ಕುರಿಗಾಹಿಗಳಲ್ಲಿ ಮೌಢ್ಯ ಜೀವಂತ

ಶಿವಕುಮಾರ ಶಶಿಮಠ ಗಜೇಂದ್ರಗಡ
ಕುರಿಗಳನ್ನು ಅತ್ಯಂತ ಪ್ರೀತಿಯಿಂದ ಜತನಮಾಡುವ ಕುರಿಗಾರರು ಅವುಗಳಿಗೆ ರೋಗ ಬಾರದಂತೆ ತಡೆಯಲು ಟಗರಿಗೆ ಹಿಂಸೆ ನೀಡುವ ವಿಲಕ್ಷಣ ಪದ್ಧತಿಯನ್ನು ಇನ್ನೂ ಕೈಬಿಟ್ಟಿಲ್ಲ. ಮೂಕ ಪ್ರಾಣಿಗಳು ಗೋಗರೆದು, ಯಮಯಾತನೆ ಅನುಭವಿಸಿ ಪ್ರಾಣ ಬಿಟ್ಟರೂ ಮೌಢ್ಯದ ಮರೆಯಲ್ಲಿ ಅವರ ಮನಸು ಕರಗುವುದೇ ಇಲ್ಲ.
ಸಾಂಕ್ರಾಮಿಕ ರೋಗ ತಡೆಗಟ್ಟುವ ಉದ್ದೇಶದಿಂದ ಟಗರೊಂದನ್ನು ತಲೆ ಕೆಳಗೆ ಮಾಡಿ ಮರಕ್ಕೆ ನೇತು ಹಾಕಿ ಅಲ್ಲಿಂದ ಬೇರೆ ಪ್ರದೇಶಕ್ಕೆ ಸಂಚರಿಸುವ ಕುರಿಗಾರರು ವೈಜ್ಞಾನಿಕ ಯುಗದಲ್ಲೂ ಅನಿಷ್ಠ ಪದ್ಧತಿ ಮುಂದುವರಿಸಿಕೊಂಡು ಹೋಗುತ್ತಿದ್ದಾರೆ.
ಸಂಚಾರಿ ಕುರಿಗಾರರು ತಮ್ಮ ಬದುಕಿಗೆ ಆಧಾರವಾಗಿರುವ ಕುರಿಗಳಿಗೆ ಯಾವುದೇ ಸಾಂಕ್ರಾಮಿಕ ರೋಗ ತಗಲಬಾರದು ಎನ್ನುವ ಕಾರಣಕ್ಕಾಗಿ ಕುರಿ ಹಿಂಡಿನಲ್ಲಿರುವ ಟಗರನ್ನು ನಾಲ್ಕು ರಸ್ತೆಗಳು ಸೇರುವ ಜಾಗದ ಮಧ್ಯ ಭಾಗದಲ್ಲಿರುವ ಮರಕ್ಕೆ ಜೀವಂತವಾಗಿ ನೇತು ಹಾಕುತ್ತಾರೆ. ಎರಡು ಕಾಲುಗಳನ್ನು ಹಗ್ಗದಿಂದ ಕಟ್ಟಿ ತಲೆ ಕೆಳಗೆ ಮಾಡಿ ಗಿಡಕ್ಕೆ ನೇತು ಹಾಕುತ್ತಾರೆ. ಇಡೀ ದೇಹದ ಭಾರ ತಲೆಯ ಮೇಲೆ ಬೀಳುವುದರಿಂದ ಕುರಿಯ ಕಣ್ಣಿನಿಂದ ರಕ್ತ ಸೋರಲಾರಂಭಿಸುತ್ತದೆ. ನರಕಯಾತನೆ ಅನುಭವಿಸಿ ಕೆಲ ಗಂಟೆಗಳಲ್ಲಿ ಕೊನೆಯುಸಿರೆಳೆಯುತ್ತದೆ.
ಟಗರು ಪ್ರಾಣ ರಕ್ಷಣೆಗಾಗಿ ಗೋಗರೆಯುತ್ತಿದ್ದರೂ ಯಾರೊಬ್ಬರೂ ರಕ್ಷಣೆಗೆ ಮುಂದಾಗುವುದಿಲ್ಲ. ಅದರ ಮಾಂಸ ತಿನ್ನುವುದಿಲ್ಲ. ಒಂದು ವೇಳೆ ಯಾರಾದರೂ ಆ ಟಗರನ್ನು ರಕ್ಷಿಸಿದರೆ ಅಥವಾ ಮಾಂಸದ ಆಸೆಗೆ ಕುರಿಯನ್ನು ತೆಗೆದುಕೊಂಡು ಹೋದರೆ ಕುರಿಗಳಿಗೆ ಬರುವ ಬೇನೆ ರೋಗಗಳು ಮನುಷ್ಯನಿಗೆ ಬರುತ್ತದೆ ಎಂಬ ನಂಬಿಕೆ ಇದೆ.

ಮನುಷ್ಯನ ಆರೋಗ್ಯಕ್ಕೆ ಮಾರಕ
ಟಗರನ್ನು ನೇತು ಹಾಕುವುದರಿಂದ ಅದರ ರಕ್ತ ಕೆಳಗೆ ಬಿದ್ದು ನೊಣಗಳು ಮುತ್ತಿಕೊಳ್ಳುತ್ತವೆ. ಜತೆಗೆ ದುರ್ನಾತ ಬೀರುವುದರಿಂದ ಸುತ್ತ್ತನ ಹೊಲಗಳ ರೈತರ ಆರೋಗ್ಯದ ಮೇಲೆ ಕೆಟ್ಟ ಪರಿಣಾಮ ಬೀರುತ್ತದೆ. ಪ್ರಾಣಿಯ ಕಳೆಬರ ತಿಂಗಳು ಪರ್ಯಂತ ಇರುವುದರಿಂದ ಆ ಭಾಗದಲ್ಲಿ ಸಂಚರಿಸುವ ಪ್ರಯಾಣಿಕರಿಗೆ ತೀವ್ರ ತೊಂದರೆ ಉಂಟಾಗುತ್ತದೆ. ಕುರಿಗಾರರು ಹೀಗೆ ಮಾಡುವುದರಿಂದ ಮನುಷ್ಯರು ಹಾಗೂ ಇತರ ಪ್ರಾಣಿಗಳ ಆರೋಗ್ಯಕ್ಕೆ ಹಾನಿ ಉಂಟು ಮಾಡುತ್ತಾರೆ. ಸರ್ಕಾರ ಪಶು ಸಂಜೀವಿನಿ ಯೋಜನೆ ಜಾರಿಗೊಳಿಸಿದೆ. ಪ್ರಾಣಿಗೆ ತೊಂದರೆಯಾದರೆ ನೀವಿದ್ದ ಸ್ಥಳಕ್ಕೆ ಬಂದು ಕುರಿ ಹಾಗೂ ಜಾನುವಾರುಗಳಿಗೆ ಚಿಕಿತ್ಸೆ ಕೊಡಲಾಗುತ್ತದೆ. ಇಂತಹ ಯೋಜನೆಯನ್ನು ಸದ್ಬಳಕೆ ಮಾಡಿಕೊಳ್ಳಬೇಕು. ಇನ್ನು ಮುಂದಾದರೂ ಮೌಢ್ಯಕ್ಕೆ ಮಾರುಹೋಗುವುದನ್ನು ಬಿಡಬೇಕು ಎನ್ನುತ್ತಾರೆ ಸೂಡಿ ಗ್ರಾಮದ ರೈತ ಶಶಿಧರ ವಕ್ಕಲರ.