ಕೃಷಿಕರಿಗೆ ಕಹಿಯಾದ ಕಲ್ಲಂಗಡಿ

ಶ್ರೀಪತಿ ಹೆಗಡೆ ಹಕ್ಲಾಡಿ ಕುಂದಾಪುರ
ಬೈಂದೂರು ತಾಲೂಕು ವ್ಯಾಪ್ತಿಯಲ್ಲಿ ಶಿರೂರಿನಿಂದ ಹೆಮ್ಮಾಡಿ ತನಕ 150 ಹೆಕ್ಟೇರ್ ಅಧಿಕ ಕೃಷಿ ಭೂಮಿಯಲ್ಲಿ ಕಲ್ಲಂಗಡಿ ಬೆಳೆ ಬೆಳೆಯುತ್ತಿದ್ದು, ಮಾರುಕಟ್ಟೆ, ಬೆಲೆ ಏರಿಳಿತ, ಲಾಕ್‌ಡೌನ್ ಸಮಸ್ಯೆ ಜತೆ ಈ ವರ್ಷ ಚಂಡಮಾರುತ ಹೊತ್ತುತಂದ ಮಳೆಯಿಂದಾಗಿ ಹಣ್ಣು ಗದ್ದೆಯಲ್ಲೇ ಕೊಳೆಯುತ್ತಿದೆ.
ಕಿರಿಮಂಜೇಶ್ವರ, ಹೇರೂರು ಕಂಬದಕೋಣೆ ಗ್ರಾಮದಲ್ಲಿ ಬಹುತೇಕ ಕೃಷಿಕರು ಎರಡನೇ ಬೆಳೆಯಾಗಿ ಕಲ್ಲಂಗಡಿ ಬೆಳೆಯುತ್ತಾರೆ. ಈ ಬಾರಿ ಕಟಾವಿನ ಸಂದರ್ಭ ಲಾಕ್‌ಡೌನ್ ಘೋಷಣೆಯಾದ್ದರಿಂದ ಮಾರುಕಟ್ಟೆ ಸಮಸ್ಯೆ ಎದುರಾಗಿದೆ. ಹೊರರಾಜ್ಯ ವಹಿವಾಟಿಗೆ ಹೊಡೆತ ಬೀಳುವುದರೊಂದಿಗೆ ಸ್ಥಳೀಯವಾಗಿ ಮಾರಾಟ ಸಾಧ್ಯವಾಗುತ್ತಿಲ್ಲ. ಹೋಟೆಲ್, ಜ್ಯೂಸ್ ಅಂಗಡಿಗಳೂ ಬಂದ್ ಆಗಿರುವುದರಿಂದ ಕಲ್ಲಂಗಡಿ ಕೇಳುವವರಿಲ್ಲ.
ಎರಡು ವರ್ಷಗಳ ಹಿಂದೆ ಈ ಭಾಗದ ಕಲ್ಲಂಗಡಿ ಹಣ್ಣುಗಳಿಗೆ ತಮಿಳುನಾಡು, ಕೇರಳದಲ್ಲಿ ಬಹಳ ಬೇಡಿಕೆ ಇತ್ತು. ಆದರೆ ಇತ್ತೀಚೆಗೆ ಸಮಸ್ಯೆಯಾಗಿದೆ. ಕಳೆದ ವರ್ಷದ ಹೊಡೆತದಿಂದ ಈ ಬಾರಿಯಾದರೂ ಚೇತರಿಸಿಕೊಳ್ಳುವ ಭರವಸೆಯಿತ್ತು. ಬದಲಿಗೆ ಮತ್ತಷ್ಟು ಸಾಲದ ಹೊರೆ ರೈತರ ಹೆಗಲೇರಿದೆ.
 ಕಲ್ಲಂಗಡಿ ಹಣ್ಣಿಂದ ಜೋನಿ ಬೆಲ್ಲ: ಶಿವಮೊಗ್ಗ ಜಿಲ್ಲೆಯ ಹೊಸನಗರ ತಾಲೂಕಿನ ನಿಟ್ಟೂರು ಜಯರಾಮ ಶೆಟ್ಟಿ ಎಂಬವರು ಕಲ್ಲಂಗಡಿ ಹಣ್ಣಿನ ರಸದಿಂದ ಬೆಲ್ಲ ತಯಾರಿಸಿ ರೈತರಲ್ಲಿ ಆಶಾಭಾವ ಮೂಡಿಸಿದ್ದಾರೆ. ನಾಲ್ಕು ಎಕ್ರೆಯಲ್ಲಿ ಕಲ್ಲಂಗಡಿ ಬೆಳೆದಿರುವ ಅವರಿಗೆ ಕಳೆದ ವರ್ಷ ಮಾರುಕಟ್ಟೆ ಸಮಸ್ಯೆ ನಷ್ಟವಾಗಿತ್ತು. ಈ ಬಾರಿ ಮತ್ತೆ ಸಮಸ್ಯೆಯಾಗಿ ಗದ್ದೆಯಲ್ಲಿ ಹಾಳಾಗುವ ಸ್ಥಿತಿ ನಿರ್ಮಾಣವಾದಾಗ, ಬೆಳೆಗೆ ಮಾಡಿದ ವೆಚ್ಚವನ್ನಾದರೂ ಗಳಿಸಬೇಕು ಎಂದು ನಿಶ್ಚಯಿಸಿ ಬೆಲ್ಲ ಮಾಡಲು ಮುಂದಾಗಿದ್ದಾರೆ. ಆಲೆಮನೆಯಲ್ಲಿ ಬೆಲ್ಲ ಕಾಯಿಸಿ ಸಿದ್ಧಪಡಿಸುವಂತೆ ಕಲ್ಲಂಗಡಿ ಸಿಪ್ಪೆ ತೆಗೆದು ಕೊಪ್ಪರಿಗೆಯಲ್ಲಿ ಕುದಿಸುವ ಮೂಲಕ ಬೆಲ್ಲ ತೆಗೆಯುವ ಸಾಹಸ ಯಶಸ್ವಿಯಾಗಿದೆ. ಬೆಲ್ಲದ ರುಚಿ ಸವಿದ ಯಕ್ಷಗಾನ ಕಲಾವಿದ ನಿಟ್ಟೂರು ಅನಂತ ಹೆಗಡೆ, ಬೆಲ್ಲ ಜೋನಿಯಾಗಿದ್ದರೂ ರುಚಿ, ಘಮ ಕಬ್ಬಿನ ಬೆಲ್ಲದಂತೆ ಇದೆ. ಕಲ್ಲಂಗಡಿ ಹಣ್ಣಿನ ಸಿಪ್ಪೆಯಲ್ಲಿ ಸಾಕಷ್ಟು ಪೋಷಕಾಂಶವಿದ್ದು, ಅದನ್ನು ಪಶು ಆಹಾರವಾಗಿ ಸಿದ್ಧಪಡಿಸಿದರೆ ರೈತರಿಗೆ ಆದಾಯ ಹೆಚ್ಚುವುದಲ್ಲದೆ, ಪಶುಗಳಿಗೆ ಶುದ್ಧ ಆಹಾರ ಸಿಗುತ್ತದೆ ಎಂದು ಸಲಹೆ ನೀಡಿದ್ದಾರೆ.