ಹಬ್ಬುವಾಡ ರಸ್ತೆ ಹಾಳು ಮಾಡಿದವರ ವಿರುದ್ಧ ಕ್ರಮಕ್ಕೆ ಒತ್ತಾಯ

ಕಾರವಾರ-ಇಳಕಲ್ ರಾಜ್ಯ ಹೆದ್ದಾರಿಯಲ್ಲಿ ಗೀತಾಂಜಲಿ ಚಿತ್ರ ಮಂದಿರದಿಂದ ಇಸ್ಕಾನ್ ಮಂದಿರ ರಸ್ತೆಯವರೆಗೆ ಮೂರು ವರ್ಷಗಳ ಹಿಂದೆಯೇ ಸುಸಜ್ಜಿತ ಕಾಂಕ್ರಿಟ್ ರಸ್ತೆ ಮಾಡಲಾಗಿದೆ. ಈಗ ಇದ್ದಕ್ಕಿದ್ದಂತೆ ಅದರ ಮೇಲೆ ಯಾವುದೋ ಗುತ್ತಿಗೆದಾರ ಬಂದು ಮಂಗಳವಾರ ಡಾಂಬರು ಹಾಕಿದ್ದಾನೆ. ಅದನ್ನು ನಗರಸಭೆ ಅಧಿಕಾರಿಗಳು ವಿರೋಧ ವ್ಯಕ್ತಪಡಿಸಿದ ನಂತರ ಬುಧವಾರ ಹಾಕಿದ ಡಾಂಬರು ತೆಗೆದಿದ್ದಾನೆ. ಇದರಿಂದ ರಸ್ತೆಯಲ್ಲಿ ಜಲ್ಲಿಯಂಥ ಸಾಮಗ್ರಿ ಎದ್ದು ಹೋಗಿದೆ. ಅಪಘಾತವಾಗುವ ಸಾಧ್ಯತೆ ಇದೆ ಎಂದರು.

ಬಿಜೆಪಿ ಜಿಲ್ಲಾ ಉಪಾಧ್ಯಕ್ಷ ಸಂಜಯ ಸಾಳುಂಕೆ ಮಾತನಾಡಿ, ಇದರ ಹಿಂದೆ ಲೋಕೋಪಯೋಗಿ ಇಲಾಖೆ ಹಾಗೂ ಶಾಸಕರ ಕೈವಾಡ ಇರುವಂತೆ ಕಂಡುಬರುತ್ತದೆ. ಈ ಬಗ್ಗೆ ತನಿಖೆ ನಡೆಸಬೇಕು ಎಂದು ಒತ್ತಾಯಿಸಿದರು.

ನಗರಸಭೆ ಮಾಜಿ ಅಧ್ಯಕ್ಷ ರವಿರಾಜ ಅಂಕೋಲೆಕರ್ ಮಾತನಾಡಿ, ನಗರಸಭೆಯಿಂದ ಒಂದು ಬಾರಿ ಅಭಿವೃದ್ಧಿಗಾಗಿ ರಸ್ತೆಯನ್ನು ಪಿಡಬ್ಲುಡಿಗೆ ಹಸ್ತಾಂತರಿಸಲಾಗಿದೆ. ಅವರು ರಸ್ತೆ ಕಾಮಗಾರಿ ಮುಗಿದ ನಂತರ ಮತ್ತೆ ನಗರಸಭೆಗೆ ಮರಳಿಸಿಲ್ಲ. ಇದರಿಂದ ಲೋಕೋಪಯೋಗಿ ಅಧಿಕಾರಿಗಳೇ ಅದಕ್ಕೆ ಹೊಣೆ ಎಂದರು. ಬಿಜೆಪಿ ಪ್ರಮುಖರಾದ ನಾಗೇಶ ಕುರ್ಡೇಶಕರ್, ಸುಭಾಷ ಗುನಗಿ, ಹನುಮಂತಪ್ಪ, ಅರುಣ ಹಬ್ಬು, ಸುಭಾಷ ನಾಯ್ಕ, ಅಮಿತ್ ಕಾಮತ್ ಇತರರು ಇದ್ದರು.