ವಿಜಯಲಕ್ಷ್ಮೀಗೆ ಬಂತು ದೃಷ್ಟಿ ಭಾಗ್ಯ

ಕುಂದಗೋಳ: ಹುಟ್ಟಿನಿಂದಲೇ ದೃಷ್ಟಿ ದೋಷ ಹೊಂದಿದ್ದ ತಾಲೂಕಿನ ಕೊಂಕಣಕುರಹಟ್ಟಿ ಗ್ರಾಮದ ವಿಜಯಲಕ್ಷ್ಮೀ ಬಾಳಿನಲ್ಲಿ ಈಗ ಬೆಳಕು ಮೂಡಿದೆ.

ವಿಜಯಲಕ್ಷ್ಮೀ ಅವರಿಗೆ ಜನಿಸಿದಾಗಲೇ ಅಲ್ಪ ಪ್ರಮಾಣದ ದೃಷ್ಟಿ ದೋಷವಿತ್ತು. ಪ್ರಾಥಮಿಕ ಶಾಲೆ ಕಲಿಯುವಾಗ ಕಣ್ಣಿನ ದೃಷ್ಟಿ ಕಡಿಮೆಯಾಗಿ, ಪ್ರೌಢಶಾಲೆಗೆ ಬರುವ ವೇಳೆಗೆ ಹತ್ತಿರದವರನ್ನು ಗುರುತು ಹಿಡಿಯಲಾರದಷ್ಟು ಕಣ್ಣು ಮಂಜಾದವು. ಪಾಲಕರು ಕುಂದಗೋಳ, ಹುಬ್ಬಳ್ಳಿ, ಬೆಂಗಳೂರಿನ ವಿವಿಧೆಡೆ ಚಿಕಿತ್ಸೆಗೆಂದು ಅಲೆದಾಡಿದರೂ ಪ್ರಯೋಜನವಾಗಲಿಲ್ಲ.

ಕೆಪಿಸಿಸಿ ಕಾರ್ಯದರ್ಶಿ ಸ್ಪಂದನೆ: ತಂದೆ ವೆಂಕನಗೌಡ ಗೌಡಪ್ಪಗೌಡ್ರ ಅವರು ರೊಟ್ಟಿಗವಾಡದ ಬಾಬಣ್ಣ ಬೆಟಗೇರಿ ಅವರ ಬಳಿ ಮಗಳ ನೋವು ತೋಡಿಕೊಂಡರು. ಬಾಬಣ್ಣ ಅವರು ಕೆಪಿಸಿಸಿ ಕಾರ್ಯದರ್ಶಿ ಷಣ್ಮುಖ ಶಿವಳ್ಳಿ ಅವರಲ್ಲಿ ಈ ಕುರಿತು ತಿಳಿಸಿದ್ದಾರೆ. ಅದಕ್ಕೆ ಷಣ್ಮುಖ ಶಿವಳ್ಳಿಯವರು ಸ್ಪಂದಿಸಿ, ತಾವೇ ಖುದ್ದಾಗಿ ಕಿಮ್್ಸ ಆಸ್ಪತ್ರೆಯ ನೇತ್ರ ತಜ್ಞ ರಾಜಶೇಖರ ದ್ಯಾಬೇರಿ ಅವರ ಬಳಿ ಯುವತಿಯನ್ನು ಕರೆದುಕೊಂಡು ಹೋಗಿ ಚಿಕಿತ್ಸೆ ಮಾಡಿಸಿದರು. ಆಗ ನೇತ್ರ ತಜ್ಞ ರಾಜಶೇಖರ ಅವರ ಮಾರ್ಗದರ್ಶನದಂತೆ ಬೆಂಗಳೂರಿನ ಕೆ.ಆರ್. ಮಾರ್ಕೆಟ್​ನಲ್ಲಿರುವ ಮಿಂಟೋ ಹಾಸ್ಪಿಟಲ್​ನ ನೇತ್ರ ತಜ್ಞ ಡಾ. ಜಿ. ಸುರೇಶಬಾಬು ಹತ್ತಿರ ಬಳಿ ಕರೆದೊಯ್ದು ವಿಜಯಲಕ್ಷ್ಮೀಯ ಕಣ್ಣಿನ ಶಸ್ತ್ರ ಚಿಕಿತ್ಸೆ ಮಾಡಿಸಿ ಅವಳ ಬಾಳಿನಲ್ಲಿ ಬೆಳಕು ಮೂಡುವಂತೆ ಮಾಡಿದ್ದಾರೆ.

ಒಂದೂ ರೂಪಾಯಿಯನ್ನೂ ಖರ್ಚು ಮಾಡಿಸದೆ ಯುವತಿ ವಿಜಯಲಕ್ಷ್ಮೀಯ ಕಣ್ಣಿನ ದೋಷ ಹೋಗಲಾಡಿಸಿ ಅವಳ ಬದುಕಲ್ಲಿ ಬೆಳಕು ಮೂಡುವಂತೆ ಮಾಡಿದ್ದಾರೆ.