ಇವರೇ ನಿಜವಾದ ಕರೊನಾ ಸೇನಾನಿಗಳು

ಹುಬ್ಬಳ್ಳಿ: ‘ಇವರಿಗೆ ಅವರ್ಯಾರೂ ರಕ್ತ ಸಂಬಂಧಿಕರಲ್ಲ, ಪರಿಚಯವೂ ಇಲ್ಲ. ಅವರ ಸಮಸ್ಯೆ, ಗೋಳು, ರೋಗರುಜಿನ ಯಾವುವೂ ಗೊತ್ತಿಲ್ಲ. ಆದರೆ, ಈ ಭೂಮಿಯ ಋಣ ತೀರಿದವರನ್ನು ಗೌರವಯುತವಾಗಿ ಸಂಸ್ಕಾರ ಮಾಡುವ ಕೈಂಕರ್ಯ ಇವರದ್ದು.’

ಹಾಗಂತ ಈ ಹೃದಯವಂತ ಸೇನಾನಿಗಳಿಗೆ ತಮ್ಮ ಕುಟುಂಬ, ಮಕ್ಕಳೊಂದಿಗೆ ಕಾಲ ಕಳೆಯುವ ಯೋಗವೂ ಇಲ್ಲ. ಇತ್ತ ಸಮಾಜವೂ ಅಸ್ಪೃಶ್ಯರ ರೀತಿ ಕಾಣವ ದೌರ್ಭಾಗ್ಯ ಬೇರೆ.

ಕೋವಿಡ್​-19 ಅಟ್ಟಹಾಸ ಮೆರೆಯುತ್ತಿದ್ದಂತೆ ಸಂಬಂಧ, ಸಂಸ್ಕಾರ, ಪ್ರೀತ್ಯಾಧಾರಗಳು ದೂರವಾಗುತ್ತಿರುವ ಈ ಕ್ಲಿಷ್ಟ ಪರಿಸ್ಥಿತಿಯಲ್ಲಿ ಕರೊನಾ ಬಲಿ ಪಡೆದ ಜನರ ಅಂತ್ಯಸಂಸ್ಕಾರ ನಡೆಸುವ ಶವಾಗಾರದ ಸಿಬ್ಬಂದಿಯೇ ನಿಜವಾದ ಕರೊನಾ ಸೇನಾನಿಗಳು.

ಕೋವಿಡ್​ನಿಂದ ಮೃತಪಟ್ಟವರ ಸಂಬಂಧಿಕರರಲ್ಲಿ ಕೆಲವರು ಅಂತ್ಯಸಂಸ್ಕಾರಕ್ಕೆ ಬಂದರೆ, ಕೆಲವರು ಬರುವುದಿಲ್ಲ. ಆದರೆ ಈ ಸೇನಾನಿಗಳು ಮಾತ್ರ ರಕ್ತಸಂಬಂಧಿಗಳಿಗಿಂತಲೂ ಹೆಚ್ಚು ಮುತುವರ್ಜಿ ವಹಿಸಿ, ಅಂತ್ಯಸಂಸ್ಕಾರ ಮಾಡುತ್ತಿದ್ದಾರೆ.

ದುಃಖಕರ ಸಂಗತಿಯೆಂದರೆ ಕೋವಿಡ್​ನಿಂದ ಮೃತರಾದರೆ ಸಂಬಂಧಿಸಿದ ಸಮುದಾಯದವರೆ ಅಂತ್ಯಕ್ರಿಯೆಗೆ ಜಾಗ ನೀಡಲು ಹಿಂದೇಟು ಹಾಕುತ್ತಿರುವುದು. ‘ಸತ್ತಾಗ ಎಲ್ಲ ದ್ವೇಷ ಮರೆಯಬೇಕು’ ಎಂಬ ಗಾದೆ ಇದೆ. ಆದರೆ, ಸತ್ತ ವ್ಯಕ್ತಿಯೊಂದಿಗೆ ಯಾವುದೇ ದ್ವೇಷ ಇರದಿದ್ದರೂ ಕೋವಿಡ್​ನಿಂದ ಮೃತಪಟ್ಟ ಒಂದೇ ಕಾರಣಕ್ಕೆ ಅಂತ್ಯಸಂಸ್ಕಾರಕ್ಕೆ ಜಾಗ ನೀಡದಿರುವುದು ಯಾವ ನ್ಯಾಯ ?

