ರಸ್ತೆ ಕಾಮಗಾರಿ ಸಂಚಾರ ಸಿಕ್ಕಿನ ಕಿರಿಕಿರಿ

> ಪವನ್​ ಆಚಾರ್ಯ ನೀರ್ಚಾಲು ಬೆಂಗಳೂರು

ಗಿರಿನಗರ ಸಮೀಪದ ಎಸ್​ಬಿಎಂ ಕಾಲನಿ 80 ಅಡಿ ರಸ್ತೆಯಲ್ಲಿ ವೈಟ್​ ಟಾಪಿಂಗ್​ ಕಾಮಗಾರಿಗಳು ನಡೆಯುತ್ತಿದ್ದು, ನಿಧಾನಗತಿಯ ಕೆಲಸದಿಂದ ಜನರಿಗೆ ಸಂಚಾರ ಸಿಕ್ಕಿನ ಕಿರಿಕಿರಿ ಉಂಟಾಗಿದೆ. ಸುತ್ತಮುತ್ತಲಿನ ವ್ಯಾಪಾರಸ್ಥರಿಗೆ ವ್ಯಾಪಾರವಿಲ್ಲದೆ ಜೀವನವೇ ಸಂಕಷ್ಟವಾಗಿದೆ.

ಕಾಮಗಾರಿ ಪ್ರಾರಂಭವಾಗಿ ತಿಂಗಳು ಕಳೆದಿದೆ. ಇನ್ನು 6 ತಿಂಗಳ ಕೆಲಸ ಬಾಕಿ ಇದ್ದು, ಇದರಿಂದ ವ್ಯಾಪಾರಸ್ಥರು ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಈ ತಿಂಗಳ ಅಂತ್ಯದಲ್ಲಿ ನಾಡಹಬ್ಬ ದಸರಾ ಪ್ರಾರಂಭವಾಗುತ್ತಿದ್ದು, ಅತಿಹೆಚ್ಚು ಗ್ರಾಹಕರನ್ನು ಆಕರ್ಷಿಸುವ ಹಾಗೂ ಉತ್ತಮ ವ್ಯಾಪಾರ&ವಹಿವಾಟಿನ ಸಂದರ್ಭದಲ್ಲಿ ಈ ರೀತಿ ತೊಂದರೆ ನೀಡುತ್ತಿರುವುದು ಬೇಸರ ತರಿಸಿದೆ ಎಂದು ಈ ರಸ್ತೆಬದಿಯ ವ್ಯಾಪಾರಿಗಳು ಅವಲತ್ತುಕೊಂಡಿದ್ದಾರೆ.

ಕಾಮಗಾರಿಗಳು ನಡೆಯುತ್ತಿರುವುದರಿಂದಲೇ ಈ ಮಾರ್ಗದಲ್ಲಿ ಸಂಚಾರ ನಡೆಸಲು ಜನರು ಹಿಂದೇಟು ಹಾಕುತ್ತಿದ್ದಾರೆ. ಬಹುತೇಕ ಮಂದಿ ಹತ್ತಿರದ ಪರ್ಯಾಯ ಮಾರ್ಗಗಳಲ್ಲಿ ಸಂಚರಿಸಿದರೆ, ಏಕಮುಖವಾಗಿ ವಾಹನಗಳು ಸಂಚಾರ ನಡೆಸಿದರೂ ವಿರುದ್ಧ ದಿಕ್ಕಿನಿಂದ ದೊಡ್ಡ ಗಾತ್ರದ ವಾಹನವೊಂದು ಬಂದರೆ ಸಾಕು ಸೀತಾ ಸರ್ಕಲ್​ನಿಂದ ಮುಖ್ಯರಸ್ತೆ ಸೇರುವತನಕ ಕಿಮೀ ಗಟ್ಟಲೆ ವಾಹನದಟ್ಟಣೆ ಉಂಟಾಗುತ್ತದೆ. ಜತೆಗೆ ನಿತ್ಯವೂ ಧೂಳಿನ ಮಜ್ಜನ, ಕಲುಷಿತ ವಾತಾವರಣ ಸಾಮಾನ್ಯ ದೃಶ್ಯವಾಗಿದೆ.

ಅವಡಕ್ಕೆ ಆಹ್ವಾನ ನೀಡುವ ಹೊಂಡಗಳು: ರಸ್ತೆಗೆ ವೈಟ್​ ಟಾಪಿಂಗ್​ ಜತೆಗೆ ವಿದ್ಯುತ್​, ನೀರು ಸಂಬಂಧಿಸಿದಂತೆ ಹಲವು ಕೆಲಸಗಳು ಜತೆಯಲ್ಲೇ ನಡೆಯುತ್ತಿರುವುದರಿಂದ ಈ ರಸ್ತೆ ಸಮಸ್ಯೆಗಳ ಆಗರವಾಗಿದೆ. ರಸ್ತೆಯ ಇಬ್ಭಾಗದಲ್ಲೂ ಹೊಂಡಗಳನ್ನು ಅಗೆಯಲಾಗಿದೆ. ಮಣ್ಣನ್ನು ಅಲ್ಲೇ ಪಕ್ಕದಲ್ಲಿ ಗುಡ್ಡೆ ಹಾಕಲಾಗಿದೆ. ಇದರಿಂದ ಪಾದಾಚಾರಿಗಳಿಗೆ ತೊಂದರೆಯಾಗುತ್ತಿದೆ. ಹಲವು ಮಂದಿ ಹೊಂಡದ ಪಕ್ಕದಲ್ಲಿ ಬಿದ್ದಿದ್ದು, ಹೆಚ್ಚಿನ ಅಪಘಾತಗಳು ನಡೆಯುವ ಸಾಧ್ಯತೆ ಇದೆ. ಈ ಮಾರ್ಗದಲ್ಲಿ ಸಂಚಾರ ನರಕ ಸದೃಶವಾಗಿದ್ದು, ಸಂಬಂಧಪಟ್ಟ ಅಧಿಕಾರಿಗಳು ವ್ಯವಸ್ಥಿತವಾಗಿ ಕಾಮಗಾರಿ ನಡೆಸಬೇಕೆಂದು ಸ್ಥಳಿಯರು ಆಗ್ರಹಿಸಿದ್ದಾರೆ.