ನೌಕಕರ ಪ್ರತಿಭಟನೆಗೆ ಗ್ರಾಮಾಡಳಿತ ಸ್ತಬ್ಧ

ಉಡುಪಿ: ಗ್ರಾಮಾಡಳಿತದ ಕೇಂದ್ರಸ್ಥಾನ ಗ್ರಾಮ ಪಂಚಾಯಿತಿ. ಆದರೆ ಕಳೆದ 1 ವಾರದಿಂದ ಪಿಡಿಒ ಸಹಿತ ಎಲ್ಲಾ ನೌಕರರು ವಿವಿಧ ಬೇಡಿಕೆಗೆ ಆಗ್ರಹಿಸಿ ಪ್ರತಿಭಟನೆಗೆ ಇಳಿದಿರುವುದರಿಂದ ದೈನಂದಿನ ಕೆಲಸದಲ್ಲಿ ವ್ಯತ್ಯವಾಗಿದ್ದು, ಸಾರ್ವಜನಿಕರು ತೊಂದರೆ ಅನುಭವಿಸುತ್ತಿದ್ದಾರೆ.

ಜಿಲ್ಲೆಯ 155 ಗ್ರಾಪಂಗಳಲ್ಲಿ 136 ಮಂದಿ ಪಿಡಿಒಗಳು ಕಾರ್ಯನಿರ್ವಹಿಸುತ್ತಿದ್ದು, 19 ಹುದ್ದೆಗಳು ಖಾಲಿ ಇವೆ. 52 ಮಂದಿ ಗ್ರೇಡ್​&1 ಕಾರ್ಯದರ್ಶಿಗಳು, 47 ಮಂದಿ ಗ್ರೇಡ್​&2 ಕಾರ್ಯದರ್ಶಿಗಳಿದ್ದು, ತಲಾ 27 ಹುದ್ದೆಗಳು ಖಾಲಿ ಇವೆ. ಎಸ್​ ಡಿ ಎ ಹುದ್ದೆಯಲ್ಲಿ 59ರ ಬದಲಿಗೆ 42 ಮಂದಿ ಕಾರ್ಯನಿರ್ವಹಿಸುತ್ತಿದ್ದಾರೆ.

1993ರ ಪಂಚಾಯತ್​ರಾಜ್​ ಕಾಯ್ದೆ ಪ್ರಕಾರ ಗ್ರಾ.ಪಂ.ಗೆ ನಿಗದಿಪಡಿಸಲಾದ ಜನಸಂಖ್ಯೆ ಉಡುಪಿ ಜಿಲ್ಲೆಗೆ 2500. ಪ್ರಸ್ತುತ ಈ ಜನಸಂಖ್ಯೆ ದುಪ್ಪಟ್ಟಾಗಿದ್ದರೂ ಸಿಬ್ಬಂದಿ ಸಂಖ್ಯೆ ಹೆಚ್ಚಾಗಿಲ್ಲ. ಮೂರು ವರ್ಷಗಳಿಂದ ಖಾಲಿಯಾದ ಹುದ್ದೆಗೆ ನೇಮಕಾತಿ ನಡೆದಿಲ್ಲ. ಎನ್​ಆರ್​ಇಜಿ ಸಹಿತ ನೂರಾರು ಯೋಜನೆಗಳು ಜಾರಿಯಾಗುತ್ತಿದ್ದರೂ ಸಮರ್ಥವಾಗಿ ನಿರ್ವಹಿಸಲೂ ಸಿಬ್ಬಂದಿ ಕೊರತೆ ಉಂಟಾಗಿದೆ. ಪಿಡಿಒ, ಕಾರ್ಯದರ್ಶಿ, ಎಸ್​ಡಿಎ ಅವರಿಗೆ ಬಡ್ತಿ ಇಲ್ಲದೆ ಜೀವನ ಪರ್ಯಂತ ಒಂದೆ ಹುದ್ದೆಯಲ್ಲಿ ಕೆಲಸ ಮಾಡುವಂತಾಗಿದೆ. ವಾಟರ್​ಮೆನ್​, ಬಿಲ್​ ಕಲೆಕ್ಟರ್​, ಡಾಟಾ ಎಂಟ್ರಿ ಆಪರೇಟರ್​, ಸ್ವಚ್ಛತಾ ಸಿಬಂದಿ ಸರ್ಕಾರಿ ನೌಕರರೋ ಅಥವಾ ಹೊರಗುತ್ತಿಗೆ ಸಿಬ್ಬಂದಿಯೋ ಎಂಬ ಬಗ್ಗೆ ಸ್ಪಷ್ಟತೆ ಇಲ್ಲದೆ ಸಂಕಷ್ಟ ಅನುಭವಿಸುತ್ತಿದ್ದಾರೆ. ಇವರಿಗೆ ಪಿಎಫ್​, ಇಎಸ್​ಐ ಸೌಲಭ್ಯಗಳಿಲ್ಲ. ಹೀಗಾಗಿ ಅ.4ರಿಂದ ಪಂಚಾಯತ್​ ರಾಜ್​ ಇಲಾಖೆ ವ್ಯಾಪ್ತಿಯ ಎಲ್ಲ ನೌಕರರು ರಾಜ್ಯಾದ್ಯಂತ ಹೋರಾಟ ನಡೆಸುತ್ತಿದ್ದಾರೆ. ಆದರೆ ಸರ್ಕಾರ ಈ ಬಗ್ಗೆ ಗಂಭೀರವಾಗಿಲ್ಲ.

