು ಬೆಳಗ್ಗೆ ಗೋವಿಂದಯ್ಯ ಅವರ ಮಗ ಮನು, ಶೇಖರಪ್ಪ ಹೊಲದಲ್ಲಿ ಮಣ್ಣು ತೆಗೆಸುತ್ತಿರುವಾಗ ಮಂಜುನಾಥ್ ಮತ್ತು ಪತ್ನಿ ಸುಧಾ ಹೋಗಿ ಜಮೀನಿಗೆ ಓಡಾಡಲು ದಾರಿ ಬಿರುವಂತೆ ತಿಳಿಸಿದ್ದಾರೆ. ಈ ವೇಳೆ ಮನು ಮತ್ತು ಶೇಖರಪ್ಪ ಏಕಾಏಕಿ ಮಂಜುನಾಥ್ ಮೇಲೆ ದಾಳಿ ನಡೆಸಿ ದೊಣ್ಣೆಯಿಂದ ಹಲ್ಲೆ ನಡೆಸಿದ್ದಾರೆ. ಈ ವೇಳೆ ಜಗಳ ಬಿಡಿಸಲು ಹೋದ ಸುಧಾಳಿಗೂ ಥಳಿಸಿದ್ದಾರೆ. ಅಸ್ವಸ್ಥನಾದ ಮಂಜುನಾಥನನ್ನು ನೊಣವಿನಕೆರೆ ಸರ್ಕಾರಿ ಆಸ್ಪತ್ರೆಯಲ್ಲಿ ಪ್ರಾಥಮಿಕ ಚಿಕಿತ್ಸೆ ಬಳಿಕ ಹೆಚ್ಚಿನ ಚಿಕಿತ್ಸೆಗೆ ತಿಪಟೂರು ಸಾರ್ವಜನಿಕ ಆಸ್ಪತ್ರೆಗೆ ಕರೆದುಕೊಂಡು ಬರುವ ವೇಳೆಗಾಗಲೇ ಮಂಜುನಾಥ್ ಮೃತಪಟ್ಟಿದ್ದಾನೆ. ಶೇಖರಪ್ಪ, ಮನು, ಜೆ.ಸಿ.ಪಿ ಮಾಲೀಕರು ಹಾಗೂ ಇತರರ ವಿರುದ್ಧ ನೊಣವಿನಕೆರೆ ಠಾಣೆಯಲ್ಲಿ ಮಂಜುನಾಥ್ ಪತ್ನಿ ದೂರು ನೀಡಿದ್ದು, ದೂರು ದಾಖಲಿಸಿಕೊಂಡ ಪಿಎಸ್ಐ ಬಸವರಾಜು ಕವಟಗಿ ತನಿಖೆ ತೀವ್ರಗೊಳಿಸಿದ್ದಾರೆ.