ಈ ಪರಿಸ್ಥಿತಿ ಮಧ್ಯೆಯೂ ಸಮುದಾಯದವರ ಮನವೊಲಿಸಿ, ಶವಾಗಾರದ ಸಿಬ್ಬಂದಿ ಅಂತ್ಯಸಂಸ್ಕಾರ ಮಾಡುತ್ತಿದ್ದಾರೆ. ಆದರೆ ಕೆಲವರು ಅಂತ್ಯಸಂಸ್ಕಾರಕ್ಕೆ ಜಾಗ ನೀಡದೆ ಪ್ರತಿಭಟಿಸುವುದು, ಮನವೊಲಿಕೆ ವಿಫಲವಾಗಿ ಮೃತ ವ್ಯಕ್ತಿಯ ಸಂಪ್ರದಾಯದಂತೆ ಅಂತ್ಯಸಂಸ್ಕಾರ ಮಾಡದ ನೋವು ಈ ಸೇನಾನಿಗಳಿಗೆ ಕಾಡುತ್ತಿದೆ.

ಕಿಮ್್ಸ ಸೇನಾನಿಗಳ ಕಾರ್ಯ :

ಹುಬ್ಬಳ್ಳಿಯ ಕಿಮ್್ಸ ಶವಾಗಾರದ ಸಿಬ್ಬಂದಿ ಕೋವಿಡ್​ನಿಂದ ಮೃತಪಟ್ಟವರ ಅಂತ್ಯಸಂಸ್ಕಾರ ನಡೆಸುವ ಕಾರ್ಯದಲ್ಲಿ ಕಳೆದ ಏಪ್ರಿಲ್​ನಿಂದಲೇ ನಿರತರಾಗಿದ್ದಾರೆ.

ವಿಧಿ-ವಿಜ್ಞಾನ ಸಂಸ್ಥೆಯ ಪ್ರಾಧ್ಯಾಪಕ ಹಾಗೂ ಕೋವಿಡ್​ನಿಂದ ಮೃತಪಟ್ಟವರ ದೇಹಗಳ ಅಂತ್ಯಸಂಸ್ಕಾರ ಮಾಡಲು ಮಾರ್ಗದರ್ಶನ ಮಾಡುವ ಡಾ. ಸುನಿಲಕುಮಾರ ಬಿರಾದಾರ ನೇತೃತ್ವದಲ್ಲಿ 12 ಸಿಬ್ಬಂದಿ ಕಾರ್ಯನಿರ್ವಹಿಸುತ್ತಿದ್ದಾರೆ.

ಇವರಲ್ಲಿ ಪರಶುರಾಮ ಮಲ್ಯಾಳ ಎಂಬ ಗ್ರುಪ್ ಡಿ ಸೂಪರ್​ವೈಸರ್ ಅವರನ್ನು ಹೊರತುಪಡಿಸಿದರೆ ಉಳಿದವರೆಲ್ಲ ಗುತ್ತಿಗೆ ಆಧಾರದ ಮೇಲೆ ಕಾರ್ಯನಿರ್ವಹಿಸುತ್ತಿದ್ದಾರೆ. ಗುತ್ತಿಗೆ ಆಧಾರದ ಈ ಸಿಬ್ಬಂದಿ ಪ್ರತಿ ತಿಂಗಳು ಪಡೆಯುವ ಸಂಬಳ 10,300 ರೂ. ಮಾತ್ರ. ಕೋವಿಡ್​ನಿಂದ ಮೃತಪಟ್ಟವರ ದೇಹದ ಅಂತ್ಯ ಸಂಸ್ಕಾರಕ್ಕೂ ಹೆಚ್ಚಿನ ಸಂಬಳ ಇವರಿಗೆ ನೀಡುತ್ತಿಲ್ಲ.

