ಕಾರವಾರ: ರಾಜ್ಯದಲ್ಲಿ ಅತ್ಯಧಿಕ ಮತಗಳ ಅಂತರದಿಂದ ಆಯ್ಕೆಯಾದ ಉತ್ತರ ಕನ್ನಡ ಸಂಸದ ವಿಶ್ವೇಶ್ವರ ಹೆಗಡೆ ಕಾಗೇರಿ ಅವರಿಂದ ಮತದಾರರು ಅತ್ಯಧಿಕ ಅಭಿವೃದ್ಧಿಯ ನಿರೀಕ್ಷೆಯಲ್ಲಿದ್ದಾರೆ.
ಮಾಜಿ ಸ್ಪೀಕರ್ ಬಿಜೆಪಿಯ ವಿಶ್ವೇಶ್ವರ ಹೆಗಡೆ ಕಾಗೇರಿ ಅವರು ತಮ್ಮ ಪ್ರತಿಸ್ಪರ್ಧಿ ಕಾಂಗ್ರೆಸ್ನ ಡಾ.ಅಂಜಲಿ ನಿಂಬಾಳಕರ್ ವಿರುದ್ಧ 3.37 ಮತದಿಂದ ಜಯಗಳಿಸಿ, ಸಂಸತ್ನಲ್ಲಿ ಉತ್ತರಕನ್ನಡ ಕ್ಷೇತ್ರ ಪ್ರತಿನಿಧಿಸಲು ಸಜ್ಜಾಗಿದ್ದಾರೆ. ದೇಶದಲ್ಲಿ ಬಿಜೆಪಿ ನೇತೃತ್ವದ ಎನ್ಡಿಎ ಸರ್ಕಾರ ರಚನೆಯಾಗುತ್ತಿದೆ. ಜಿಲ್ಲೆಯ ಸಂಸದರೂ ಆಡಳಿತ ಪಕ್ಷವನ್ನೇ ಪ್ರತಿನಿಧಿಸುತ್ತಿರುವುದರಿಂದ ಸಹಜವಾಗಿ ಜನರ ನಿರೀಕ್ಷೆ ಹೆಚ್ಚಿದೆ.
ತಮ್ಮ ಗೆಲುವಿನ ಸಂಭ್ರಮದ ಕ್ಷಣಗಳನ್ನು ಜಾಲತಾಣಗಳಾದ ಫೇಸ್ಬುಕ್, ಇನ್ಸ್ಸ್ಟಾಗ್ರಾಂನಲ್ಲಿ ಹಂಚಿಕೊAಡ ಕಾಗೇರಿ ಅವರಿಗೆ ಸಾಕಷ್ಟು ಜನ ಅಭಿನಂದನೆ ಸಲ್ಲಿಸಿದ್ದಾರೆ. ಜತೆಗೆ ಹಿಂದೆಲ್ಲ ಆಗಿದ್ದಾಯಿತು. ಈಗ ಅಭಿವೃದ್ಧಿಯತ್ತ ಹೆಚ್ಚು ಗಮನ ಕೊಡಿ' ಎಂಬ ಸಲಹೆ ನೀಡಿದ್ದಾರೆ. ಕಾಗೇರಿ ಅವರು ಜಿಲ್ಲೆಯ ಅಭಿವೃದ್ಧಿ ಕಾರ್ಯದಲ್ಲಿ ಕ್ಷಿಪ್ರವಾಗಿ ಕಾರ್ಯಪ್ರವೃತ್ತವಾಗಲಿ ಎಂಬ ಒತ್ತಾಯ ಜನರಿಂದ ಕೇಳಿ ಬಂದಿದೆ. ಅಭಿವೃದ್ಧಿ ಕುಂಠಿತ: ಕಳೆದ 20 ವರ್ಷಗಳಿಂದ ನಿರಂತರವಾಗಿ (2004 ರಿಂದ 2024) ಉತ್ತರ ಕನ್ನಡದ ಲೋಕಸಭಾ ಸದಸ್ಯರಾಗಿದ್ದ ಬಿಜೆಪಿಯ ಅನಂತ ಕುಮಾರ ಹೆಗಡೆ ಅಭಿವೃದ್ಧಿಯ ವಿಚಾರ ಮಾತನಾಡುತ್ತಲೇ ಇರಲಿಲ್ಲ. ಹಿಂದುತ್ವದ ವಿಷಯದಲ್ಲಿ ಅವರ ಅಭಿಮಾನಿಯಾಗಿದ್ದವರೂ ಅನಂತ ಮಾಡಿದ ಅಭಿವೃದ್ಧಿಯ ವಿಚಾರ ಪ್ರಸ್ತಾಪಿಸಿದಾಗ ಮೌನಕ್ಕೆ ಜಾರುತಿದ್ದರು. ಮುಖ ಸಣ್ಣದು ಮಾಡುತ್ತಿದ್ದರು. ಪಕ್ಕದ ಉಡುಪಿ, ದಕ್ಷಿಣ ಕನ್ನಡ ಜಿಲ್ಲೆಗಳಿಗೆ ಹೋಲಿಸಿದರೆ ಉತ್ತರ ಕನ್ನಡ ಅಭಿವೃದ್ಧಿಯ ವಿಷಯದಲ್ಲಿ ಕನಿಷ್ಠ 10 ವರ್ಷ ಹಿಂದಿದೆ ಎಂಬುದು ಜಿಲ್ಲೆಯ ಜನರ ಕೊರಗು. ಆದರೆ, ಅನಂತ ಕುಮಾರ ಹೆಗಡೆಜನರು ಅಂದುಕೊಂಡ ಅಭಿವೃದ್ಧಿಯೇ ಬೇರೆ, ನನ್ನ ಅಭಿವೃದ್ಧಿಯ ಭಾಷ್ಯವೇ ಬೇರೆ' ಎನ್ನುತ್ತಿದ್ದರು. ಜಿಲ್ಲೆಯ ಜ್ವಲಂತ ಸಮಸ್ಯೆಗಳ ಬಗ್ಗೆ ಸ್ಪಂದಿಸದೇ, ಕೇಂದ್ರ ಮಟ್ಟದಲ್ಲಿ ಆಗಬಹುದಾದ ಕಾರ್ಯಗಳಿಗೆ ಜಿಲ್ಲೆಯಿಂದ ಸಮರ್ಥ ಧ್ವನಿಯೇ ಇಲ್ಲದೇ ಎರಡು ದಶಕಗಳೇ ಕಳೆದಿದ್ದವು. ಈಗ ಸಂಸದರು ಬದಲಾಗಿದ್ದರಿಂದ ಜನರಲ್ಲಿ ಮತ್ತೆ ನಿರೀಕ್ಷೆ ಮೂಡಿದೆ. ತಮ್ಮ ಪ್ರಣಾಳಿಕೆಯಲ್ಲಿ ನೀಡಿದ ಭರವಸೆಗಳನ್ನು ಶೀಘ್ರ ಜಾರಿಗೆ ತರುವ ಕಾರ್ಯವಾಗಲಿ ಎಂಬುದು ಜನಾಶಯವಾಗಿದೆ.
*ಅರಣ್ಯ ಅತಿಕ್ರಮಣ ಸಕ್ರಮ ಸಮಸ್ಯೆಗೆ ತಾರ್ಕಿಕ ಅಂತ್ಯ ಕಂಡುಕೊಳ್ಳುವುದು. ಅತಿಕ್ರಮಣದಾರರ ಗೋಳಿಗೆ ಸ್ಪಂದಿಸಬೇಕು.
*ಸೀಬರ್ಡ್ ನೌಕಾ ಯೋಜನೆ , ಕೈಗಾ ಅಣು ಸ್ಥಾವರ ಮುಂತಾದ ಕೇಂದ್ರ ಸರ್ಕಾರಿ ಸ್ವಾಮ್ಯದ ಇಲಾಖೆ, ಉದ್ದಿಮೆಗಳಲ್ಲಿ ಸ್ಥಳೀಯರಿಗೆ ಉದ್ಯೋಗ.
*ಕಾರವಾರ-ಭಟ್ಕಳ ಚತುಷ್ಪಥ ಕಾಮಗಾರಿಯ ಅವಾಂತರಗಳನ್ನು ಸರಿಪಡಿಸಬೇಕು. ಕಾಮಗಾರಿ ಮುಗಿಸುವಂತೆ ಮಾಡಬೇಕು.