ಶಿಕ್ಷಣ ಇಲಾಖೆಯಲ್ಲಿ ಅಕ್ರಮ ಪ್ರಕರಣ, ಶಿಸ್ತು ಕ್ರಮಕ್ಕೆ ಸಿಇಒ ಶಿಫಾರಸು

ಕಳೆದ ವಾರವೇ ವರದಿ ರವಾನಿಸಿರುವ ಮಾಹಿತಿ ಲಭ್ಯವಾಗಿದೆ. ಪ್ರಕರಣದ ಸಮಗ್ರ ತನಿಖೆ ಕೈಗೊಳ್ಳಲಾಗಿ ಹಲವು ಲೋಪ-ದೋಷಗಳು ಕಂಡು ಬಂದಿವೆ. ದಾಖಲೆಗಳ ಪರಿಶೀಲನೆ ನಡೆಸಲಾಗಿ ಲೋಪಗಳಿದ್ದು, ನಿಯಮ ಉಲ್ಲಂಘಿಸಿರುವುದು ಸ್ಪಷ್ಟವಾಗಿದೆ. ಹೀಗಾಗಿ ಕ್ರಮ ಕೈಗೊಳ್ಳುವಂತೆ ಶಿಫಾರಸ್ಸು ಮಾಡಲಾಗಿದೆ. ವರದಿಯ ಪ್ರತಿ ಶಾಲಾ ಶಿಕ್ಷಣ ಇಲಾಖೆ ಹಾಗೂ ಧಾರವಾಡದ ಅಪರ ಆಯುಕ್ತರ ಕಚೇರಿಗೆ ರವಾನಿಸಲಾಗಿದೆ.

ಶಾಲೆಗಳ ಮಾನ್ಯತೆ ನವೀಕರಣ ಹಾಗೂ ಪ್ರಥಮ ಮಾನ್ಯತೆಗೆ ಸಂಬಂಧಿಸಿದಂತೆ ಜಿಲ್ಲಾ ಪಂಚಾಯಿತಿ ಕೆಡಿಪಿ ಸಭೆಯಲ್ಲಿ ಕೂಡ ಚರ್ಚೆಯಾಗಿತ್ತು. ಇಂಡಿ ಶಾಸಕ ಯಶವಂತರಾಯಗೌಡ ಪಾಟೀಲ ಹಾಗೂ ವಿಪ ಸದಸ್ಯ ಕೇಶವ ಪ್ರಸಾದ ಈ ಕುರಿತು ಬೆಳಕು ಚೆಲ್ಲಿದ್ದರು. ಆಗ ಜಿಲ್ಲಾ ಉಸ್ತುವಾರಿ ಸಚಿವ ಎಂ.ಬಿ. ಪಾಟೀಲರು ತನಿಖೆ ಕೈಗೊಳ್ಳುವಂತೆ ಸೂಚಿಸಿದ್ದರು. ಇದಕ್ಕೂ ಮುನ್ನವೇ ಜಿಲ್ಲಾ ಪಂಚಾಯಿತಿಯಿಂದ ಈ ಕುರಿತು ತನಿಖೆಗೆ ಮುಂದಾಗಿತ್ತು. 2025 ಆಗಸ್ಟ್‌ನಲ್ಲಿಯೇ 5 ಜನರ ತಂಡ ರಚಿಸಲಾಗಿತ್ತು. ಮುಂದುವರಿದ ಭಾಗವಾಗಿ ‘ವಿಜಯವಾಣಿ’ಯಲ್ಲಿ ನಿರಂತರವಾಗಿ ವರದಿ ಪ್ರಕಟಿಸುವ ಮೂಲಕ ಅಕ್ರಮದ ಕುರಿತು ಬೆಳಕು ಚೆಲ್ಲುತ್ತಿದ್ದಂತೆ ತನಿಖೆ ಮತ್ತಷ್ಟು ಚುರುಕುಗೊಂಡಿತು. ಇದೀಗ ತನಿಖಾ ವರದಿಯೊಪ್ಪಿಸಿರುವುದಾಗಿ ಅಧಿಕಾರಿಗಳು ಪ್ರತಿಕ್ರಿಯಿಸಿದ್ದಾರೆ.