ಮುಸ್ಲಿಂ ಸಮುದಾಯದಲ್ಲಿ ಕೋವಿಡ್​ನಿಂದ ಮೃತಪಟ್ಟವರಿಗೆ ಅಂಜುಮನ್ ಸಂಸ್ಥೆಯೇ ಜಾಗ ನಿಗದಿಪಡಿಸಿದೆ. ಆದರೆ, ಇತರ ಸಮುದಾಯದವರು ಈ ದೇಹಗಳ ಅಂತ್ಯ ಸಂಸ್ಕಾರಕ್ಕೆ ಜಾಗ ಮೀಸಲಿಟ್ಟಿಲ್ಲ. ಹಾಗಾಗಿ ಈಗಿರುವ ರುದ್ರಭೂಮಿಯಲ್ಲಿಯೇ ಶವಗಳ ಅಂತ್ಯಸಂಸ್ಕಾರ ಮಾಡುವುದು ಅನಿವಾರ್ಯ.

ಪಿಪಿಇ ಕಿಟ್ ನರಕ :

ಅಂತ್ಯಸಂಸ್ಕಾರ ಮುಗಿಯುವವರೆಗೂ ಪಿಪಿಇ ಕಿಟ್ ಧರಿಸುವುದು ನರಕಯಾತನೆಯೇ ಸರಿ. ಒಂದು ಬಾರಿ ಪಿಪಿಇ ಕಿಟ್ ಧರಿಸಿದರೆ ಮುಗೀತು, ಅಂತ್ಯಸಂಸ್ಕಾರ ಆಗುವವರೆಗೂ ಈ ಕಿಟ್ ತೆಗೆಯುವ ಹಾಗಿಲ್ಲ. ಅದುವರೆಗೂ ಒಂದು ಹನಿ ನೀರನ್ನು ಕುಡಿಯದ, ಏನನ್ನೂ ತಿನ್ನದ, ಮಲ-ಮೂತ್ರ ವಿಸರ್ಜನೆಗೂ ಹೋಗದಂತಹ ದುಸ್ಥಿತಿ ಈ ಸೇನಾನಿಗಳದ್ದು. ಇದರ ಮೇಲೆ ಪಿಪಿಇ ಕಿಟ್​ನಿಂದ ದೇಹದಲ್ಲಿ ಹೆಚ್ಚುವ ತಾಪಮಾನವನ್ನೂ ತಡೆದುಕೊಳ್ಳಬೇಕು.

ಹಾವೇರಿ, ಬಳ್ಳಾರಿ, ದಾಂಡೇಲಿ, ಗದಗ ಸೇರಿದಂತೆ ಸುತ್ತಲಿನ ಜಿಲ್ಲೆಗಳ ಕೋವಿಡ್ ಸೋಂಕಿತರು ಕಿಮ್ಸ್​ನಲ್ಲಿ ಚಿಕಿತ್ಸೆಗೆ ದಾಖಲಾಗುತ್ತಾರೆ. ಚಿಕಿತ್ಸೆ ಫಲಿಸದೆ ಸಾವಿಗೀಡಾದರೆ ಮೃತರ ಜಿಲ್ಲೆಗಳಿಗೆ ದೇಹ ತೆಗೆದುಕೊಂಡು ಹೋಗಿ, ಅಂತ್ಯಸಂಸ್ಕಾರ ಆಗುವವರೆಗೂ ಈ ಸಿಬ್ಬಂದಿ ಕಿಟ್ ತೆಗೆಯುವಂತಿಲ್ಲ.

