ಕಮಲಾಪುರ: ಭೂಸಣಗಿ ಮರ್ಗದಿಂದ ಕಣ್ಣೂರ ಗ್ರಾಮಕ್ಕೆ ಹೋಗುವ ಮರ್ಗ ಮಧ್ಯದಲ್ಲಿ ಅಕ್ರಮವಾಗಿ ಅಕ್ಕಿ ಸಾಗಿಸುತ್ತಿದ್ದ ಲಾರಿಯನ್ನು ವಶಕ್ಕೆ ಪಡೆದು ಜಪ್ತಿ ಮಾಡಿದ ಘಟನೆ ಶುಕ್ರವಾರ ಸಂಜೆ ಜರುಗಿದೆ. ಲಾರಿ ಚಾಲಕ ಹಾಗೂ ಕ್ಲೀನರ್ ಲಾರಿಯನ್ನು ಬಿಟ್ಟು ಪರಾರಿಯಾಗಿದ್ದಾರೆ. ಲಾರಿ ಯಾರಿಗೆ ಸೇರಿದ್ದು, ಎಷ್ಟು ಪ್ರಮಾಣದ ಅಕ್ಕಿ ಲಾರಿಯಲ್ಲಿದೆ ಎಂಬುದು ಆಹಾರ ಇಲಾಖೆ ಹಾಗೂ ಪೋಲಿಸರು ಖಚಿತಪಡಿಸಿಲ್ಲ. ನಿರಂತರ ಮಳೆಯಿಂದ ಮಾಹಿತಿ ಕಲೆ ಹಾಕಲು ವಿಳಂಬವಾಯಿತು. ಸ್ಥಳಕ್ಕೆ ಕಮಲಾಪುರ ಸಿಪಿಐ ಶಿವಶಂಕರ್ ಸಾಹು, ಆಹಾರ ನಿರೀಕ್ಷಕ ಸಂತೋಷ ಸೋಲಾಪುರೆ, ಮಹಾಗಾಂವ ಪಿಎಸ್ಐ ಬಸವರಾಜ ಚಿತ್ತಕೋಟೆ ಭೇಟಿ ನೀಡಿ ಲಾರಿ ಮತ್ತು ಅಕ್ಕಿಯನ್ನು ವಶಕ್ಕೆ ಪಡೆದುಕೊಂಡಿದ್ದಾರೆ. ಈ ಕುರಿತು ಮಹಾಗಾಂವ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.