ಭಾರತೀಯ ಜನತಾ ಪಕ್ಷವೇ ನಮ್ಮ ಜಾತಿ

ಇಂಡಿ ನಗರದಲ್ಲಿ ಗುರುವಾರ ಹಮ್ಮಿಕೊಂಡಿದ್ದ ‘ಬಿಎಲ್‌ಎ-2 ಕಾರ್ಯಾಗಾರ-2026’ರ ಉದ್ಘಾಟನೆ ನೆರವೇರಿಸಿ ಮಾತನಾಡಿದ ಅವರು, ‘ಚುನಾವಣೆಗಳು ಬಂದಾಗ ಪಕ್ಷದ ಕಾರ್ಯಕರ್ತರು ಎಲ್ಲಿದ್ದಾರೆಂದು ಹುಡುಕಿದರೆ ಎಲ್ಲರೂ ಜಾತಿ ಆಧರಿಸಿ ಹೋಗಿರುತ್ತಾರೆ. ಇದು ಪಕ್ಷಕ್ಕೆ ಮಾಡುವ ದ್ರೋಹವಲ್ಲವೇ? ದಲಿತನಾದರೂ ನನಗೂ ಒಂದು ಜಾತಿ ಇದೆ. ಹಾಗಂತ ಜಾತಿ ಮಾಡಿದ್ದರೆ 48 ವರ್ಷಗಳ ಸುದೀರ್ಘವಾಗಿ ನಾನು ಅಧಿಕಾರದಲ್ಲಿರಲು ಸಾಧ್ಯವಿತ್ತೇ? ಈ 48 ವರ್ಷಗಳ ರಾಜಕಾರಣದಲ್ಲಿ ಎಲ್ಲಿಯಾದರೂ ನನ್ನ ಪಕ್ಕದಲ್ಲೊಬ್ಬ ದಲಿತ ವ್ಯಕ್ತಿ ಇರುವುದನ್ನು ಗಮನಿಸಿದ್ದೀರಾ?’ ಎಂದು ಕಾರ್ಯಕರ್ತರನ್ನು ಪ್ರಶ್ನಿಸಿದರು.

‘ಯಾವುದೇ ಒಂದು ಜಾತಿಯಿಂದ ರಾಜಕಾರಣ ಸಾಧ್ಯವಿಲ್ಲ, ವಿರೇಂದ್ರ ಪಾಟೀಲರ ಕಾಲಕ್ಕೆ 42 ಜನ ಲಿಂಗಾಯತ ಶಾಸಕರಿದ್ದರು. ಸ್ವತಃ ವಿರೇಂದ್ರ ಪಾಟೀಲ ಲಿಂಗಾಯತರಾಗಿದ್ದರೂ ಅವರ ಜೊತೆ ಯಾರೊಬ್ಬರೂ ನಿಲ್ಲಲಿಲ್ಲ. ಹೀಗಾಗಿ ಜಾತಿ ಪರಿಗಣಿಸದೇ ಪಕ್ಷಕ್ಕೆ ಶ್ರಮಿಸಿ, ನಮ್ಮೆಲ್ಲರ ಭವಿಷ್ಯ ಪಕ್ಷದ ಏಳಿಗೆಯಲ್ಲಿ ಅಡಗಿದೆ’ ಎಂದರು.

‘ಮಹಾರಾಷ್ಟ್ರದ ಮತದಾರರನ್ನು ಅಕ್ರಮವಾಗಿ ಸೇರ್ಪಡೆ ಮಾಡಲಾಗಿದೆ ಎಂಬ ಆರೋಪ ಕೇಳಿ ಬಂದಿದೆ, ಅಂಥ ನಕಲಿ ಮತದಾರರ ಮಾಹಿತಿ ಕಂಡು ಬಂದರೆ ನನಗೆ ತಿಳಿಸಿ, ಖಂಡಿತ ಅಂಥವರನ್ನು ಮತದಾರರ ಪಟ್ಟಿಯಿಂದ ಕಿತ್ತೊಗೆಯುವ ಕೆಲಸ ಮಾಡುತ್ತೇನೆ, ಪಕ್ಷ ಬಲವರ್ಧನೆಗೆ ಇಳಿ ವಯಸ್ಸಿನಲ್ಲಿಯೂ ನಾನು ಗಟ್ಟಿಯಾಗಿದ್ದೇನೆ, ನೀವೂ ಗಟ್ಟಿಯಾಗಿ’ ಎಂದು ಜಿಗಜಿಣಗಿ ಕಾರ್ಯಕರ್ತರನ್ನು ಹುರಿದುಂಬಿಸಿದರು.

70 ವರ್ಷ ಕಾಂಗ್ರೆಸ್ ಮಾಡದ ಕೆಲಸವನ್ನು ಮೋದಿ ಕೇವಲ 16 ವರ್ಷದಲ್ಲಿ ಮಾಡಿ ತೋರಿಸಿದ್ದಾನೆ. ಪ್ರಪಂಚದ ಶ್ರೀಮಂತ ರಾಷ್ಟ್ರಗಳಲ್ಲಿ ಭಾರತ ಮುಂಚೂಣಿಯಲ್ಲಿದೆ. ಬಿಜೆಪಿ ಜಗತ್ತಿನ ಅತೀ ದೊಡ್ಡ ಪಕ್ಷವಾಗಿ ಹೊರಹೊಮ್ಮಿದೆ. ದೇಶದ ದಿಕ್ಕನ್ನೇ ಬದಲಿಸಿರುವ ಬಿಜೆಪಿಯಲ್ಲಿ ನಾವೆಲ್ಲ ಕಾರ್ಯಕರ್ತರಾಗಿ ಸೇವೆ ಸಲ್ಲಿಸುತ್ತಿರುವುದು ನಮ್ಮ ಹೆಮ್ಮೆ ಎಂದು ಭಾವಿಸಬೇಕೆಂದರು.

ಜಿಲ್ಲಾ ಪಂಚಾಯಿತಿ, ತಾಲೂಕು ಪಂಚಾಯಿತಿ ಹಾಗೂ ಗ್ರಾಮ ಪಂಚಾಯಿತಿ ಚುನಾವಣೆ ಯಾವಾಗ ಬೇಕಾದರೂ ಬರಬಹುದು. ಕಾರ್ಯಕರ್ತರು ಯಾವಾಗಲೂ ಸನ್ನದ್ಧರಾಗಬೇಕು. ಪಕ್ಷ ಯಾರನ್ನೇ ಗುರುತಿಸಿ ಅಭ್ಯರ್ಥಿಯನ್ನಾಗಿಸಿದರೂ ಅವರನ್ನು ಗೆಲ್ಲಿಸಬೇಕೆಂದರು.

ಮುಖಂಡರಾದ ಕಾಸುಗೌಡ ಬಿರಾದಾರ, ವಿವೇಕಾನಂದ ಡಬ್ಬಿ, ಅನೀಲ ಜಮಾದಾರ, ದೇವೇಂದ್ರ ಕುಂಬಾರ, ಎಸ್.ಎ. ಪಾಟೀಲ, ರವಿ ವಗ್ಗೆ ಮತ್ತಿತರರಿದ್ದರು.