ಕಾರವಾರ: ಈ ಬಾರಿ ಉಳವಿ ಜಾತ್ರೆಗೆ (Ulavi Jatra) 4 ಲಕ್ಷಕ್ಕೂ ಹೆಚ್ಚಿನ ಜನ ಸೇರುವ ನಿರೀಕ್ಷೆ ಇದ್ದು, ಅದಕ್ಕಾಗಿ ಸಿದ್ಧತೆ ಮಾಡಿಕೊಳ್ಳಲಾಗುತ್ತಿದೆ ಎಂದು ಉಳವಿ ಟ್ರಸ್ಟ್ ಕಮಿಟಿಯ ಅಧ್ಯಕ್ಷ ಸಂಜಯ ಬಸವರಾಜ ಕಿತ್ತೂರು ತಿಳಿಸಿದರು.
ಆಮಂತ್ರಣ ಪತ್ರಿಕೆ ಬಿಡುಗಡೆ ಮಾಡಿ, ಮಾತನಾಡಿದ ಅವರು, ರಥ ಮಹಾ ಪೂಜೆಯೊಂದಿಗೆ ಸೋಮವಾರದಿಂದ ಜಾತ್ರೆಗೆ ಚಾಲನೆ ದೊರಕಿದೆ.
ಫೆ.13 ರಂದು ಮಹಾ ರಥೋತ್ಸವ ನಡೆದು, 15 ರಂದು ಓಕುಳಿಯೊಂದಿಗೆ ಜಾತ್ರೆ ಮುಕ್ತಾಯಗೊಳ್ಳಲಿದೆ.
ಉತ್ತರ ಕರ್ನಾಟಕ ಭಾಗದಿಂದ ರೈತರು ತಮ್ಮ ಚಕ್ಕಡಿಯಲ್ಲಿ ಬರುವುದು ಜಾತ್ರೆಯ ವಿಶೇಷ. ಸುಮಾರು 2 ಸಾವಿರ ಚಕ್ಕಡಿ ಬರಬಹುದು ಎಂದು ಅಂದಾಜಿಸಲಾಗಿದೆ.
ಚಕ್ಕಡಿ ನಿಲ್ಲಿಸಲು ಶಾಸಕ ಆರ್.ವಿ.ದೇಶಪಾಂಡೆ, ಎಂಎಲ್ಸಿ ಗಣಪತಿ ಉಳ್ವೇಕರ್ ಅವರ ಸಹಕಾರದಲ್ಲಿ ಪಾರ್ಕಿಂಗ್ ವ್ಯವಸ್ಥೆ ಮಾಡಲಾಗಿದೆ. 1.5 ಕೋಟಿ ರೂ. ವೆಚ್ಚದಲ್ಲಿ ಕುಡಿಯುವ ನೀರಿನ ವ್ಯವಸ್ಥೆ ಮಾಡಲಾಗಿದೆ. ಪಶು ವೈದ್ಯರ ನೇಮಕ ಮಾಡಲಾಗುತ್ತಿದೆ.
ಜಾನುವಾರುಗಳಿಗೆ ನೀರು, ಮೇವಿನ ವ್ಯವಸ್ಥೆ ಕಲ್ಪಿಸಲಾಗಿದೆ. ಎಸಿ ಅಧ್ಯಕ್ಷತೆಯಲ್ಲಿ 2 ಸಭೆಗಳನ್ನು ನಡೆಸಿ, ಪೊಲೀಸ್, ಅರಣ್ಯ, ಕಂದಾಯ ಸೇರಿ ಸಂಬಂಧಪಟ್ಟ ಇಲಾಖೆಗಳ ಸಹಕಾರ ಕೋರಲಾಗಿದೆ ಎಂದರು.
ಸ್ವಚ್ಛತೆಗೆ ಕ್ರಮ ವಹಿಸಲಾಗಿದ್ದು, ಸಂಚಾರಿ ಶೌಚಗೃಹಹಳನ್ನು ಒದಗಿಸಲಾಗಿದೆ. ಎಂಎಲ್ಸಿ ಗಣಪತಿ ಉಳ್ವೇಕರ್, ಸದಸ್ಯ ವೀರೇಶ ಕಂಬಳಿ, ಉಳವಿ ಗ್ರಾಪಂ ಅಧ್ಯಕ್ಷ ಮಂಜುನಾಥ ಮುಕಾಶಿ ಇದ್ದರು.
ಕರೋನಾ ಕಾಲದಲ್ಲಿ ಜನಸಂಖ್ಯೆ ಕಡಿಮೆಯಾಗಿತ್ತು. ಕಳೆದ ವರ್ಷ ಜಾನುವಾರುಗಳ ಗಂಟು ರೋಗದಿಂದ ಗಾಡಿಗಳ ಸಂಖ್ಯೆ ಕಡಿಮೆ ಬಂದಿತ್ತು. ಈ ವರ್ಷ ಮತ್ತೆ ಹೆಚ್ಚಿನ ಸಂಖ್ಯೆಯಲ್ಲಿ ಎತ್ತಿನ ಗಾಡಿಗಳು ಬರುವ ನಿರೀಕ್ಷೆ ಇದೆ.
Ulavi Jatra ಜಾತ್ರಾ ಕಾರ್ಯಕ್ರಮಗಳು
ಇದನ್ನೂ ಓದಿ: https://www.vijayavani.net/mahakumbhamela-prime-minister-narendra-modi-to-take-a-dip-in-the-sangam-on-feb-5