ಕೆಎಸ್​ಆರ್​ಟಿಸಿ ನೌಕಕರಿಗೆ ದಂಡವಿನಾಯಿತಿ!: ರಾಜ್ಯಾದ್ಯಂತ ಶಿಸ್ತು ಕ್ರಮ ಎದುರಿಸುತ್ತಿರುವ ಹಲವು ಪ್ರಕರಣಗಳ ಇತ್ಯರ್ಥ

ಮಾರುತಿ ಪ್ರಸನ್ನಕುಮಾರ್​ ಮಧುಗಿರಿ

ರಾಜ್ಯ ರಸ್ತೆ ಸಾರಿಗೆ ನಿಗಮವು ಇತಿಹಾಸದಲ್ಲಿ ಪ್ರಪ್ರಥಮ ಬಾರಿಗೆ ಶಿಸ್ತು ಹಾಗೂ ಗೈರುಹಾಜರಿ ಪ್ರಕರಣಗಳನ್ನು ಒಂದೇ ಬಾರಿಗೆ ಮಾತ್ರ ಅನ್ವಯಿಸುವಂತೆ ತನ್ನ ನೌಕರರ ಹಿತ ಕಾಯುವ ನಿಟ್ಟಿನಲ್ಲಿ ದಿಟ್ಟ ಹೆಜ್ಜೆ ಇಟ್ಟಿದೆ.

ಕೆಎಸ್​ಆರ್​ಟಿಸಿ ನಿಗಮದಲ್ಲಿ 35 ಸಾವಿರಕ್ಕೂ ಹೆಚ್ಚು ಚಾಲಕ, ನಿರ್ವಾಹಕ, ಚಾಲಕ -ಕಂ -ನಿರ್ವಾಹಕ ಹಾಗೂ ತಾಂತ್ರಿಕ ಸಿಬ್ಬಂದಿ ಕರ್ತವ್ಯ ನಿರ್ವಹಿಸುತ್ತಿದ್ದು, ಇದೇ ಮೊದಲ ಬಾರಿಗೆ ನಿಗಮದಲ್ಲಿ ವಿವಿಧ ಪ್ರಕರಣಗಳಲ್ಲಿ ಶಿಸ್ತು ಕ್ರಮ ಎದುರಿಸುತ್ತಿರುವ ಸುಮಾರು 8414 ಪ್ರಕರಣಗಳಲ್ಲಿ 7200 ಪ್ರಕರಣಗಳು ಹಾಗೂ ವಿವಿಧ ವಿಭಾಗಗಳಲ್ಲಿ ಬಾಕಿ ಇರುವ ಸುಮಾರು 481 ದೀರ್ಘಾವಧಿ ಗೈರು ಪ್ರಕರಣಗಳನ್ನು ಒಂದೇ ಬಾರಿಗೆ ಅನ್ವಯವಾಗುವಂತೆ ಲಘು ಕ್ರಮಗಳ ಮೂಲಕ ಇತ್ಯರ್ಥ ಮಾಡಲು ತೀಮಾರ್ನಿಸಲಾಗಿದೆ. ಉಳಿದ 1214 ಗಂಭೀರ ಪ್ರಕರಣಗಳಾಗಿದ್ದು, ಅವುಗಳನ್ನು ತ್ವರಿತ ವಿಚಾರಣೆ ನಡೆಸಿ ಇತ್ಯರ್ಥಪಡಿಸಲು ಸೂಚಿಸಲಾಗಿದೆ.

ಅತೀ ಕಡಿಮೆ ದಂಡ ಪ್ರಕ್ರಿಯೆ: ಘಟಕ ಹಾಗೂ ವಿಭಾಗ ಮಟ್ಟದಲ್ಲಿ 10 ತಿಂಗಳ ಅವಧಿಗಿಂತ ಕಡಿಮೆ ಹಾಜರಿ ಪ್ರಕರಣಗಳಲ್ಲಿ ಗೈರುಹಾಜರಿ ಅವಧಿಯನ್ನು ಗೈರು ಎಂದೇ ಪರಿಗಣಿಸಿ ಕೇವಲ 500 ರೂಪಾಯಿ ಒಳಗಿನ ಮೊತ್ತವನ್ನು ವೇತನದಿಂದ ಕಡಿತಗೊಳಿಸಿ ಪ್ರಕರಣವನ್ನು ಇತ್ಯರ್ಥ ಪಡಿಸಲು, 10 ತಿಂಗಳಗಿಂತ ಹೆಚ್ಚಿನ ಅವಧಿಯ ಅನಧಿಕೃತ ಗೈರು ಪ್ರಕರಣಗಳಲ್ಲಿ ಬಾಕಿ ಇರುವ ಹಂತದಿಂದ ನಿಯಮಾವಳಿಯನ್ನು ಮುಂದುವರಿಸಿ ಪ್ರಕರಣವನ್ನು ತ್ವರಿತವಾಗಿ ಇತ್ಯರ್ಥಪಡಿಸಲು ತಿಳಿಸಲಾಗಿದೆ.

