ಚಾಲನೆ ಪ್ರಾತ್ಯಕ್ಷಿಕೆ ನೀಡುವಾಗ ಕಾರನ್ನು ಕೆರೆಗೆ ಹಾರಿಸಿದ ವ್ಯಕ್ತಿ

ಶಿರಸಿ: ಲಘು ವಾಹನ ಚಾಲನಾ ಪರವಾನಿಗೆಗಾಗಿ ಚಾಲನಾ ಪ್ರಾತ್ಯಕ್ಷಿಕೆ ನೀಡುವಾಗ ಚಾಲಕನೋರ್ವ ಕಾರನ್ನು ಕೆರೆಯೊಳಗೆ ನುಗ್ಗಿಸಿದ ಘಟನೆ ಗುರುವಾರ ಇಲ್ಲಿನ ಆರ್​ಟಿಒ ಕಚೇರಿ ಬಳಿ ನಡೆದಿದೆ.

ಚಾಲನಾ ಪರವಾನಗಿಗೆ ಆರ್​ಟಿಒ ನಿರೀಕ್ಷಕರೆದುರು ಕಾರು ಚಾಲನೆ ಮಾಡುತ್ತಿದ್ದ ಸಿದ್ದಾಪುರದ ರಾಜು ನಾಯ್ಕ ಚಾಲನೆ ವೇಳೆ ನಿಯಂತ್ರಣ ಕಳೆದುಕೊಂಡು ಇಲ್ಲಿನ ಆರ್​ಟಿಒ ಕಚೇರಿಯ ಪಕ್ಕದಲ್ಲಿನ ಬಶೆಟ್ಟಿಕೆರೆಗೆ ಹಾರಿಸಿದ್ದಾನೆ. ಇದರಿಂದ ಕೆಲಕಾಲ ಸ್ಥಳದಲ್ಲಿ ಆತಂಕದ ವಾತಾವರಣ ನಿರ್ವಣವಾಗಿತ್ತು. ಸ್ಥಳದಲ್ಲಿದ್ದ ಕೆಲವರು ಕೆರೆಗೆ ಬಿದ್ದ ಕಾರನ್ನು ತಕ್ಷಣ ದಡಕ್ಕೆ ಎಳೆತಂದರು. ಅದೃಷ್ಟವಶಾತ್ ಯಾವುದೇ ಪ್ರಾಣಾಪಾಯವಾಗಿಲ್ಲ. ನಂತರ ಕ್ರೇನ್ ಮೂಲಕ ಕಾರನ್ನು ಮೇಲೆತ್ತಲಾಯಿತು.