ಈ ಹಿಂದೆ ಬೇರೆ ಬೇರೆ ಸಂಟನೆಗಳ ಮೂಲಕ ಪ್ರತಿಭಟನೆ ನಡೆಯುತ್ತಿದ್ದರೂ ಪಿಡಿಒ, ಕಾರ್ಯದರ್ಶಿ, ಎಸ್​ಡಿಎ, ಪಂಚ ನೌಕರರಾದ ವಾಟರ್​ ಮೆನ್​, ಬಿಲ್​ ಕಲೆಕ್ಟರ್​, ಅಟೆಂಡರ್​, ಡಾಟ ಎಂಟ್ರಿ ಆಪರೇಟರ್​, ಸ್ವಚ್ಛತ ಸಿಬಂದಿ ಸಹಿತ 11 ವೃಂದ ಸಂಟನೆಗಳು ಒಟ್ಟಾಗಿ ಪ್ರತಿಭಟನೆಗೆ ಇಳಿದಿದ್ದಾರೆ. ನೌಕರರು ಪಂಚಾಯಿತಿಯಲ್ಲಿ ಕೆಲಸಕ್ಕೆ ಗೈರಾಗಿದ್ದು, ಪ್ರತಿಭಟನೆಯಲ್ಲಿ ಭಾಗಿಯಾಗಿದ್ದಾರೆ. ಇದರಿಂದ ಗ್ರಾಮ ಪಂಚಾಯಿತಿ ಸೇವೆಗಳು ಅಸ್ತವ್ಯಸ್ತವಾಗಿವೆ.

ಸೇವೆಯಲ್ಲಿ ವ್ಯತ್ಯಯ
ಗ್ರಾ.ಪಂ. ನೌಕರರ ಮುಷ್ಕರದಿಂದ ಕುಡಿಯುವ ನೀರು ಪೂರೈಕೆ, ಬೀದಿದೀಪ ನಿರ್ವಹಣೆ, 9&11 ಖಾತೆ ಸೇವೆ, ಕಟ್ಟಡ ಲೈಸೆನ್ಸ್​, ನಿಧನ ಪ್ರಮಾಣ ಪತ್ರ, ಉದ್ದಿಮೆ ಪರವಾನಿಗೆ ಪತ್ರ, ಉದ್ಯೋಗ ಖಾತ್ರಿ ಯೋಜನೆ, ಅರ್ಜಿ ವಿಲೇವಾರಿ, ತ್ವರಿತ ಕಾರ್ಯಗಳ ಆದೇಶ ಮತ್ತಿತರ ಸೇವೆಗಳಿಗೆ ತೊಂದರೆಯಾಗಿದೆ.