ಅತಂತ್ರ ಸ್ಥಿತಿಯಲ್ಲಿ ಸುಡಗಾಡ ಸಿದ್ಧರು

ಮುಳಗುಂದ: ಇನ್ನೊಬ್ಬರ ಭವಿಷ್ಯ ಹೇಳಿ ತಾವು ಬದುಕು ಸಾಗಿಸುತ್ತಿದ್ದ ಸುಡುಗಾಡ ಸಿದ್ಧರ ಬದುಕು ಅತಂತ್ರವಾಗಿದೆ. ತುತ್ತು ಅನ್ನಕ್ಕೂ ಪರದಾಡುವಂತಹ ಸ್ಥಿತಿ ನಿರ್ವಣವಾಗಿದೆ.

ಚಿಂಚಲಿ ಗ್ರಾಮದ ಮಲ್ಲಿಕಾರ್ಜುನ ನಗರದಲ್ಲಿ ಅಂದಾಜು 30 ಸುಡುಗಾಡ ಸಿದ್ಧರ ಕುಟುಂಬಗಳು ವಾಸವಾಗಿವೆ. ಸರ್ಕಾರ ಇವರಿಗೆ ವಸತಿ ಸೌಕರ್ಯವೇನೋ ಕಲ್ಪಿಸಿದೆ. ಆದರೆ, ಕರೊನಾ ಹಿನ್ನೆಲೆಯಲ್ಲಿ ಸರ್ಕಾರ ಒದಗಿಸುತ್ತಿರುವ ಯಾವ ಸೌಲಭ್ಯವೂ ಅವರಿಗೆ ಸಿಕ್ಕಿಲ್ಲ.

ಬೇರೆಯವರ ಭವಿಷ್ಯ ಹೇಳಿ ಬದುಕುತ್ತಿದ್ದ ಜನ, ಕಾಲ ಬದಲಾದಂತೆ ಕೆಲವರು ಕೂಲಿ ಮಾಡಿ ಜೀವನ ಸಾಗಿಸುತ್ತಿದ್ದಾರೆ. ಮತ್ತೆ ಕೆಲವರು ಜಾತ್ರೆ ಹಾಗೂ ಹಳ್ಳಿಗಳಿಗೆ ತೆರಳಿ ಸ್ಟೇಷನರಿ ವಸ್ತು ಹಾಗೂ ಪ್ಲಾಸ್ಟಿಕ್ ವಸ್ತುಗಳನ್ನು ಮಾರಾಟ ಮಾಡುವ ಕಾಯಕಕ್ಕೆ ಹೊಂದಿಕೊಂಡಿದ್ದಾರೆ. ಮಾರಕ ರೋಗ ಕರೊನಾದ ಕರಿಛಾಯೆ ಆವರಿಸಿದ ಮೇಲೆ ಒಂದೂವರೆ ತಿಂಗಳಿಂದ ಕೂಲಿ ಹಾಗೂ ವ್ಯಾಪಾರಕ್ಕೆ ಕಲ್ಲು ಬಿದ್ದಿದೆ.

ಜನಪ್ರತಿನಿಧಿಗಳು, ಸಂಘ- ಸಂಸ್ಥೆಗಳು ಬಡ ಕುಟುಂಬದವರಿಗೆ ಆಹಾರ ಧಾನ್ಯದ ಕಿಟ್​ಗಳನ್ನು ನೀಡಿ ಸಂಕಷ್ಟಕ್ಕೆ ಸ್ಪಂದಿಸುತ್ತಿದ್ದಾರೆ. ಆದರೆ, ಸುಡುಗಾಡ ಸಿದ್ಧರ ಸಂಕಷ್ಟ ಮಾತ್ರ ಯಾರಿಗೂ ಕಾಣಿಸುತ್ತಿಲ್ಲ. ಸರ್ಕಾರ ಇತರ ಸಮುದಾಯಕ್ಕೆ ವಿಶೇಷ ಪ್ಯಾಕೇಜ್ ಘೊಷಿಸಿದಂತೆ ನಮ್ಮ ಸಮುದಾಯಕ್ಕೂ ಏನಾದರೂ ಅನುಕೂಲ ಮಾಡಬಹುದು ಎಂದು ಚಾತಕ ಪಕ್ಷಿಯಂತೆ ಕಾಯುತ್ತಿದ್ದೇವೆ ಎನ್ನುತ್ತಾರೆ ಇಲ್ಲಿನ ಜನ.