ಇನ್ನು ಶಿಸ್ತು ಪ್ರಕರಣಗಳನ್ನು ಪರಿಶೀಲಿಸಿ ತಪ್ಪಿತಸ್ಥ ಪ್ರಕರಣಗಳಲ್ಲಿ ಘಟಕ ಮಟ್ಟದಲ್ಲಿ 100 ರೂ., ವಿಭಾಗ ಮಟ್ಟದಲ್ಲಿ 500 ರೂ. ಒಳಗೆ ದಂಡ ವಿಧಿಸಿ ದಂಡದ ಹಣವನ್ನು ವೇತನದಿಂದ ಕಡಿತಗೊಳಿಸಿ ಪ್ರಕರಣಗಳನ್ನು ಇತ್ಯರ್ಥ ಪಡಿಸಲು ಕ್ರಮ ಕೃಗೊಳ್ಳಲಾಗಿದೆ. ಈ ಪ್ರಕರಣಗಳು ಕನಿಷ್ಠ 25000 ರೂ. ದಂಡ ವಿಧಿಸಬಹುದಾದ ಪ್ರಕರಣಗಳಾಗಿದ್ದವು ಎಂಬುದು ಗಮನಾರ್ಹ.

ಬಾಕಿ ಇರುವ ಶಿಸ್ತು ಪ್ರಕರಣಗಳ ವಿವರ: ಬೆಂಗಳೂರು ಕೇಂದ್ರ ವಿಭಾಗ : 441, ರಾಮನಗರ : 445, ಕೋಲಾರ : 398, ತುಮಕೂರು : 628, ದಾವಣಗೆರೆ : 165, ಮೈಸೂರು : 1346, ಮಂಡ್ಯ : 680, ಹಾಸನ : 263, ಚಿಕ್ಕಮಗಳೂರು : 565, ಮಂಗಳೂರು : 686, ಬೆಂಗಳೂರು ಪ್ರಾದೇಶಿಕ ಕಾರ್ಯಾಗಾರ 17, ಹಾಸನ ಪ್ರಾದೇಶಿಕ ಕಾರ್ಯಾಗಾರ: 7, ಚಿಕ್ಕಬಳ್ಳಾಪುರ : 1049, ಚಾಮರಾಜನಗರ : 343, ಪುತ್ತೂರು : 544, ಕೆಂ.ಬ.ನಿ. ವಿಭಾಗ : 12, ಶಿವಮೊಗ್ಗ : 404, ಚಿತ್ರದುರ್ಗ : 421 ಒಟ್ಟು : 8414 ಪ್ರಕರಣಗಳು ಇತ್ಯರ್ಥಕ್ಕೆ ಬಾಕಿ ಇವೆ.

ಬಾಕಿ ಇರುವ ಗೈರು ಹಾಜರಿ ಪ್ರಕರಣ: ಬೆಂ.ಕೇ.ವಿಭಾಗ : 25, ರಾಮನಗರ : 20, ಕೋಲಾರ : 27, ತುಮಕೂರು : 55, ದಾವಣಗೆರೆ : 12, ಮೃಸೂರು : 96, ಮಂಡ್ಯ : 13, ಹಾಸನ : 22, ಚಿಕ್ಕಮಗಳೂರು : 8, ಮಂಗಳೂರು : 23, ಬೆಂ.ಪ್ರಾ.ಕಾ.ಗಾರ 1, ಹಾಸನ ಪ್ರಾದೇಶಿಕ ಕಾರ್ಯಾಗಾರ: 0, ಚಿಕ್ಕಬಳ್ಳಾಪುರ : 38, ಚಾಮರಾಜನಗರ : 14, ಪುತ್ತೂರು : 20, ಕೆಂ.ಬ.ನಿ.ವಿಭಾಗ : 0, ಶಿವಮೊಗ್ಗ : 21, ಚಿತ್ರದುರ್ಗ : 86 ಒಟ್ಟು : 481 ಪ್ರಕರಣಗಳು ಇತ್ಯರ್ಥಕ್ಕೆ ಬಾಕಿ ಇವೆ.