ಔರಾದ್: ಕನ್ನಡ ಬರೀ ಭಾಷೆಯಲ್ಲ. ನಮ್ಮ ಉಸಿರು, ಬದುಕು ಎಂದು ಗ್ರಾಮ ಪಂಚಾಯಿತಿ ಅಧ್ಯಕ್ಷೆ ಲಕ್ಷ್ಮೀಬಾಯಿ ವಗ್ಗೆ ಹೇಳಿದರು.
ಧೂಪತಮಹಾಗಾಂವ ಗ್ರಾಪಂನಲ್ಲಿ ಏರ್ಪಡಿಸಿದ್ದ ರಾಜ್ಯೋತ್ಸವದಲ್ಲಿ ಮಾತನಾಡಿದ ಅವರು, ಕರ್ನಾಟಕ ತನ್ನದೇ ಆದ ಶ್ರೀಮಂತ ಪರಂಪರೆ, ಸಂಸ್ಕೃತಿ, ಇತಿಹಾಸ ಹೊಂದಿರುವ ಪಾವನ ಭೂಮಿ. ಕಲೆ ಸಾಹಿತ್ಯದ ತವರು ಎಂದರು.
ಗ್ರಾಪಂ ಮಾಜಿ ಅಧ್ಯಕ್ಷ ಶ್ರೀನಿವಾಸ ಜೊನ್ನಿಕೇರೆ ಮಾತನಾಡಿ, ಸ್ವಾತಂತ್ರ್ಯ ಪೂರ್ವ ಹಲವು ಪ್ರಾಂತ್ಯಗಳಲ್ಲಿ ಹರಿದು ಹಂಚಿಹೋಗಿದ್ದ ಕನ್ನಡಿಗರನ್ನು ಒಗ್ಗೂಡಿಸಿ ಕರ್ನಾಟಕ ಏಕೀಕರಣ ಮಾಡಲಾಯಿತು. ರಾಜ್ಯವಲ್ಲದೆ ದೇಶ, ವಿದೇಶದಲ್ಲಿ ನೆಲೆಸಿರುವ ಕನ್ನಡ ಭಾಷಿಕರು ಈ ದಿನವನ್ನು ಅತ್ಯಂತ ವೈಭವದಿಂದ ಆಚರಿಸಿ ತಾಯಿ ಭುವನೇಶ್ವರಿಗೆ ನಮಿಸುತ್ತಾರೆ ಎಂದರು.
ಪಿಡಿಒ ಅನಿತಾ ರಾಠೋಡ್, ಶಿವಕುಮಾರ ಪಾಟೀಲ್, ಶಶಿಕಲಾ ಬಿರಾದಾರ್, ವಿಶ್ವನಾಥ ಬಿರಾದಾರ್, ನಿಜಲಿಂಗಪ್ಪ ಪಾಟೀಲ್, ಚಂದ್ರಕಾಂತ ಸ್ವಾಮಿ, ಮಹೇಶ ಪವಾರ್, ಸಿದ್ರಾಮೇಶ್ವರ, ಪ್ರಕಾಶ, ಗಣಪತಿ, ಸಂಜು, ಶಿವಾನಂದ ಸ್ವಾಮಿ, ರಾಜಕುಮಾರ ಪಾಟೀಲ್ ಇತರರಿದ್ದರು.