ಘಟನೆ 1: ಸಮುದಾಯವೊಂದರ ಧರ್ಮಗುರುವೊಬ್ಬರು ಕೆಲ ದಿನಗಳ ಹಿಂದೆ ಕೋವಿಡ್​ನಿಂದ ಹುಬ್ಬಳ್ಳಿಯಲ್ಲಿ ಮೃತಪಟ್ಟಿದ್ದರು. ಧರ್ಮಗುರುವಿನ ಅಂತ್ಯಸಂಸ್ಕಾರಕ್ಕೆ ಜಾಗ ನೀಡಲು ಆ ಸಮುದಾಯದವರು ಒಪ್ಪಲಿಲ್ಲ. ಸಮುದಾಯದ ಮುಖಂಡರ ಮನವೊಲಿಸಲು ಶವಾಗಾರದ ಸಿಬ್ಬಂದಿ ಮಾಡಿದ ಪ್ರಯತ್ನ ವ್ಯರ್ಥವಾಯಿತು. ಕೊನೆಗೆ ಆ ಸಮುದಾಯದ ನಿಯಮ ಪಾಲನೆ ಬಿಟ್ಟು ಧರ್ಮಗುರುವಿನ ಅಂತ್ಯಸಂಸ್ಕಾರವನ್ನು ಶವಾಗಾರದ ಸಿಬ್ಬಂದಿ ಮಾಡಿದರು. ಧರ್ಮ ಬೋಧನೆ ಮಾಡುತ್ತಿದ್ದ ಗುರುವಿಗೆ ಆ ಧರ್ಮದಂತೆ ಅಂತ್ಯಸಂಸ್ಕಾರ ನಡೆಯದಾಯಿತು.

ಘಟನೆ 2: ಕೆಲ ದಿನಗಳ ಹಿಂದಷ್ಟೇ ದಾಂಡೇಲಿಯ ಕೋವಿಡ್ ಮೃತನ ದೇಹವನ್ನು ಹುಬ್ಬಳ್ಳಿ ಶವಾಗಾರದ ಸಿಬ್ಬಂದಿ ತೆಗೆದುಕೊಂಡು ಹೋದಾಗ, ರುದ್ರಭೂಮಿಯಲ್ಲಿ ಶವ ಹೂಳಲು ತೆಗ್ಗನ್ನೂ ತೋಡಿರಲಿಲ್ಲ. 8 ಅಡಿ ತಗ್ಗು ತೋಡುವವರೆಗೂ ಅಂದಾಜು 4 ತಾಸು ಪಿಪಿಇ ಕಿಟ್​ನಲ್ಲಿಯೇ ಈ ಸಿಬ್ಬಂದಿ ಇರಬೇಕಾಯಿತು. 6-7 ತಾಸು ಕಿಟ್ ಧರಿಸಿದ್ದರಿಂದ ಸಿಬ್ಬಂದಿಯೊಬ್ಬನ ಆರೋಗ್ಯ ಸ್ಥಿತಿಯೂ ಬಿಗಡಾಯಿಸಿತು.

ಘಟನೆ 3: ಧಾರವಾಡದ ದಾನೇಶ್ವರಿ ನಗರದಲ್ಲಿ ಇತ್ತೀಚೆಗೆ ಕೋವಿಡ್​ನಿಂದ ಮೃತಪಟ್ಟ ವ್ಯಕ್ತಿಯ ಅಂತ್ಯಸಂಸ್ಕಾರ ನಡೆಸದಂತೆ ಸ್ಥಳೀಯರು ಪ್ರತಿಭಟನೆ ನಡೆಸಿದ್ದರು. ಕೊನೆಗೆ ಶವಾಗಾರ ಸಿಬ್ಬಂದಿಯ ಮನವೊಲಿಕೆ ನಂತರ ಅಂತ್ಯಸಂಸ್ಕಾರಕ್ಕೆ ಒಪ್ಪಿಕೊಂಡರು.

ಘಟನೆ 4: ಶವಾಗಾರದ ಸಿಬ್ಬಂದಿಯ ಬಾಲ್ಯ ಸ್ನೇಹಿತನೊಬ್ಬ ಕೋವಿಡ್​ನಿಂದ ಮೃತನಾಗಿದ್ದ. ಆತನ ಅಂತ್ಯಸಂಸ್ಕಾರಕ್ಕೆ ಜಾಗ ನೀಡುವಂತೆ ಸಿಬ್ಬಂದಿ ಪರಿಪರಿಯಾಗಿ ಬೇಡಿಕೊಂಡರೂ ಸಮುದಾಯದವರು ಜಾಗ ನೀಡಲು ನಿರಾಕರಿಸಿದರು.