ಸಾವಿನ ದವಡೆಯಿಂದ ಮಗು ಪಾರು

ಸೈಕಲ್ ಅಪಘಾತದಿಂದಾಗಿ ಮಗುವಿನ ದೇಹದ ಹಲವು ಅಂಗಾಂಗಗಳಿಗೆ ತೀವ್ರ ಪೆಟ್ಟಾಗಿದ್ದು, ವೈದ್ಯರ ಸಮಯೋಚಿತ ಮತ್ತು ನಿಖರ ಚಿಕಿತ್ಸೆಯಿಂದಾಗಿ ಸದ್ಯ ಮಗುವು ಚೇತರಿಸಿಕೊಳ್ಳುತ್ತಿದೆ.

ಮಗುವನ್ನು ಆಸ್ಪತ್ರೆಗೆ ದಾಖಲಿಸಿದಾಗ ಸ್ಥಿತಿ ಅತ್ಯಂತ ಗಂಭೀರವಾಗಿತ್ತು. ಹೊಟ್ಟೆಯೊಳಗೆ ಅತಿಯಾದ ರಕ್ತಸ್ರಾವ, ಯಕೃತ್ತಿನ ನಾಲ್ಕನೇ ಹಂತದ ಗಂಭೀರ ಗಾಯಗಳು ಹಾಗೂ ಪಿತ್ತರಸ ಸೋರಿಕೆ, ಮೆಸೆಂಟರಿಕ್ ಟಿಯರ್ ಮತ್ತು ಶ್ವಾಸಕೋಶದ ಭಾಗದಲ್ಲಿ ರಕ್ತ ಸಂಗ್ರಹವಾಗುವಂತಹ ಪ್ರಾಣಾಪಾಯದ ಲಕ್ಷಣಗಳು ಕಂಡು ಬಂದಿದ್ದವು.

ತಜ್ಞ ವೈದ್ಯರ ನೇತೃತ್ವದಲ್ಲಿ ಯಶಸ್ವಿ ಶಸ್ತ್ರ ಚಿಕಿತ್ಸೆ: ಅತ್ಯಂತ ಸವಾಲಿನ ತುರ್ತು ಶಸ್ತ್ರ ಚಿಕಿತ್ಸೆಯ ನೇತೃತ್ವವನ್ನು ಖ್ಯಾತ ನವಜಾತ ಶಿಶು ಮತ್ತು ಮಕ್ಕಳ ಶಸ್ತ್ರಚಿಕಿತ್ಸಕ ಡಾ. ಸುರೇಂದ್ರ ಅಗರ್ವಾಲ್ ಅವರು ವಹಿಸಿದ್ದರು. ಮಕ್ಕಳ ಶಸ್ತ್ರ ಚಿಕಿತ್ಸಾ ವಿಭಾಗದಲ್ಲಿ ಅಪಾರ ಅನುಭವ ಹೊಂದಿರುವ ಡಾ. ಸುರೇಂದ್ರ ಅವರು, ತ್ವರಿತ ನಿರ್ಧಾರ ಮತ್ತು ತಾಂತ್ರಿಕ ಕೌಶಲದಿಂದಾಗಿ ರಕ್ತಸ್ರಾವ ನಿಯಂತ್ರಿಸುವ ಮೂಲಕ ಯಕೃತ್ತಿನ ಸಂಕೀರ್ಣ ಗಾಯಗಳನ್ನು ಯಶಸ್ವಿಯಾಗಿ ಸರಿಪಡಿಸಿದರು.

ಶಸ್ತ್ರಚಿಕಿತ್ಸೆಯ ಸಮಯ ಮತ್ತು ನಂತರದ ಐಸಿಯು ನಿರ್ವಹಣೆಯಲ್ಲಿ ಅರಿವಳಿಕೆ ತಜ್ಞೆ ಡಾ. ಮೀನಲ್ ಅಗರ್ವಾಲ್ ಅವರು ಪ್ರಮುಖ ಪಾತ್ರ ನಿರ್ವಹಿಸಿದ್ದರು. ಅವರೊಂದಿಗೆ ಮಕ್ಕಳ ತಜ್ಞರಾದ ಡಾ. ಆದರ್ಶ್ ಬಗಲಿ, ಡಾ. ಲೋಕೇಶ ಅಹಿರಸಂದ ಮತ್ತು ಡಾ. ಸಾಗರ ಅವರನ್ನೊಳಗೊಂಡ ವೈದ್ಯರ ತಂಡವು ಸಮನ್ವಯತೆಯಿಂದ ಕೆಲಸ ಮಾಡಿ ಮಗುವಿನ ಜೀವ ಉಳಿಸುವಲ್ಲಿ ಯಶಸ್ವಿಯಾಗಿದೆ.

ಇದು ಮರುಜನ್ಮ: ಕುಟುಂಬದ ಕೃತಜ್ಞತೆ ಮಗುವಿನ ಪೋಷಕರು ಮತ್ತು ಸಂಬಂಧಿಕರು ವೈದ್ಯರ ತಂಡಕ್ಕೆ ತುಂಬು ಹೃದಯದ ಧನ್ಯವಾದಗಳನ್ನು ಅರ್ಪಿಸಿದ್ದಾರೆ. ಮಗುವಿನ ಸ್ಥಿತಿ ನೋಡಿ ನಾವು ನಂಬಿಕೆಯನ್ನೇ ಕಳೆದುಕೊಂಡಿದ್ದೆವು. ಆದರೆ ಡಾ. ಸುರೇಂದ್ರ

ಅಗರ್ವಾಲ್ ಮತ್ತು ಆರ್‌ಕೆಎಂ ಆಸ್ಪತ್ರೆಯ ತಂಡವು ನಮ್ಮ ಮಗುವಿಗೆ ಮರುಜನ್ಮ ನೀಡಿದೆ. ಅವರ ದಕ್ಷತೆ ಮತ್ತು ಕಾಳಜಿಯನ್ನು ನಾವು ಎಂದಿಗೂ ಮರೆಯಲು ಸಾಧ್ಯವಿಲ್ಲ ಎಂದು ಕುಟುಂಬದ ಸದಸ್ಯರು ಕೃತಜ್ಞತೆ ಸಲ್ಲಿಸಿದ್ದಾರೆ.