ಶಾಲೆಗಳ ಪ್ರಥಮ ಮಾನ್ಯತೆ ಹಾಗೂ ಮಾನ್ಯತೆ ನವೀಕರಣಕ್ಕೆ ಸಂಬಂಧಿಸಿದಂತೆ ಜಿಲ್ಲಾ ಪಂಚಾಯಿತಿಯಿಂದ ರಚಿಸಲಾಗಿರುವ ಐವರ ತಂಡ 2-3 ಬಾರಿ ಶಾಲೆಗಳಿಗೆ ಹಾಗೂ ಶಿಕ್ಷಣ ಇಲಾಖೆಗೆ ಭೇಟಿ ನೀಡಿ ಪರಿಶೀಲನೆ ನಡೆಸಿದೆ. ಆನ್‌ಲೈನ್‌ನಲ್ಲಿ ಕೂಡ ಪರಿಶೀಲಿಸಿದ್ದು ದಾಖಲೆಗಳು ಅಸಮರ್ಪಕವಾಗಿರುವುದು ಕಂಡು ಬಂದಿದೆ. 2023-24 ಹಾಗೂ 2025-26ನೇ ಸಾಲಿನಲ್ಲಿ ಪ್ರಥಮ ಮಾನ್ಯತೆ ನೀಡಿರುವ ಹಾಗೂ ಮಾನ್ಯತೆ ನವೀಕರಿಸಿರುವ ದಾಖಲೆ ಪರಿಶೀಲನೆ ನಡೆಸಲಾಗಿದೆ. ಒಟ್ಟು 411 ಅನುದಾನ ರಹಿತ ಶಾಲೆಗಳ ಪ್ರಾರಂಭಕ್ಕೆ ಪ್ರಥಮ ಮಾನ್ಯತೆ ನೀಡಲು ಅರ್ಜಿಗಳು ಸಲ್ಲಿಕೆಯಾಗಿದ್ದು, ಅಂದಾಜು 274 ಅರ್ಜಿಗಳು ಪುರಸ್ಕೃತವಾಗಿರುವುದು ಕಂಡು ಬಂದಿದೆ. ಸುಮಾರು 133 ಅರ್ಜಿಗಳು ತಿರಸ್ಕೃತಗೊಂಡಿದ್ದು, 4 ಅರ್ಜಿಗಳು ಬಾಕಿ ಇವೆ. ಅನುದಾನಿತ ಶಾಲೆಗಳಿಂದ 284 ಅರ್ಜಿ ಸಲ್ಲಿಕೆಯಾಗಿದ್ದು, ಅದರಲ್ಲಿ 215 ಪುರಸ್ಕೃತಗೊಂಡರೆ 28 ಅರ್ಜಿ ತಿರಸ್ಕೃತಗೊಂಡಿವೆ. 

ಇನ್ನು ಮಾನ್ಯತೆ ನವೀಕರಣಕ್ಕಾಗಿ ಸಲ್ಲಿಕೆಯಾಗಿರುವ 918 ಅರ್ಜಿಗಳ ಪೈಕಿ 885ಪುರಸ್ಕೃತಗೊಂಡಿರುವುದು ಕಂಡು ಬಂದಿದೆ. ಈ ಅವಧಿಯಲ್ಲಿ ನಾಲ್ವರು ಡಿಡಿಪಿಐ, ಇಬ್ಬರು ಕಚೇರಿ ಗೆಜೆಟೆಡ್ ಮ್ಯಾನೇಜರ್ ಹಾಗೂ ವಿಷಯ ನಿರ್ವಾಹಕರು ಕಾರ್ಯನಿರ್ವಹಿಸಿರುವ ಬಗ್ಗೆ ವರದಿಯಲ್ಲಿ ಉಲ್ಲೇಖಿಸಿರುವುದಾಗಿ ಮೂಲಗಳು ತಿಳಿಸಿವೆ.

ಸುತ್ತೋಲೆ ಪ್ರಕಾರ ವಿಷಯ ನಿರ್ವಾಹಕರು, ಪತ್ರಾಂಕಿತ ವ್ಯವಸ್ಥಾಪಕರು ಹಾಗೂ ಗೆಜೆಟೆಡ್ ಮ್ಯಾನೇಜರ್‌ಗಳು ಅರ್ಜಿಗಳನ್ನು ಪರಿಶೀಲಿಸಿ ಡಿಡಿಪಿಐಗೆ ಅಭಿಪ್ರಾಯ ಸಲ್ಲಿಸಬೇಕು. ಬಳಿಕ ಡಿಡಿಪಿಐ ಪರಿಶೀಲಿಸಿ ಅನುಮೋದಿಸುವ ಮೂಲಕ ನವೀಕರಣ ಮಾಡಬಹುದಾಗಿದೆ. ಆದರೆ, ಇಲ್ಲಿ ಯಾವುದೇ ಕಡತ, ದಾಖಲೆ ಪರಿಶೀಲಿಸದೇ ನಿಯಮ ಗಾಳಿಗೆ ತೂರಿ ಡಿಡಿಪಿಐಗಳು ಶಾಲೆ ತೆರೆಯಲು ಅನುಮತಿ ನೀಡಿರುವುದು ಕಂಡು ಬಂದಿದೆ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ. ಈ ವರದಿ ಆಧಾರದ ಮೇಲೆ ಮುಂದಿನ ಕ್ರಮ ಕೈಗೊಳ್ಳಲು ಧಾರವಾಡದ ಅಪರ ಆಯುಕ್ತರಿಗೆ ಪತ್ರ ರವಾನಿಸಿರುವ ಮಾಹಿತಿ ಲಭ್ಯವಾಗಿದೆ.

"