ಸಾಗರ: ಅಡಕೆ ಬೆಳೆಗಾರರು ಆಧುನಿಕ ತಂತ್ರಜ್ಞಾನ ಅಳವಡಿಸಿಕೊಳ್ಳುವ ತುರ್ತು ಸಂದರ್ಭ ಎದುರಾಗಿದೆ. ಕೃಷಿ ಕೂಲಿಕಾರ್ವಿುಕರ ಕೊರತೆ ಇರುವ ಸಂದರ್ಭದಲ್ಲಿ ಅಡಕೆ ಬೆಳೆಗಾರರು ಹೊಸ ಹೊಸ ಆವಿಷ್ಕಾರಗಳ ಮೊರೆ ಹೋಗುವುದು ಅನಿವಾರ್ಯ ಎಂದು ಆಪ್ಸ್ಕೋಸ್ ಅಧ್ಯಕ್ಷ ಬಿ.ಎ.ಇಂದೂಧರ ಬೇಸೂರು ಹೇಳಿದರು.
ನಗರದ ಎಪಿಎಂಸಿ ಆವರಣದಲ್ಲಿ ಮಂಗಳವಾರ ಆಪ್ಸ್ಕೋಸ್ನಿಂದ ಅಡಕೆ ಕೊಯ್ಯಲು, ಔಷಧ ಸಿಂಪಡಣೆ ಹಾಗೂ ತೆಂಗಿನ ಕಾಯಿ ಕೀಳಲು ಕಾರ್ಬನ್ ಫೈಬರ್ ದೋಟಿ ಪ್ರಾತ್ಯಕ್ಷಿಕೆ ಕಾರ್ಯಕ್ರಮಕ್ಕೆ ಚಾಲನೆ ನೀಡಿ ಮಾತನಾಡಿದರು.
60 ಅಡಿ ಎತ್ತರದ ಈ ದೋಟಿಯಿಂದ ಅಡಕೆ ಕೊಯ್ಯಲು, ಔಷಧ ಸಿಂಪಡಿಸಲು ಸಾಧ್ಯ. ಒಬ್ಬರೇ ಇದನ್ನು ನಿರ್ವಹಿಸಬಹುದು. ಇದರಿಂದ ಕೂಲಿ ಕಾರ್ವಿುಕರ ಸಮಸ್ಯೆ ನೀಗಿಸಬಹುದು. ಪ್ರತಿ 10 ಅಡಿಗೆ ಒಂದೊಂದು ಹಂತದಲ್ಲಿ ದೋಟಿ ವಿಸ್ತರಿಸಬಹುದು ಎಂದು ತಿಳಿಸಿದರು.
ಬೆಳೆಗಾರರ ಅನುಕೂಲಕ್ಕಾಗಿ ಆಪ್ಸ್ಕೋಸ್ನಿಂದ ವಿವಿಧ ತಂತ್ರಜ್ಞಾನ ಅಳವಡಿಸಲಾಗುತ್ತಿದೆ. ಹಿಂದೆ ಆಪ್ಸ್ಕೋಸ್ ಗ್ರೀನ್ ಸಾವಯವ ಗೊಬ್ಬರ ಬಿಡುಗಡೆ ಮಾಡಿತ್ತು. ಇದಕ್ಕೆ ಬೆಳೆಗಾರರಿಂದ ಉತ್ತಮ ಪ್ರತಿಕ್ರಿಯೆ ಸಿಕ್ಕಿದೆ. ಡೊಲೋಮೀಟ್ ಸುಣ್ಣ ಸಹ ಆಪ್ಸ್ಕೋಸ್ನಿಂದ ಮಾರಾಟ ಮಾಡಲಾಗುತ್ತಿದೆ ಎಂದರು.
ಉಪಾಧ್ಯಕ್ಷ ಎ.ಒ.ರಾಮಚಂದ್ರ, ನಿರ್ದೇಶಕರಾದ ಕೆ.ಎಂ.ಸೂರ್ಯನಾರಾಯಣ, ಆರ್.ಎಸ್.ಗಿರಿ, ಕೆ.ಕಲ್ಯಾಣಪ್ಪ ಗೌಡ, ರಾಘವೇಂದ್ರ ಹೊಡಬಟ್ಟೆ, ಸೀತಾರಾಮಯ್ಯ ಕಟ್ಟಿನಕೆರೆ, ಮಂಜಪ್ಪ, ಕಾರ್ಯದರ್ಶಿ ನಂದೀಶ್ಕುಮಾರ್, ಸಲಹೆಗಾರ ವಿಶ್ವನಾಥ್ ಹೆಗಡೆ, ಎಚ್.ಎನ್.ಲಂಬೋದರ ಇದ್ದರು.
ಅಡಕೆ ಬೆಳೆಗಾರರಾದ ನಾವು ಹಿಂದಿನಿಂದಲೂ ಕೊಳೆ ರೋಗದಿಂದ ಬೆಳೆ ಕಳೆದುಕೊಳ್ಳುತ್ತಿದ್ದೆವು. ಹವಾಮಾನ ವೈಪರೀತ್ಯ ಇನ್ನಿತರ ಕಾರಣಗಳಿಂದ ಅಡಕೆ ತೋಟಕ್ಕೆ ಸಕಾಲಕ್ಕೆ ಔಷಧ ಸಿಂಪಡಿಸಲು ಸಾಧ್ಯವಾಗುತ್ತಿರಲಿಲ್ಲ. ಈ ಹಿನ್ನೆಲೆಯಲ್ಲಿ ಕಾರ್ಬನ್ ಫೈಬರ್ ದೋಟಿಯನ್ನು ಅರಕಲಗೂಡಿನಿಂದ ತರಿಸಿದ್ದೇವೆ.
| ಬಿ.ಎ.ಇಂದೂಧರ ಬೇಸೂರು, ಆಪ್ಸ್ಕೋಸ್ ಅಧ್ಯಕ್ಷ