ಕ್ಲಾಕ್​ಟವರ್​ ಮೇಲೆ ತ್ರಿವರ್ಣ ಧ್ವಜ ಹಾರಿಸುವೆ : ಸಂಸದ ಮುನಿಸ್ವಾಮಿ ಹೇಳಿಕೆ

ಕೋಲಾರ: ನಗರದ ಕ್ಲಾಕ್​ ಟವರ್​ ಮೇಲೆ ತ್ರಿವರ್ಣ ಧ್ವಜ ಹಾರಿಸಿಯೇ ತೀರುತ್ತೇನೆ ಎಂದು ಸಂಸದ ಮುನಿಸ್ವಾಮಿ ಹೇಳಿದರು. ನಗರದ ಪ್ರವಾಸಿ ಮಂದಿರದಲ್ಲಿ ಗುರುವಾರ ಹಮ್ಮಿಕೊಂಡಿದ್ದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, ಕ್ಲಾಕ್​ ಟವರ್​ ಯಾರಪ್ಪನ ಸ್ವತ್ತಲ್ಲ. ಆದರೆ ಕೆಲವರು ಅದರ ಮೇಲೆ ಹಸಿರು, ಕಪ್ಪು ಧ್ವಜಗಳನ್ನು ಹಾರಿಸುತ್ತಿದ್ದು, ಇದನ್ನು ತಡೆಯಬೇಕಿದೆ. ಅದಕ್ಕೆ ಕೇಸರಿ, ಹಸಿರು ಮತ್ತು ಬಿಳಿ ಬಣ್ಣ ಬಳಿದು, ತ್ರಿವರ್ಣಧ್ವಜ ಹಾರಿಸಬೇಕು ಎಂಬ ನಿರ್ಧಾರಕ್ಕೆ ಬಂದಿದ್ದೇನೆ ಎಂದರು. ರಾಷ್ಟ್ರಧ್ವಜ ಹಾರಿಸಲಿಕ್ಕಾಗಿ ಮಾ.18ರಿಂದ ಕ್ಲಾಕ್​ ಟವರ್​ ಬಳಿ ಏಕಾಂಗಿಯಾಗಿ ಅರ್ನಿದಿಷ್ಟಾವಧಿ ಧರಣಿ ನಡೆಸುತ್ತೇನೆ. ಮಾ.21ರ ತನಕ ನಗರದಲ್ಲಿ ಸೆಕ್ಷನ್​ 144 ಇರುವುದರಿಂದ ಅಲ್ಲಿ ತನಕ ಒಬ್ಬನೇ ಧರಣಿ ಮಾಡುತ್ತಿದ್ದು, ನಂತರ ದೇಶ ಭಕ್ತಿ ಇರುವವರು ನನ್ನೊಂದಿಗೆ ಪಾಲ್ಗೊಳ್ಳಬಹುದು ಎಂದು ಹೇಳಿದರು. ಸಂಸತ್​ ಸದಸ್ಯನಾಗಿ ಆಯ್ಕೆಯಾಗಿ 3 ವರ್ಷ ಕಳೆದಿದ್ದು, ಜಿಲ್ಲೆಯಲ್ಲಿ ಇಲ್ಲಿ ತನಕ ಯಾವುದೇ ಕೋಮುಗಲಭೆ ಜರುಗಿಲ್ಲ. ಅದಕ್ಕೆ ಆಸ್ಪದ ಮಾಡಿಕೊಡುವುದೂ ಇಲ್ಲ. ಜಿಲ್ಲೆಯಲ್ಲಿ ಹಿಂದು -ಮುಸ್ಲಿಮರು ಅಣ್ಣ&ತಮ್ಮಂದಿರಂತೆ ಬದುಕುತ್ತಿದ್ದಾರೆ. ಆದರೆ ಎಸ್​ಡಿಪಿಆರ್​ ನಂತಹ ಸಂಘಟನೆಗಳು ಕೋಮುಸಾಮರಸ್ಯ ಕದಡಲು ಯತ್ನಿಸುತ್ತಿವೆ. ನಾನು ಮುಳಬಾಗಿಲಿನ ಹಿಂದು ಸಮಾಜೋತ್ಸವದಲ್ಲಿ ಹೇಳಿದ ಮಾತನ್ನು ತಿರುಚಿ ಅಪಪ್ರಚಾರ ಮಾಡಲಾಗಿದೆ. ಇದಕ್ಕೆಲ್ಲ ಭಯಪಡುವವನು ನಾನಲ್ಲ ಎಂದು ಮುನಿಸ್ವಾಮಿ ಸ್ಪಷ್ಟನೆ ನೀಡಿದರು. ಕ್ಲಾಕ್​ ಟವರ್​ ಮೇಲೆ ರಾಷ್ಟ್ರದ್ವಜ ಹಾರಿಸುವುದಾಗಿ ಹೇಳಿದ್ದಕ್ಕೆ ಸುಹೇಲ್​ ಎಂಬಾತ ಪೊಲೀಸ್​ ವರಿಷ್ಠಾಧಿಕಾರಿಗೆ ನನ್ನ ವಿರುದ್ಧ ದೂರು ನೀಡಿದ್ದು, ಇಂತಹವರ ಚರಿತ್ರೆ ತಿಳಿದಿದೆ. ಯಾರಿಗೂ, ಯಾವ ಬೆದರಿಕೆಗಳಿಗೂ ಅಂಜುವ ಮಾತಿಲ್ಲ, ಧರಣಿ ನಡೆಸಿಯೇ ತೀರುತ್ತೇನೆ. ಮುಖ್ಯಮಂತ್ರಿ ಬೊಮ್ಮಾಯಿ, ಗೃಹ ಸಚಿವ ಆರಗ ಜ್ಞಾನೇಂದ್ರ ಅವರ ಬಳಿ ಈ ಕುರಿತು ಚರ್ಚಿಸಿದ್ದು, ಅಗತ್ಯ ಕ್ರಮಕ್ಕೆ ಜಿಲ್ಲಾಡಳಿತದ ಗಮನಕ್ಕೆ ಸಹ ತಂದಿದ್ದೇನೆ ಎಂದು ವಿವರಿಸಿದರು.