ಚಿಪಗಿ ಭಾಗದಲ್ಲಿ ರೊಚ್ಚಿಗೆದ್ದ ಜನ! People

ಶಿರಸಿ: ಸಾಗರಮಾಲಾ ಯೋಜನೆ ಅಡಿಯಲ್ಲಿ ನಿರ್ಮಿಸಲಾಗುತ್ತಿರುವ ರಾಷ್ಟ್ರೀಯ ಹೆದ್ದಾರಿ 766 ಇ ಗುತ್ತಿಗೆದಾರರ ವೈಫಲ್ಯತೆಯಿಂದ ವಿಳಂಬವಾಗಿದೆ.

ಈ ಹಿನ್ನೆಲೆಯಲ್ಲಿ ರಸ್ತೆ ಕಾಮಗಾರಿ ವೇಗವಾಗಿ ಪೂರ್ಣಗೊಳಿಸುವಂತೆ ಆಗ್ರಹಿಸಿ ಮೇ 12ರಂದು ಶಾಲಾಮಕ್ಕಳನ್ನೂ ಒಳಗೊಂಡಂತೆ ನಗರದ ಚಿಪಗಿಯಲ್ಲಿ (People) ಬೃಹತ್ ಪ್ರತಿಭಟನೆ ಮಾಡಲಾಗುತ್ತಿದೆ ಎಂದು ವಿವಿಧ ಸಂಘಟನೆಗಳ ಪರವಾಗಿ ಆಟೋ ಚಾಲಕ, ಮಾಲೀಕರ ಸಂಘದ ಅಧ್ಯಕ್ಷ ವಿಶ್ವನಾಥ ಗೌಡ ಹೇಳಿದರು.

ಇಲ್ಲಿಯ ದಮನಬೈಲ್ ಶಾಲೆಯ ಒಳಗೂ ಧೂಳು ಆವರಿಸಿಕೊಂಡಿದೆ. ಇದುವರೆಗೂ ಶಾಲೆ ಎದುರಿನಲ್ಲಿ ತಾಡ್ಪಲ್ ಕಟ್ಟಿಕೊಂಡು ತರಗತಿ ನಡೆಸಲಾಗಿತ್ತು.

ಆದರೆ, ಈ ರಸ್ತೆ ಕಾಮಗಾರಿಯನ್ನು ಗುತ್ತಿಗೆದಾರರು ಅತ್ಯಂತ ನಿಧಾನವಾಗಿ ನಡೆಸುತ್ತಿರುವುದರಿಂದಾಗಿ ಸಮಸ್ಯೆ ಮತ್ತೆ ಹಾಗೇ ಮುಂದುವರಿದಿದೆ.

ಇಸಳೂರು, ಬಿಸಲಕೊಪ್ಪ ಸೇರಿದಂತೆ ವಿವಿಧೆಡೆ ರಸ್ತೆಯಲ್ಲಿ ಮಣ್ಣು ತೆಗೆದಿರುವುದರಿಂದಾಗಿ ಮಳೆಗಾಲದಲ್ಲಿ ಈ ಮಾರ್ಗದಲ್ಲಿ ವಾಹನ ಸಂಚಾರ ಸಾಧ್ಯವೇ ಇಲ್ಲ ಎಂಬಂಥ ಸ್ಥಿತಿ ನಿರ್ಮಾಣವಾಗಲಿದೆ.

ಹೀಗಾದರೆ ಬಸ್ ಗಳು ಬದಲಿ ಮಾರ್ಗದಲ್ಲಿ ಸಂಚರಿಸಬೇಕಾದ ಅನಿವಾರ್ಯತೆ ಉಂಟಾಗಲಿದೆ. ಶಿರಸಿಯಿಂದ ಬಿಸಲಕೊಪ್ಪ ವರೆಗಿನ ಶಾಲಾ ಕಾಲೇಜು ವಿದ್ಯಾರ್ಥಿಗಳಿಗೆ ದೊಡ್ಡ ಸಮಸ್ಯೆ ಎದುರಾಗಲಿದೆ.

ಹೀಗಾಗಿ, ಮಳೆಗಾಲ ಆರಂಭವಾಗುವುದಕ್ಕೂ ಪೂರ್ವದಲ್ಲಿ ಗರಿಷ್ಠ ವೇಗದಲ್ಲಿ ಕಾಮಗಾರಿ ನಡೆಸಬೇಕು. ಮುಖ್ಯವಾಗಿ ಮಳೆಗಾಲದಲ್ಲಿ ಉಂಟಾಗಬಹುದಾದ ಸಮಸ್ಯೆಯನ್ನಾದರೂ ತಪ್ಪಿಸುವ ಬಗ್ಗೆ ಯತ್ನಿಸಬೇಕು ಎಂದು ಆಗ್ರಹಿಸಿದರು.